قصص واقعية

قصة سارة الجزء السابع

بالعربي / سارة : شوفي , فهمني بس ليش 

فادي : فكرتك بتختلفي عن امك بس طلعتي نسخة طبق الاصل عنا , عم تفوتي رجال على البيت و انا يلي وثقت فيكي 

سارة : انا ؟مستحيل ؟ مين قلك ؟ هادا من تاليف مرتك حتى تشوه صورتي بنظرك 

فادي : و هادا
فتح موبايلو على فيديو اباحي 
فادي : هاي مو انت ؟ هدول ما تيابك ؟ هادا ما تختك جمد نظري بالفيديو 
سارة : ما انا ولله هاي ما انا 
فادي : لكن مين , شعرك و وجهك و فستانك الاسود 

سارة : بس ما اانا (تبكي)ما انا , اكيد الفيديو تطبيق 

فادي : قومي و اطلعي بسرعة من البيت , ما قادر شوف وجهك , اتحركي قبل ما اعمل فيكي جريمة قتل يا وسخة يا حشرة يا ……. ضليتك وراي لوقعتيني على راسي 

كان عقلي رح يوقف من التفكير انا و عم اسمع فادي عم يحكي معي بهالطريقة , تمنيت متت و ما سمعت منو هالكلام , قمت ضبيت تيابي انا و عم ابكي و انا طالعة من الباب قلي طلقني ,نزلت من البناية انا و عم ابكي , و الناس عم تطلع فيني , وقفت تكسي و رجعت لعند اامي , ما كانت بالبيت , فتت على غرفتي و سكرت على حالي و رجعت امي و تفاجات بوجودي و حاولت تفهم مني بس صرخت فيا 

سارة : اطلعي لبرا و ما بقا تفوتي , ما بدي شوف وجهك انت السبب بكل شي انا عم شوفو بحياتي 

ام سارة : انا تزوجت 

سارة : و انا اطلقت 

مر اسبوع و انا حابسة حالي بغرفتي و مكتئبة و كل ما اتذكر فادي كيف عاملني حس حالي رح جن , اتصلت بسعيد و رحت شفتو و حكتلو كل يلي صار معي انا و عم ابكي 

سعيد: طولي بالك ما فيه غيرا نتالي و خالا ورا ضهرا مطبقين الفيديو و جايبن بنت بتشبهك و مفوتينا على البيت بغيابك بالجامعة 

سارة : هيدا التفسير يلي توصلتلو بعد اسبوع من التفكير ,لك راحت علي الامتحانات و ما كنت مقدمة الا 3 مواد من اصل 11 , انا ادمرت يا سعيد 

سعيد:اكام مرة نصحتك و قلتلك بلا هالفوتة بس انت عنيدة و هلا و بدك تتصرفي ؟

سارة : رح روح عند خالا لنتالي و احكي معو 

سعيد:انا برايي انت هيك عم تعقدي الامور و الافضل انك تبعدي عن كل هالعيلة و حتى لو فادي عرف الحقيقة نتالي ما رح تتركن بحالكن , رح ترجع تخرب عليكن 

سارة : بعرف بس انا بدي اياه يعرف بس انو انا مظلومة ……صحي انت متغير كتير 

سعيد: ايه عم العب حديد هيك بدا الست رغد 

سارة :اممم و حتى تسريحة عرك و لبسك متغيرين كمان,بس برافو عليا ولله قدرت تغيرك , انا كان حاسسني قلبي انو هالبنت بدا تطلع من خرجك

سعيد: أي خلص عقلنا و ركزنا و بدنا نخطب و نتزوج عن قريب انالله
سارة : الله يهنيكن لابقين لبعض

سعيد: المهم هلا انك ترجعي تتماسكي و ترجعي تكملي دراستك و تلاقي شغل بعيد عنن لهل العيلة اللئيمة

سارة ااااخ ما بعرف ضايعة و ايدي مربطين

بعد اسبوعين من نكستي و اتصلت بفادي خلالن كتير لاحلف و اترجاه انو يصدقني و يسمعني بس ما كان يرد على اتصالاتي و مسجاتي , رجعت قمت و زبطت حالي , هالمرة كانت وجهتي للراس الكبير و المدبر يلي ساندا حالا فيه نتالي , ما كان حدا بيقدر يطلعني من ورطتي غيرو , سالت عنو بالاسم و الكنية حتى وصلت لعندو , قلتلا لسكرتيرتو انو عندي موعد مع جمال الباشا , اخدت اسمي و فاتت لعندو تخبرو و طلعت بعد شوي 

السكرتيرة : استاذ جمال ما فاضي يقابلك هلا لانو عندو اجتماع ضروري 

سارة : ما في مشكلة بنطرو ليخلص اجتماع , و خبريه انو سارة ما رح تروح من هون قبل ما تشوفك 

اطلعت فيني نظرة و كانو ما عجبا حكيي 

سكرتيرة : قلتلك عندو اجتماع و ما بدو يشوفك هلا ,المفضل انك تروحي هلا و رح اعطيكي موعد لبكرا 

سارة : و انا قلتلك اني بنطرو ليخلص من اجتماعو بس فوتي خبريه 

سكرتيرة : انت ما بتفهمي عربي ,اذا ما غادرتي المكتب هلا رح اتصل بالسكيورتي يجو يطالعوكي 

سارة : اتصلي , هاي انا قاعدة هون 

عملت اتصالاتا و انا قاعدة ببرود اعصاب , اجو شابين ليطالعوني من المكتب , عليت اصواتنا انا و عم صرخ اني ما بدي اطلع , رفعني شاب من خاصرتي و بدو يطلعني انا و عم حاول ادفشو , عضيتو من ايدو لتركني و على اصواتي طلع جمال الباشا من مكتبو و اخيرا , ما كنت بعرف شكلو من قبل بس من هيئتو كان مبين انو هو , طولو متوسط و جسمو مليان , شعرو و دقنو رمادي , لون بشرتو حنطي و عيونو بني , عمرو بيوحي فوق ال45 سنة 

جمال : شو هالضجة ؟

سكرتيرة : استاذ جمال هيدي ما قبلت تطلع بالذوق طلبتلا السكيورتي يطالعو بس عضتو للشاب …..

