رواية زهرة والبيت الملعون الجزء التاسع

بعد ما عدى سنتين واكتر وانا الحمد الله بقيت افضل ومفيش حد من الجن والارواح الشريرة قرب مني ومن بيتى تانى وكانت معايا الجنية الطيبة بتساعدنى على العلاج للناس مجاناً .

نسيت اقولك كان اسمها فاطمة وبعدما اتعرفت من الناس وكانت حالات كتير بتيجى ليا فى يوم لقيت ناس بتنزل عفش ساكن جديد فى عمارة قصادنا . مهتمتش بصراحة بس كنت مستغربة جدا من السكن فى دور ارضي عبارة عن اوضة واحدة .

اليوم عادى زى اى يوم و تانى يوم لقيت حد بيخبط عليا .
فتحت الباب لقيت واحدة ست تقريبا عمرها فى الاربعين او اقل بشيء بسيط . سلمت عليا وعرفتنى على نفسها .
الست : انا اسمي ( انجي ) انا جارتك الجديدة .

رديت :اهلاً بيك نورت اتفضلي ادخلي .
ابتسمت وفرحت اوووى ودخلت وقالت: انا مليش اخوات او اهل هعتبرك انتى اختى الصغيرة وانتوا اهلي ….ياريت .
بصراحة اتاثرت جدا من كلامها حضنتها وقلت : طبعا يا حببتى انا اختك واحنا كلنا هنا اهلك وناسك .

ردت وهى سعيدة : متشكرة اوووى …. اسمك اية بقى ؟
قلت اسمى زهرة وعندى ولد اسمه محمد ….وانتى عندك اولاد؟.
ردت عليا وقالت :لا انا لسة متجوزتش انا لسه انسة .

بصراحة استغربت انها لسة انسة مع ان شكلها جميل ومقبول بس مرضتش اعلق على الموضوع دة وقلت ربنا يرزقك ابن الحلال .

فجأة لقيتها وقفت وقالت : ممكن اطلب منك طلب. قلت اتفضلى تحت امرك يا انجي عاوزة اية يا حببتي ؟
ردت : كنت محتاجة الخلاط بتاعك لان الخلاط بتاعى اتكسر وانا بنزل العفش انبارح .

طبعا دخلت بسرعة جبت الخلاط واخدته ومشيت . مر الوقت وبعد ساعتين تقريبا رجعت الخلاط وكان معاه طبق فيه بعض الحلويات والكيك وحلفت عليا ان لازم اقبل الهدية واننا نكون اصحاب واخوات . قبت طبعا وقعدنا مع بعض نتكلم وقالت ياريت تيجى عندى تقعدى معايا لما تكونى فاضية .

المهم يا استاذ اتصاحبنا وقربت مني اووى واتعرفت على جوزي وكانت دايما توصيه عليا وتحب تلعب مع محمد ابنى اووى .

وفى يوم كانت قاعدة معانا انا و جوزي وقالت : انا تعبانة اووى مش عارفة اعمل ايه كل ما اروح لدكتور يقول معندكيش حاجة .

بسرعة لقيت فؤاد بيقول ليها : طيب خلى زهرة تشوف عندك ايه ممكن يكون مش سبب طبي .بصت ليه واستغربت وقالت : ازاى مش سبب طبي يعنى هيكون ايه ؟ رد عليها : ممكن يكون مس او سحر اتعمل ليك بيحصل مع ناس كتير اووى .

بصت ليا وقالت : انتى بتعرفي فى الحاجة دى يا زهرة ؟!
قلت : اه يا حببتى ربنا كرمني بمعرفة الحاجة دي . بصت ليا وقالت بصراحة انا مش بؤمن بالكلام دة متزعليش مني يا حببتى .

ضحكت وقلت : ليه السحر مذكور فى القرأن والمس كمان يعنى مش وهم . وعموما جربي مش هتخسري حاجة .
سكتت شوية زى ما تقول بتفكر وبعدين قالت: ماشي نجرب كدة ونشوف .ابتديت اقرأ قرأن وقبل ما تيجي الجنية فاطمة لقيت انجي وشها اتغير ولسانها اتعوج وصرخت فيا :عاوزة اية يا زهرة سبيني فى حالي و ملكيش دعوة بيها.