جمال : طيب طيب 
اطلع فيني بنظرة غضب 

جمال : تفضلي فوتي
فتت انا و عم رتب شعري و وضب فستاني, راح قعد ورا مكتبو , شرب شفة من فنجان القهوة و اطلع فيني 
جمال : تفضلي ارتاحي 

قعدت على الكرسي انا و عم رتب كلامي بعقلي 
جمال : شو جاي تعملي هون بعد يلي عملتيه ببنت اختي؟
سارة : انا ما عملت شي , هي يلي عملت , يمكن انت ما بتعرف القصة من بدايتا 

جمال : بعرف , كانت عم تنصح بيت حماها و سلفا يلي بتعتبرو متل اخوا و بكل الاحوال هن رح يعرفو عنك كل شي اذا ما هلا , بعدين , بالاخير حبل الكذب قصير و انت كل همك كان تاخدي أي حدا من بيت الادهم و وقت ما قبل فيكي حسام لفيتي على اخوه المتزوج 

سارة : قصدك تقول انا فايتة على طمعة !

جمال أي تماما , انا رح اعطيكي قرشين مناح و انسي هالعيلة , لا انت من مستواهن و لا هن من مستواكي 
ابتسمت و انا عم ابكي 

سارة : كل شي عنكن بالمصاري , عم قول نتالي لمين طالعة , انا ما بدي مصاري لا منك و لا حتى من فادي , اشتغلت من قبل و اعتمدت على حالي و عشت من ورا شغلي و هلا رح ارجع اشتغل كمان بكل الاحوال و انا حبيتو لفادي ما كرمال مصاريه كرمال الامان و الاستقرار و شفت فيه كل عيلتي لانو هادا يلي ناقصني بس 

جمال : ما في استقرار مع واحد متزوج و عندو عيلة , شوفيلك واحد عذابي يحسسك هالشعور و بعدين لو كان بحبك فعلا كان واثق فيكي اكتر من هيك او كان اختبرك بطريقة ذكية بس هو من جوا مبرمج مخو انو انت متل امك , و معتبرك مجرد نزوة بحياتو
جرحني بكلامو ,تلبكت و انقهرت,سكتت و نزلت نظري و صرت افرك بايدي 
جمال : شو ؟
سارة : طيب معك حق بكل شي قلتو …. انا غلطت وقت فكرت بواحد متزوج و انا بوعدكن انو اطلع من حياة فادي على الاخير و ما لاحقو لا باتصالاتي او اطلع بطريقو بس بدي منكن تعترفو انو ما انا البنت يلي كنت بالفيديو و انو انتو يلي طبقتوه 

جمال :بس نحن ما ……

سارة : لا انتو , اذا بتريد من شوي كنت عم تقلي حبل الكذب قصير

جمال : طيب و ليش بدك نعمل هيك و انت بتعرفي اذا حكينا مع فادي و قلنالو هالحكي رح ترجعو لبعض , يعني يا انت غبية يا اما عم تتغابي 

سارة : لا وللله , بس ما بدي ياخد صورة بشعة عني , و قلتلك ما رح قرب علييه او على بنت اختك و رح اتركن يكملو حياتن كانو ما كنت فيا , اذا بتريد (تبكي) انا جيت مخصوص لعندك لاترجاك و بعرف ما تردني خايبة لانو سمعت عنك و عن سمعتك الطيبة و كرمك و ما حلو هيك تصرف يطلع منك 

اعطاني محرمة لمسح دموعي و سكت و سند ضهرو و حط ايدو على تمو 

جمال : ما بقدر انا هيك بضرا لبنت اختي و بطلعا كذابة و بخرب علاقتا مع زوجا اكتر بس رح عوضك عن يلي عملتو ب …

سارة : ما بدي تعوضني لا بمصاري و لابشي , ما في شي بعوض سمعتي يلي خربتو , و متل ما قلت حبل الكذب قصير و مصيرو فادي يعرف الحقيقة و وقتا انا ما رح فوت ولا لحظة لكون معو 

جمال انت هيك عم تهدديني ؟

سارة : انا عم خيرك استاذ جمال , قلتلو الحقيقة طلعت من حياتكن و اكيد عنكن مصادر تفوق الاستخبارات الامريكية لتعرفوا ذا بعدني على علاقة معو الا لا , كل يلي بدي اياه انو ما كون ذكرى بشعة بحياتو و ما ينظلي نظرة استحقار او ندم انو عيشني شهر مبسوطة و انا وعدتو ما كون مصدر تعاسة الو ابدا لانو هو بيستحق هالشي و حارب الناس كرمالي و ما بنسى يلي عملو معي ابدا و ما ممكن ردلو هالشي بخيانة تجرحو العمر كلو

جمال : بفكر بس ما بالوقت الحالي , لترجع امورو هو ومرتو بخير , انا بلاقي طريقة و بخبرو لنطلع باقل خسارئر ممكنة بس اذا رجع تواصل معك و انت اعطتيه وجه وقتا النا حكي تاني 

سارة : انشالله ما بقا بصير بيناتنا حكي تاني و انا رح غير رقمي و عنواني و ما رح خليه يوصلي ابدا لانو يلي بيني و بينو انكسر و وعدو خلف فيه 

جمال : بشو وعدك ؟

سارة : وعدني وعود كتيرة و اولا انو ما يتركني او يهتني بامي و يلي بخلف بوعودو ما بيلزمني لانو انا بنت بكون على قد كلامي ,و انت ما رح تشوف وجهي هون مرة تانية لاعرف اذا خبرتو اولا بكفي انك تعطيني وعد رجال و رح اطلع مطمنة من عندك 
جمال :….
سكت انا و عم اطلع فيه ناطرة علامات القبول , طول بصمتو , قمت وقفت 

سارة : ماشي انا رح امشي هلا و بعتذر على الضجة يلي عملتا برا بس كنت مضطرة

مشيت افتح الباب و اطلع من المكتب 

جمال : لحظة 

فتلت وجهي لعندو 

جمال : اتركي رقمك عند السكرتيرة بحال احتجتو لاتواصل معك 

سارة : رح غيرو لرقمي 

قام وقف و اجا لعندي

جمال : طيب ماشي , هاي كرتي و عليه رقمي , اتصل فيني بحال رجع تواصل معك فادي 

اخدتو بعد تردد و طلعت مشيت بالشارع انا و عم ابكي على الساكت و عم احكي مع حالي و حتى لو عرف فادي الحقيقة و رجع يعتذر مني مستحيل سامحو لانو ما وثق فيني و تركني باول امتحان لحبنا , غيرت رقمي و طلبت من امي انو نغير عنوان بيتنا 

ام سارة : انا رح انتقل على بيت ابو سليم و هيدا البيت رح اتركو الك , بتحبي تبقي فيه او تبيعي و تنتقلي على محل تاني و معي شوية مصاري رح ساعدك فين 
امي تزوجت ابو سليم يلي شفتو مرة او مرتين و تابت عن شغلتا بعد ما حرقتلي قلبي و دمرتلي حياتي , بعت البيت و اشتريت واحد تاني بمساعدة سعيد يلي ترددت بانو اعتمد عليه بس كان قد الحمل و اجت رغد ساعدتني بالبيت و تعزيلو و ترتيبو و عفشتو عفش مستعمل و بعد ما استقريت بالبيت بشهر اتصل فيني سعيد 

سعيد: اسمعي اليوم اجا عالمول ابو عضل و طلب مني رقم موبايلك و عنوانك و سال عليكي بالسكن و بيت امك بس ما لقاكي 

سارة : أي منيح و لا بحياتو رح يلاقيني , قد ما اصر عليك ما تعطيه رقمي و ما تعطيه وجه و قلو انك ما بقا عم تشوفني

سعيد: طيب , شو عاملة اليوم المسا ؟

سارة : متل كل مسا 

سعيد :رح اجي انا و رغد نتعشى عندك و رح نجيب بيتزا معنا 

سارة : ماشي

اجو المسا رغد و سعيد , بعد ما فاتو بعشر دقايق و عم نرتب الطاولة كرمال نتعشى ,رن جرس البيت , قام سعيد فتح الباب و سمعت صوتو عم يحكي مع حدا , لحقتو لشوف مين على الباب , كان فادي , بس متغير شوي و نحفان و مربي دقنو و سعيد واقف عم يتجادل معو 

سعيد: ما حلوة منك تلحقني كرمال توصلا و هي ما بدا تشوفك 
سارة : خلص سعيد فوت انت تعشا مع رغد , هلا بلحقك 
فات سعيد لجوا و هو عم يزاورو قربت على الباب 

سارة : شو بدك ؟
فادي:انا ……انا بعتذر كتير , الشيطان سيطر على عقلي و تهيالي انو انت 

سارة : ما في مشكلة حصل خير 

فادي: الي اسبوع عم دور عليكي 

سارة : ليش معذب حالك , كرمال تشوفني و تقلي انا انا اسف 

فادي:سارة انا بحبك كتير , من وقت ما تركنا و حاسس حالي ميت عم اكل و اشرب و اتنفس بس ميت , انا شكيت فيكي و غلطت بحقك و خبصت بالحكي و ضربتك بس لازم تعرفي انو ما ذنبي ابدا 

سارة : و انا و ذنبي تقلعني بهالطريقة من البيت انت و عم تسبني و تتهمني بشرفي , على كل حال كل هالحكي ما بقا مهم , ارجع لعيلتك ….

فادي : انت عيلتي و انا عيلتك 

سارة : كنت ..كنت يا فادي بس هلا انت ولاشي , شكرا على الايام الحلوة يلي قضيتا معك مع انو كنت حابة تخلص قصتنا بطريقة محترمة 
فادي : ما خلصت , كل يلي صار سوء فهم و بصير كتي ر بين أي اتنين متزوجين و بترجع المي لمجاريها و بالنسبة لنتالي انا رح طلقا 

سارة : لا ما طلقا هاي ام اولادك و يلي صار بيناتنا ما سوء فهم , يلي صار اكبر من هيك , شعوري اتجاهك تغير و ما بقا انت فادي يلي كنت شوفو بعيني , انت صغرت كتير بنظري , و هلا عن اذنك بدي روح لضيوفي الله معك 

سكرت الباب بوجهو و حطيت ايدي على قلبي و فتت على غرفة النوم ابكي لحالي , دقت الباب علي رغد بس الحقا سعيد و قلا اتركيا لتهدى لحالا و هي بتطلع و بعد ربع ساعة مسحت دموعي و زبطت حالي و اطلعت تعشيت مع رغد و سعيد و حاولت اخلق الضحكة على وجهي , بقي فادي يلاحقني يجي لعندي و يرن الجرس و انا ما افتحلو الباب , دورت ساعة على رقم جمال بين جزاديني للقيتو و اتصلت فيه 