صرخت فيه وقلت لا هتخرج و تسيبها انت فاهم …يلااخرج منها
لقيت الجن ال معاها بيضحك اووى بسخرية مني ويقول: مش هتقدري تخرجيني ولاانتى ولا فاطمة ال معاك ههه. استغربت بصراحة من معرفته بفاطمة وكلامه

قلت : انت عارف فاطمة. وعارف ممكن تعمل فيك اية ؟!ضحك وقال عارف فاطمة وعارف عشيرتها وهم مش هيقدروا علينا ، وعاوز اعرفك حاجة فاطمة بتخدعك فى موضوع الكنز .

بصيت لجوزى وحسيت ان كلامه كذب ومش حقيقي ، لكن كمل وقال : الكنز موجود وفاطمة بتخفيه علشان القبيلة التانية عاوزة الكتاب الملعون يعنى صراع عشائر مع بعض وانتى الطُعم بتاعهم .

سكت وحسيت انى تهت ما بين الجن ده. وده لكن بصيت وقلت : انت كذاب ايه دليلك على الكلام ده . قال انا هثبتلك صحة كلامى والايام هتظهر كلامى صح ولا غلط و انا عارف مكان الكنز الحقيقي فين وانا مع انجي قاعد ،ولو عاوزين تاخدوا الكنز انا هخرجه ليكم .

فؤاد بص ليا وكانت عنيه بتدل على انه فرحان و مبهور ومصدق الكلام دة ، انا كنت بفكر هل الكلام دة حقيقى. ولا لعبة من الجن الشرير وسرحت فى كلامه لحد ما لقيت إنچي بتقولى : اية الكلام ده يا زهرة معقولة معايا جن !.

قبل ما ارد عليها رد عليها جوزي وقال وكان فرحان : ايوة انتى معاك جن بس متخافيش دة كويس ومش بس كدة دة قوي جدا ، زعلت لحظتها من فؤاد انا عاوزة ابعدها عن الموضوع دة واحنا كمان.

لكن طبعا ال فهمته من كلام فؤاد انه لسه فى دماغه موضوع الكنز وانه لسه بيفكر فيه ومش فى دماغه كل ال حصل لينا من مشاكل وتعب وحفر كل شوية فى البيت .

سرحت كتير اوووى فى كلام الجن دة هو ليه بيقول كدة واية مستخبي لينا فى الايام الجاية ، وانا سرحانة كدة مسكت ايدي إنجي وقالت: روحتي فين يا زهرة ؟

قلت ليها بعض ما رجعت من سرحاني : ها ….. ابداً بس انتى سمعتى ال حصل ؟
قالت اه ومكنتش مصدقة بصراحة الا لما سمعت بودني . بس كنز ايه ال بيتكلم عليه الجني دة معقولة فى بيتكم كنز ؟.

مكنتش عارفة اخبي ولا اعمل ايه لانها سمعت كل شىء وكل حاجة بقت واضحة زي الشمس. رديت عليها وقلت اه فى بس كل ما نحفر نلاقى المكان فاضي وده لعبة من الجن بينا .

لكن هى معلقتش على كلامي ده وسكتت بعدها استئذنت ورجعت بيتها . بعد ما مشيت بصيت لجوزي وقلت : انت ليه قلت ليها كدة على الجن وكنت حاسة انك فرحان اووى معرفش ليه!.

د وقال : وفيها ايه مش يمكن يكون كلام الجن ال معاها صح ونخرج الكنز ونبقى اغنياء . مستنتش يخلص كلامه و قلت : لا انا مش هرجع لوجع القلب تانى كفايه ال حصل يا فؤاد لينا .

لكن كان واضح عليه انه بيفكر فى الفلوس اوووى والكنز والدهب وقال يا ستي نجرب مش هنخسر شيئ ودى اخر مرة اوعدك انها اخر مرة …. لو مخرجناش حاجة هنقفل الموضوع.

انا رفضت وقلت ولا اخر مرة ولا اول مرة انا عاوز اعيش مرتاحة مش عاوزين كنوز يا عم كفاية الستر من ربنا الطريق دة نهايته وحشه اوووى . لكن فؤاد صمم على كلامه وحصل خناقة بيني وبينه وقعدت طول الليل ابكى وفى نكد .

لحد ما نمت و مرت الليلة فى نكد. وتانى يوم لقيت انجي بتخبط على الباب وهى ملهوفة و وشها متغير !

ياترى حصل ايه ؟

تابع