سارة : انا سارة , تذكرتني ؟

جمال أي تذكرتك انت كنتي عشيقتو لفادي 

سارة : كنت مرتو ما كنت عشيقتو , المهم انا عم اتصل فيك لاتشكرك انك وفيت بوعدك الي و قلك انو زوج بنت اختك عم يلاحقني 

جمال : اخخخ طيب ماشي كيف عرف عنوانك ما على اساس رح تغيريه ؟

سارة : غيرتو بس جاب العنوان الجديد من رفيقي بشغلي القديم , لحقو هو و طالع من شغلو و الشاب كان جاي لعندي هو و خطيبتو 

جمال : وينو هلا ؟

سارة : راح بس من شوي كان واقف على الباب 

جمال : طيب انا بحكي معو هلا و انت ضلي على موقفك , بكرا بمل و بيبعد 

سارة : طيب 

جمال : وين عنوان بيتك ؟

سارة : رح ابعتلك اياه بمسج 

جمال : طيب بس يرجع يجي مرة تانية حكيني فورا 

سارة : طيب 

بعد يومين رجع فادي اجا مرة تانية لعندي: بعتلو رسالة لجمال ليجي ياخدو من باب بيتي, بعد نص ساعة سمعت صوت فادي عم يحكي مع حدا تاني , قربت عالى الباب و طلعت من العين , شفت جمال واقف معو و عم يتجادلو 

جمال : ما بقا بدا اياك, امشي معي 

فادي:جمال ما تدخل , انتو السبب بهالشي 

جمال :مرتك و اولادك اولى فيك و انت قاعد تراهق مع بنت صغيرة , ارجع على بيتك و انا ما رح قلا لنتالي انو جيت اخدتك من هون 

فادي : روح قلا و تعمل يلي بدا اياه , تفهم انو هاي مرتي كمان 

جمال كانت… كانت مرتك , انت يلي بدك تفهم هالشي 

مسكو من ايدو و بدو ياخدو , سحب ايدو 

فادي : انا بروح لحالي , ماشي يا سارة ماشي , هيك صار هلا , صرتي بتجيبلي عالم لتشحطني من عندك 

جمال : امشي 
اخدو جمال و راحو , بعد نص ساعة رن جرس بيتي , توفعتو فادي بس طلع جمال ,فتحتلو الباب , كان واقف و حاطط ايديه بجيبو و عم يطلع حواليه كان عم يتفحص الحارة يلي قاعدة فيا 

جمال :ممكن فوت اذا ما في مانع 

سارة : تفضل 

فات بخطواتو الهادية و قعد على الكنبة بالصدر و حط رجل على رجل و هو عم يطلع بالبيت 

سارة : كيف قهوتك ؟

جمال : سادة لو سمحتي 

رحت عملتلو فنجان و جيت ضيفتو , شرب منو شفة و حطو على الطاولة 

جمال : انا وفيت بوعدي و انت وفيتي بوعدك بس هاي الحالة طويلة و ما شكلو فادي رح يتركك بحالك و انا خايف على بنت اختي تعرف او تحس انو عم يركض وراكي بهالطريقة رح ترجع تنهار اعصابا مرة تانية و يمكن تعمل بحالا شي و ما تنفد هالمرة منا , مشكلتا لنتالي انو بتحبو كتير و لو ما بتحبو كان مستحيل اضل عندو ثانية بعد الشي يلي عملو معا

سارة : امممم انا شو فيني اعمل اكتر من يلي عملتو ؟

جمال : رح تغيري عنوان بيتك مرة تانية 

سارة : لا طبعا ما مضطرة انقل كل فترة و اتشنطط متل القطط

جمال : معلش هاي اخر مرة , وعد مني هاي اخر مرة و ما تاكلي هم بالنقلة و التكلفة , بس ضبي اغراضك و الاهم انو ما تخلي رفيقك او أي حدا يعرف عنوانك من رفقاتك كرمال ما يعرفو فادي 

سارة : طيب انا ما عندي رفقات غير شاب و بنت و رح صير شوفن بشي محل برا بس هيدا البيت شو رح يصير فيه 

جمال : شو بدك فيه ؟بشو لازمك اذا رح تنتقلي على بيت ااحسن و بحارة انظف كتعويض يعني 

سارة : هيدا البيت باسمي ما مستاجرتو اجار 

جمال : امممم , طيب نفس الشي اجار او ملك فيكي ترجعي عليه بس تنحل المشكلة و يفقد الامل فادي منك 

سارة :طيب 

جمال : رقمك صار معي , رح اتصل فيكي بكرا و انت كوني جاهزة و رح تجي سيارة و تاخدك على البيت يلي رح تبقي فيه الفترة 

سارة :اممم

جمال : دايما على القهوة 

سارة : صحة و هنا 
طلع من عندي جمال و انا قعدت على الكنبة شاردة بحياة نتالي يلي مليانة ناس بحبا و بتخاف عليا , كانت بنعم لا تعد و لا تحصى من عيلة و سند و نسب و جاه بس كان ناقصا محبة زوجا الا يلي كان بايدا تغيرا ,تاني يوم رحت على البيت يلي من طرف جمال , كان بيت كتير مرتب كبير و شرح مع اطلالة و منطقة راقية , فتحت جزداني و حسبت المصاري يلي بقيو معي , كانو عم يقلو كل يوم و ما عندي مورد لعيش منو مع انو نزلت دورت على شغل بس ما لقيت , دينت من سعيد مبلغ لبين ما يصير معي,كان كل همي انو بدي ارجع لحياتي القديمة الهادية و الكئيبة بعد يومين من قعدتي بالبيت رن جرس البيت لاول مرة و رحت اطلعت من العين , كان واقف شاب وجهو غريب 

سارة : مين ؟

مجهول: انا من طرف استاذ جمال 

فتحت الباب و شفتو ماسك كتير اكياس 

مجهول : هدول من الاستاذ جمال تفضلي 

اخدتن منو و سكرت الباب , فتحتن وصرت اضحك 

سارة : شو هيدا يا استاذ جمال , ما حالك شي 

اتصلت فيه فورا ما رد , رجع بعد نص ساعة اتصل فيني 

سارة : عفوا شو هدول يلي باعتلي اياهن 

جمال : شبن ما عجبوكي 

سارة : استاذ جمال انا وافقت اجي اقعد هون بالبيت كرمال راحتي و لانو بدي اخلص بس ما معناه انو تخول حالك تصرف علي و ما حبيتا بدا الشي يلي عملتو هلا 

جمال : شكلك فهمتيه غلط 

سارة : اذا بتريد هالمرة مشيتا بس ما بقا تحرجني و ترجع تبعتلي شي , وقت بنقصني شي معي مصاري و بنزل بشتري بنفسي شو ناقصني 

سكرت معو و انا مزعوجة 

سارة : حلو ولله نقوم من تحت الدلف نوقع تحت المزراب 
بعد اسبوع , رن جرس باب بيتي لتاني مرة , كان جمال 

سار:((لا اله الا الله شو جابوا هادا هلا )
نفخت و فتحت الباب 
جمال : مسالخير 

سارة : مسالنور 

جمال : كنت ما رق من هون و قلت بمر عندك بشوف احوالك 

سارة : لحمدلله منيحة 

جمال : سمعتي شي عن فادي 

سارة : ايه راح مرتين لعند سعيد على المول حتى يعرف وين رحت بس ما خبرو شي 

جمال : أي منيح و اجا عندي كذا مرة سالني عنك و قلتلو ما بعرف شي يلا هانت 

سارة : امممم 
جمال:ما بتشربيني قهوة عندك 
سارة :…..اممم تفضل 

فات هو عم و يطلع فيني و يبتسم , قبضني قلبي كتير من نظراتو , فات قعد , عملتلو قهوة و جيت 

جمال : سبحان الله كيف ريحتك عشقت بالبيت 

سارة : ايه 

جمال : ايه شو الشي يلي شافو فيكي فادي حتى هالقد الزلمة متعلق فيكي قالب متل الولد الصغير يلي مضيع امو مع انو على سلامتو فادي رجال ملتزم و منضبط و هادي و عقلو بيتحكم فيه 

سارة : ما بعرف , اسالو الو 

جمال قلت ليش لسا لاسالو , بكتشف بنفسي , انا بحب التنقيب و الاستخراج كتير 

سارة : عفوا ؟ 
جمال : هلا بدك تفهميني انك تحبيه لفادي ؟

سارة : ايه 

جمال : ولله هالفادي دنجوان زمانو , على شو النسوان عم تحبو و تقتل حالا عليه كمان

سارة :ما بعرف اكيد فيه شي مميز ما موجود عند غيرو 
جمال : متل شو يعني؟

سارة : ما بعرف 

جمال : شو بتعرفي لكن ؟ تسرقي رجال من مرتو ,طب اسرقيني انا 

توترت و صرت افرك بايدي , كان جمال عم يغمق بالحكي معي , التفتت على موبايلي كان بعيد عني كتير و خفت قوم جيبو و يحس علي 

جمال : ها …..شبك وين شردتي 

سارة : انا ايمت رح ارجع على بيتي 

جمال اعتبريه هيدا بيتك و ابقي فيه قد ما بدك 

بلعت ريقي 

سارة : طيب انا .. انا رح قوم اعمل عصير 

قمت و مريت من جنبو و هو عم يطلع من تحت لفوق , اخدت موبايلي من عن الطاولة بدون ما ينتبه و فتت على المطبخ , اتصلت بسعيد بس ما رد , فكرت اتصل بفادي بس قاطع تفكيري صوت جمال

جمال : وينك شو صار بالعصير ؟

طلعت من المطبخ 
سارة : ما طلع عندي رح ارجع اعملك قهوة 

جمال : تعي تعي ما بدي شي , جاي لشوفك 

رجعت قعدت قبالو 

سارة : كيفا نتالي؟ 
جمال : منيحة 
سارة : نتالي محظوظة انو عندا خال بحبا هالقد و بخاف عليا 

جمال : اممم و انت محظوظة انو طلع بحياتك جمال الباشا 

سارة : اممم 

قام وقف و قرب علي , انا وقفت فورا , صار يقرب و انا ارجع لورا للزقت بالحيط , حاوطني بايديه 

سارة : استاذ جمال انا متفاجئة فيك 

حطيت ايدي على ايدو و بدي نزلا , تجاهلا 
جمال : بشو متفاجئة ؟
سارة : ممكن ترجع لمحلك 

حط ايدو على وجهي 
جمال : لا ما ممكن 

سارة : حضرتك متزوج و ما …
جمال : و فادي متزوج كمان هو ايه و انا لا 

رن موبايلي 

سارة : عم يرن موبايلي ممكن تبعد لروح رد 
هز براسو بمكر 
جمال : لا 

توترت و صرت افرك بايدي 
جمال : انا انتبهت عليكي كل ما تتوترتي بتصيري تفركي بايديكي , خايفة مني , انا ما بخوف و بالعكس انا حنون كتير و خاصة مع يلي متلك 

سارة : ما خايفة منك بس ما مرتاحة , ممكن ترجع شوي لورا , لانك قطعت الهوا عني 

جمال : هو يلي بقرب منك بيقدر يبعد , فيكي شي متل المغناطيس بيجذب الواحد عيونك و شعراتك و شفايفك 

سارة (تبكي): ااذا بتريد بعد عني …..اذا بتريد , اذا حبيتو لفادي ما معناها انا بنت ما بسوى و ممكن انو ساير أي حدا
جمال : طيب ما تبكي….. سارة بنت انتصار

رفعت نظري و اطلعت فيه انا و متفاجئة , رجع شوي هو و عم يبتسم

جمال : كتير بتشبهي امك بصباها , رجعتيني لورا كتير , يمكن شي 15 سنة

سارة : من وين بتعرفا لامي ؟

جمال : في حدا ما بيعرفا لامك ,كانت حلوة كتير و اول ما قلتلي نتالي اسمك الكامل سالتا عن اسم امك و اسم ابوكي حتى اتاكد انو انت بنتا 

سارة : يعني انت يلي قلتلا لنتالي عن امي 

جمال : ايه 

سارة : و مدام بتعرف امي معناتا انت ما كتير بتفرق عنا بشي 

جمال : كان طيش شباب و بدي جرب بس و بالاخير الرجال ما بعيبو شي 

سارة : بس انا غير امي 

جمال : اممم واضح هالشي 

رجع قعد بمحلو 

سارة : اها يعني كنت عم تجربني هلا ؟

جمال : لو واحد قرب عليكي متل ما انا قربت بتصيري ترجفي و تبكي , هيدا كل شي بتعمليه , هيك بتصيري لقمة سهلة للكل
سارة شو كنت لازم اعمل ؟

جمال : ببساطة بتدفشيه بعيد عنك و بتضربيه باي شي بيطلع بايدك او ضربة قوية بين رجليه بتشل حركتو لبين ما تهربي و عم قلك هالحكي لانو بعرفك عايشة لحالك و ممكن تتعرضي لهيك شي , شو اخبارا امك ؟

سارة : تزوجت من فترة 

جمال اممم ممتاز , ما كان ازبطلا تاخد هيك خطوة من زمان 

سارة : اممم صح كتير اقترحت عليا تتزوج بس كانت رافضة , كانت بدا دمرني اكتر 

جمال : الله غفور رحيم الله يغفرلا و يغفرلنا , ما في حدا ما بيغلط بس الاهم انو يوقف عن هالغلط و يتوب و يكفر عنو , أي سنة بتدرسي 

سارة : انا تالتة بسبب هالظروف يلي مريت فيا و حملت مواد كتير و شكلي رح ابقى هالسنة فيا 

جمال : ما بعتقد في شي هلا رح ياثرر عليكي حطي عقلك براسك و اقعدي ادرسي ,شهادتك هي راسمالك بهالحياة , اادرسي تخرجي توظفي و الا ما تلتقي بشاب يحبك 

سارة : اممممم و اول ما يفكر يسال عني , رح يهرب متل ما هرب يلي قبلو 

جمال : عندك مشكلة واضحة بشخصيتك ؟

سارة : شو هي ؟

جمال : شخصيتك ضعيفة كتير و سوداوية و تشاؤمية و سلبية و الموضوع كتير مكبرتيه , يلي حالتن اسوا منك تزوجو و كملو حياتن طبيعي بدون أي عقدة 

سارة : مين هدول يلي اسوا من حالتي , لا اب و لا اخ و لا ام , ام عدم وجودا بحياتي افضل من وجودا
جمال :رح قلك مين اسوا منك , يلي من شاب لشاب و ماضيها وسخ بس بالاخير بتتزوج و بتكمل حياتا طبيعي ولا من شاف و لا من دري و انت ما عندك ماضي , انت نظيفة هيدا اهم شي 

سارة :لكن ليش حسام ما قبل فيني ؟

جمال : يصطفل هو ما قبل بس غيرو بيقبل متل ما فادي قبل مثلا بس انت اساتي الاختيار ,و انا وقت حكيت لنتالي ما توقعت تروح تحكي لزوجا و زوجا يحكي لاخوه و تصير كل هالقصة , وقت حكيت ما كان عندي نية ابدا انو خرب خطبتك من حسام لانو قلت انت بجوز غير امك و ندمت ليش حكيت , كان المفروض ضل ساكت , عم حس حالي انا السبب المباشر ورا كل هالقصة و انت بنت مسكينة و ما بتستاهلي هالشي

سارة : ………..

جمال : طيب انا رح روح هلا , ارجعي على جامعتك و على دراستك و خليكي هالفترة هون و اقبلي مني انو ساعدك بس لبين ما تلاقي شغل و تعتمدي على حالك 

سارة : شكرا كتير ما في داعي انا بدبر حالي 
جمال : معلش اعتبرين تعويض عن الاذى النفسي يلي عملتلك اياه 

طلع من عندي جمال و انا رحت غسلت وجهي و شربت مي بعد هالرعبة , و قعدت فكر بحكيو و شو لازم اعمل اقبل مساعدتو الا لا ,رجعت داوم الفصل التاني سنة تالتة و ما عاد رجعت شفت جمال ابدا بس كان ببداية كل شهر يبعتلي ظرف فيه مصاري اكتر من احتياجاتي و شي قسمو لدراسة و شي مصروف بيت و مواصلات و يلي بزيد كنت انزل اتسوق لانو كانت متعتي السوق و اللبس , اما فادي ما بقا رجعت شفتو بهديك الفترة , قلي سعيد انو شافو كذا مرة بالمول هو و مرتو و اولادو عم يتسوقو , ما بعرف شو حسيت , فرحت و زعلت بنفس الوقت , فرحت لانو رجع لعيلتو و حياتو الطبيعية و زعلت لانو حسيتو نسيني و انا بعدني عم فكر فيه و اتذكر ايامي معو ,قدمت الفصل التاني و رفعت كل موادو بس بقيت بالسنة نفسا تراكم مواد فصل اول و سنة تانية ,ضبيت تيابي و قررت ارجع على بيتي يلي تركتو شهور ,اتصلت بجمال لاعطيه خبر 

سارة : انا رح فضيلك البيت بكرا

جمال : ليش؟ في شي ؟

سارة : لا بس خلص حاجة , فادي رجع لعيلتو و انا صار لازم ارجع على بيتي 

جمال :طيب ماشي متل ما بدك , اعملي يلي بريحك , كيف دراستك ؟

سارة : منيحة 

جمال : صرتي رابعة ؟

سارة :لا بعدني تالتة 

جمال : يلا شدي حالك 

سارة : اكيد شكرا كتير الك على البيت و المصاري 

جمال : الظرف رح يصير يصلك على بيتك 

سارة : لا , هلا بلشت الصيفية و رح اعمل جهدي لاقي شغل 

جمال : طيب بس اذا رجع فادي لعندك شي خبريني 

سارة : ماشي شكرا مرة تانية بيباي 

رجعت على بيتي و عزلتو و استقريت فيه و نزلت دور على شغل , لقيت شغل بشركة البان و اجبان , كان بدن محاسبة , كان الراتب ما كتير مقارنة بكل شي رواتب اخدتن من قبل لهيك كنت اقتصد كتير بالصرف , بعتلي جمال اول شهر ظرف مصاري بس ما قبلتو و رجعتو مع الشاب نفسو و قلتلو خبرو انو سارة لقت شغل , بعد شهر كنت داخلة على مكتبي الساعة 8 الصبح , شفت جمال واقف مع رجال و عم يحكي و ياشر بايديه برا معمل اجبان و البان و كانو باقي العمال عم يحملو شحنة كبيرة , تفاجات بوجودو هون ,ما عرفت روح سلم عليه او اعمل حالي ما شايفتو حتى انتبه علي , دقق فيني شوي كانو عم يتذكرني , نزلت راسي و فتت فورا,بعد ساعتين عالعشرة, فات هو و صاحب المعمل ابو فؤاد

جمال: هاي انت , ما عرفتك اول ما شفتك 

سارة : و انا صراحة قلت هيدا انت الا لا 

جمال :عم تشتغلي هون ؟

سارة : ايه 

جمال: ابو فؤاد توصى فيا لهل الصبية 

ابو فؤاد: أي ما تكرم استاذ جمال , خلص ما من معارفك رح تكون مرتاحة على الاخر 

بعد ما راح جمال , رحت عند ابو فؤاد و سالتو جمال شو عم يعمل هون 

ابو فؤاد: استاذ جمال بيشتغل بالاستيراد و التصدير و بياخد نسبة على كل حمولة بصدرا او بستوردا و الو اسهم عنا 

سارة : ايه ليش هاي الجبنة يلي بتعملو بالمعمل بتصدرو ؟

ابو فؤاد: أي طبعا منصدرا لبرا و بتربح معنا اكتر ما نبيعا هون

سارة : امممم ولله 

بالشهر التاني بعد ما حاسبت كل العمال و اجا ابو فؤاد و يحاسبني ,اول ما اخدتن منو , عديتن مرتين 
سارة : انت مخربط معي , انا بقبض 20 و هدول 35 الف

ابو فؤاد : أي انا زودلك اياهن 

سارة : زودن ؟انت ضاعفتن تقريبا , ليش ؟مين طلب منك ؟ يعني لاني من معارف الاستاذ جمال هيك عملت 

ابو فؤاد: لا بس حسيت وجهك خير علينا وزاد الشغل , خدين و احمدي ربك و ضاعفي جهودك هيك بتكوني بتستحقين 

ضبيتن بالجزدان و مريت على السوق اشتريت لوازم البيت و اشتريت بنطلون خمريو بلوز بيضا شيفون بعد شهرين من عدم التبضع , كانت خزانتي مليانة تياب حتى وقت افتحا كانو يقلبو التياب علي بس غم هيك اوقفكل يوم قبالا ساعة و انا محتارة شو البس و ما كنت شوف شي خرج ينلبس , قضيت الصيفية بين شغلي بيتي و طلعاتي مع سعيد و رغد , و احيانا ما اطلع معن كرمال ما ازعجن بوجودي , كنت اقعد بالبيت و احضر شي فيلم و احيانا افتح اتفرج على صوري انا و فادي بتركيا ,اكتر لحظات كنت سعيدة فيا , اما امي كنت اتواصل معا على التلفون بعد ما تزوجت , بعد شهرين اتصل جمال و طلب يوفني بمكتبو , اول ما فتت التقيت بالسكرتيرة يلي قلعتني , اطلعت فيي بنفسية

سارة : عندي موعد مع استاذ جمال

قامت وقفت 
السكرتيرة : تفضلي ناطرك جوا 

دقيت الباب و فتت انا و عم اطلع فيا و ابتسم و رقصلا بحواجبي
سارة : صباح الخير 

جمال : صباح النور , كيفك ؟

سارة : لحمدلله, كيف كانت ؟

جمال : لحمدلله اييييييه كيف شغلك بالمعمل مرتاحة ؟

سارة : لحمدلله تمام و خاصة انو زادولي راتبي بعد ما عرفو اني من معارفك 

جمال : بالله!انا حكيتك لاعرض عليكي شغل بالشركة هون 

سارة :انا مرتاحة بشغلي و ما مفكرة ابدا اتركو و خاصة يدني و بصب بنفس اختصاص دراستي و عم اخد خبرة 
جمال : بس هيدا الشغل بفيدك اكتر و راتب اكتر

سارة : استاذ جمال انا ما بدي أي شغل من طرفكن , انا حابة بعد كتير تفاديا لاي مشاكل , بس شكرا الك على هاللفتة الحلوة و انت وقفت جنبي كتير ما بحياتي رح انسالك وقفتك و انشالله اقدر ردلك اياها بس ما هيك 
طلب فنجانين قهوة و قام و لف من ورا المكتب و قعد قبالي على الكرسي 

جمال : مشاكل شو قصدك ؟ اذا خايفة كرمال فادي , فادي ما بيجي لهون و ما رح يعرف 

سارة : بس انت بضل خالا لنتالي ………

قبل ما كمل جملتي , انفتح الباب و سمعنا صوت من برا قبل ما نشوف مين الداخل 

السكرتيرة : مدام عندو موعد و قلي ما حدا يزعجو
نتالي: و انا ما حدا 

سمعت صوت نتالي و كانو ماس كهربا صابني , تلبكت و تورت فورا , فاتت هي و عم تضحك , و اول ما شافتني تغيرت ملامح وجها فورا

نتالي: انت شو عم تعملي هون ؟

سارة :………..

نتالي: لك كيف الك عين …….خالو …كيف بتستقبلا لهاي عندك ……ما رح تطلعي من حياتي 

جمال : نتالي , خالو اطلعي انطريني برا بس لخلص 

نتالي: هاي يلي بدا تطلع مو انا 

قمت وقفت انا و عم افرك ايدي 

سارة : انا رايحة 
جيت لامشي و اطلع من الباب مريت من جنب نتالي انا و موطية راسي 

جمال : سارة ما تمشي , نتالي انطريني عند السكرتيرة و اطلبي فنجان قهوة لبين ما خلص شغلي

نتالي: شغل شو , الك شغل مع خطافة الرجال 
التفتت علي كنت واقفة جنبا 

نتالي: اخدتيلي زوجي مني و هلا بدك تاخدي خالي , انت متقصدة تقهريني و انا ما رح اسمحلك , بدي عرفك مين هي نتالي 

هجمت علي و شدتني من شعري و زتتني على الارض و قعدت فوقي تضربني , و جمال عم يصرخ عليا و يبعدا عني , حملا و رفعا عني و انا كنت هادية و عم اتكر الحادثة يلي صارت من عر سنين وقت امي اكلت قتلة من ام سامح , حسيت حالي ما كتير بفرق عنا

جمال : نتالي خلص 

نتالي: هالوسخة بدا ترباية , ما مرباية , متل اما من رجال لرجال , كانت بدا تصير سلفتي و بعدين صارت ضرتي و هلا عم تلفي على خالي 

قمت وقفت انا و عم ابكي و عم زبط تيابي , اشرلا جمال للسكرتيرة تاخدني فورا , طلعت مع السكرتيرة و نزلت على الطابق التاني و فوتتني على قاعة فيا طاولة كبيرة و كراسي كانو للاجتماعات , اطلعت فيني السكرتيرة هي و شمتانة 

اسكرتيرة : انطريه للاستاذ جمال هون 

سارة : بدي غسل وجهي

السكرتيرة : هون على ايدك اليمين الحمامات 
قمت غسلت وجهي , كان وجهي مجروح من اظافر نتالي و شعري منكوش , غسلت وجهي و زبطت شعري و رجعت قعدت على كرسي و طبيت راسي و ندمت كتير ليش لبيت دعوتو لجمال و حتى فكرت انو هو ممكن بدو يجمعني فيا لتفش خلقا فيني و تضربني بس رجعت استبعدت الفكرة بس تذكرت ملامحو هو و معصب من الموقف يلي صار و بعد نص ساعة طلع هو وعم يعتذر من يلي عملتو بنت اختو فيني

سارة : انا كنت لسا بدي قلك انو ما بدي اصتدم معا بس ما خلتني كمل

قمت وقفت 

سارة : فهما شو كنت عم اعمل هون و انو رفضت الشغل لانو بدي بعد عنا و عن أي حدا بخصا 
جمال : قعدي طيب لترتاحي و مناجل الحكي بالشغل لبعدين 

سارة : لا بدي امشي , استاذ جمال ما تزعل مني بس ما بقا تحكيني 

جمال :طيب رح خلي هلا الشوفير يوصلك على بيتك و ما تروحي على شغلك انا باخدلك اجازة 

سارة : بروح لحالي….اذا بتريد 

جمال : طمنيني بس تصلي 

سارة : ماشي
نزلت من شركة جمال , و انا عم قطع الشارع على الرصيف التاني و عم اتذكر وجه نتالي هي و عم تضربني كان بشبه وجه ام سامح كتير و حتى انا كنت بشبه امي بضعفي و استسلامي .

رفعت نظري و اخر شي شفتو هو سيارة سودا و يلي عم تسوقا نتالي باتجاهي , كانت ملامح وجها كلها حقد و غل و عم تكز على اسنانا , خفق قلبي بسرعة و هبت نسمة هوا ناعمة ,كان قدامي فرصة للنجاة بس انا ما انتهزتا …… فضلت اني موت على انو ينتهي فيني المطاف متل امي .

قصة سارة الجزء الثامن

بواسطة
هلا غرابلي
الوسوم

أبو إسلام الخطيب

مهتم بالشأن العربي ويتم ترجمة المقالت من وجهة نظر الغرب الي اللغة العربية

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق