قصص واقعية

رواية جسد بلا روح (الجزء الثامن عشر)

*بدأت ملك تتعامل مع على عادى وحست انه طلع مختلف عن الــ هى كانت فكراه بس برده حاولت تتعامل معاه بحذر عشان كان لسه جواها قلق وخوف م ناحيته وماحبتش يحصل ليها حاجة تانى وتكرر مأساتها ,وف يوم يكون على عايز ياخدها ع مكان وينزلوا سوى ويقفوا قصاد العربية بتاعته*

ملك*اول ما شافت انها هتركب معاه العربية لوحدهم حست انها خايفة ومضايقة*
على:متخافيش مش هنركب العربية ,هناخد تاكسى
ملك*بصتله بستغراب لانه حس الكلام الماكنتش قادرة تقولوا وبصتله وسكتت ,وركبوا التاكسى*:مش هتقولى رايحين فين؟
على:هتعرفى احنا قربنا نوصل اهوه
ملك:طب ما تقول دلوقتى
على:بطلى تبقى زى الاطفال الزنانة

ملك*بصتله وبعد كدا بصت ناحية الشباك وفضلت سرحانة وساكتة لحد ما وصلوا نــادى كبير*
على*كان واقف ع الباب*
ملك:ايه ده ده نادى
على*بأبتسامة*:اة ومش اى نادى
ملك:يعنى ايه مش اى نــادى
على:هتعرفى كل حاجة دلوقتى *ودخل م البوابة وقابل وشخص كان واقف بيحرسها*
سامى:اتفضل يا كابتن على نورت

على:ازيك ياعم سامى
سامى:الحمد لله ,يــــــاه ايه الغيبة الطويلة دى
على:اهوه ادينى رجعت تانى
سامى:نورت والله ,اتفضل

ملك*كانت مستغربة اوى ومستغربة اكتر كلمة كابتن دى*:هو انت جايبنى ليه هنا ,وكمان انا ماكنتش اعرف انك ليك ف النوادى والالعاب الرياضية وازاى كنت بتشرب سجاير وبتلعب ف النادى
على*وقف وبصلها*:لو استنيتى دقيقتين هتعرفى كل حاجة *وخدها ودخلوا مبنى كان بتاع ملاكمة وكاراتيه ,بس كل اوضة منفصلة عن التانية*

ملك*كانت شايفة ناس كتير بتدرب ومبسوطة اوى بالمنظر ده وخصوصا ان كان كمان فيه اطفال ,وفضلت ماشية مع على لحد ما وصله الاوضة كان فيها معدات رياضية*
على:ها ايه رأيك
ملك:بصراحة انا اول مرة ادخل نادى رياضى بس باين عليه مكان جميل اوى ,بس برده مش فاهمة انا هنا ليه؟
على:عشان ادربك
ملك*بستغراب*:تدربنى ايـــــــــــــــــــه!

على:بصى ياستى هجاوبك ع الاسئلة القولتيها رغم الاجابات بتاعتك دى هتعرفك مين على بختصار ,ده ياستى النادى بتاعى م وانا صغير بدرب فيه كنت بلعب كورة وملاكمة واحيانا كاراتيه بس مكملتش فيه ,يعنى زى ما تقولى كنت باخد م كل لعبة رياضية الجزء الاهم فيها *وبصلها وشاور ع جسمه*:ما هو عشان كدا جسمى رياضى مش شايفة العضلات ولا ايه شكلك مش بتشوفينى كويس

ملك*رغم انه قال الكلمة دى بهزار لكن ملك فعلا كانت حاسة انها مش بتشوفوا كويس او ما بتركزش معاه ولا ملامحه يمكن عشان الفترة الفاتت كانت مش بتطمن لى وشايفاه شخص مش كويس فمحابتش انها تلفت انتباها لى بأى شكل م الاشكال*
على:لا ماتسرحيش ركزى احنا قدامنا مشوار طويل
ملك:معاك! بس انت جايبنى هنا ليه بقى؟

على:هعلمك كذا حركة تعمليهم دفاع عن النفس عشان ماتسمحيش لاى واحد انه ييجى ناحيتك
ملك*بصتله وحست انها فعلا فكرة كويسة اوى ليها*
على:انا عارف انك بتخافى من.. ,ولا بلاش بتخافى ما بتحبيش تتعاملى معاهم لكن لما تتعاملى وتحسى انك معاكى حاجة تقدرى تدافعى بيها عن نفسك هتبدأى تتجرأى ومش هيفرق معاكى اى حد فهمانى ياملك
ملك*ابتسمت*:فهماك ياعلى

على:لا على دى ف البيت , هنا تقوليلى يا كابتشن
ملك*ضحكت اوى*:حاضر ياكابتشن ,بس ازاى انت رغم كل الرياضة دى كنت بتشرب سجاير!!
على*خد نفس عميق وبدأت عليه ملامح الحزن*:ع فكرة انا بادئ م فترة قريبة اشربها بعد وفاه بابا ,انا قبليها كنت عمرى ما حطيت سجارة ف بوقى لكن كنت وقتها بشربها عشان الهم والمشاكل ,عارفة انا كنت اوقات كتير لما كنت بختفى كنت بروح ازورهم ف قابرهم واقرألهم الفاتحة بحس انهم بيوحشونى اووى ,سابونى ف تعب كبير وكنت اوقات كتير بحس ان مجهود عليا وكمان خوفى ع نهى كان زايد اوى

ملك*بحزن*:انا كمان ماما وحشتنى اوى وحاسة م بعدها حاجات كتير اتغيرت
على:ربنا يرحمهم كلهم ,بس عارفة مش عارف ليه دلوقتى حاسس ان حاجات كتير هتبقى احسن والهم والمشاكل دى مابقتش فارقة معايا كأن حاجة دخلت حياتى غيرتها
ملك*بعدم فهم*:يمكن كمان عشان نهى قربت تجوز وهيتشال الحمل م عليك شوية
على*بصلها ورفع حاجبه*:اة عشان نهى ,صبرنى يارب ,ممكن بقى نبدأ
ملك:م دلوقتى

على:اة انا كابتشن جامد ومابيحبش الدلع ,يــــــــــــلا
*وبقى على يدربها, كانت مبسوطة اوى وحست انها فعلا فكرة حلوه وانها هتقدر تحمى نفسها م اى حد او اى حاجة ممكن تأذيها وكانت كل يوم بتقرب م على اكتر واكتر ع اليوم القابلوا وكانوا يقعدوا مع بعض ف البلكونة ساعات يتكلموا ويهزروا سوى ,ولقيت نفسها شايفة على حاجة تانية خالص غير على التانى الكانت بتشوفوا فيها ,ف يوم تكون قاعدة مع رحمة ونهى*
رحمة:هو ايه الحيوار
ملك:حوار ايه!

رحمة:يعنى كنتى ف الاول مش بتكلمى على دقيقتين ع بعض دلوقتى بتقعدوا ف البلكونة ترغوا بالساعات
نهى*ابتسمت*:انا كمان بقيت حاسة بكدا
ملك*قامت وقفت وكانت ساعتها ف ايديها سكينه لانها بتقشر برتقان*:هو انا لو قتلتكوا انتوا الاتنين دلوقتى هاخد اعدام
نهى:اهدى بس السلاح يطول
ملك*بعدت عنهم شوية*:انتوا هتجننونى ,مكالموش مش عاجب ,اكلموا مش عاجب ,اعملكوا ايه يعنى
رحمة*ضحكت*:يابنتى احنا مش قصدنا حاجة بس مستغربيين التغيير المفاجئ ده يعنى خصوصا ان انتى وعلى ماكنتوش ع وفاق

ملك*سكتت شوية*:عادى يعنى ,واهوه حصل وكمان احنا متفقين ان الموضوع كله اننا اصحاب بس
رحمة:اة ما انا عارفة *وبصت ع نهى*:هى ومحمد بدأوها اصحاب بس برده
نهى:بصراحة *وبصت لملك*:اةة فعلا ,, وارمى السكينه دى
ملك*بصتلهم ورفعت حاجبها واتكلمت بجدية*:لا بس احنا بجد اصحاب واخوات عادى يعنى مفيش حاجة ,وكمان انتوا مركزيين معايا ليه نفسى افهم ,هو مش انتى عندك امتحانات ,وانتى يا اخت مش عندك جوازة عايزة تحضريلها ومزاكرة كمان

نهى:اة صحيح بمناسبة الجوازة احنا لزما ننزل سوى نشترى حاجات ونروح نحطها ف الشقة انا حاسة انى عاملة زى الفرخة الدايخة مش عارفة اعمل ايه ولا ايه!
ملك:مش انا قولتلك ماسمعتيش كلامى ,ما قولتلك خليها ف الاجازة الكبيرة
رحمة:ما انتى عرفاها متسربعة ع الجواز قال يعنى حاجة حلوه بلا نيلة
نهى:ع اساس انك جربتى يابت

رحمة:يابنتى م غير ما اجرب شوفى كمية المشاكل ال بتحصل ومسئولية وبلاوى
ملك:لا ربنا هيبعد عنهم المشاكل واهم حاجة يكونوا بيحبوا بعض بابا وماما كانوا كدا ع فكرة كانوا بيحبوا بعض عشان كدا المشاكل ماكنتش بتكون كتيرة ف البيت ,لكن لما طنط جت *وابتدت ملامحها تتغير*: ابتدت المشاكل والخناقات شوية بس كانت بتقدر تصالحه وتخليه يعمل اى حاجة هى عيزاها
رحمة:الله يكون ف عون باباكى
نهى:انا عايزة اشوفها هى مش هتيجى

ملك:مش عارفة!! *واول ما خلصت الكلمة دى لقت موبايلها بيرن وكان باباها فرحت اوى*:بابا وحشتنى
مجدى:وانتى كمان ياحبيبتى وحشانى جدا
ملك:بابا انت مش هتيجى قريب بقى
مجدى:هاجى طبعا ده انا مقدم ع اجازة مخصوص والله ,شوفتى بقى رغم انى عمرى ما عملتها
ملك*بفرحة*:بجــــــــد هتقعد معانا قد ايه!
مجدى:اسبوع !

ملك:الله يابابا ده احلى خبر سمعته ف حياتى
مجدى:اول ما تخلصى امتحانات ويبتدى تجهيز الفرح هنيجى انا وصفاء ,وكمان ف مفجأه هتعجبك اوى
ملك*بستغراب*:مفجأه ايه!
مجدى*ابتسم*:هتعرفى لما نيجى انا هقفل دلوقتى ياحبيبتى وهكلمك بعدين
ملك*بأبتسامة*:ماشى يابابا *وقفلت مع باباها واستغربت اوى ماكنتش فاهمة مفجأه ايه البيتكلم عنها!!*
نهى:ايه باباكى جى

ملك*ركزت ف كلامها*:اة وهيقعد معانا اسبوع الفرح كله *وقالت بضيق*:وطنط جاية معاه
رحمة:اهيه ياختى جاية وهتشوفيها *وبصت ع ملك*:مالك انتى اضايقتى ولا ايه!
ملك:لا مش مضايقة بس بابا قال عاملى مفجأه
نهى:ايوه ياعم تلاقيه هيجبلك هدية جامدا اووى
ملك*ماكنتش عارفة ليه مش مطمنة بس حاولت تطمن نفسها انه عادى ومش هيحصل حاجة*
*وفضلوا يتكلموا سوى وف الوقت ده على ومحمد قاعديين مع بعض*
محمد:ها قولت ايه!

على:انت مستعجل ليه ما قبل الفرح ننزل نجيب البدل
محمد:ما تخليها م دلوقتى ويكونوا عندنا احسن ولا انت مشغول كالعادة
على:لا انا النهاردة اجازة ,ما انت عارف مواعيد النادى بتاعتى
محمد:ايووه بقى ياعم بقيت تروح النادى ,اهم حاجة ملك بتدرب كويس
على:بتغلبنى يامحمد ,دى حركتها بسيطة اوى بفضل اقولها انشفى شوية
محمد*ضحك*:هى ملك م صغرها وهى كدا وكمان ما تنساش انها بنت برده ,وفوق كل ده موضوع التدريبات ده بياخد وقت عقبال ما تعود جسمها عليه!

على:صح ,عندك حق
محمد:يبقى خلاص هننزل بكرة نروح نجيب البدل
على:مش هينفع انا رايح لملك ونهى الجامعة عشان عايزيين ينزلوا يشتروا حاجات خليها بعد بكرة ,يلا انا بقيت السواق الخصوصى بتاعكوا
محمد:ليه يعنى ع اساس انك جى معايا كدا ما انت هيجيلك بدلة برده

على:ماشى هخلص المشوار بتاعهم عشان انت عارف زن نهى ,وبعديين نبقى نروح ف المكان ال انت عايزه
*وفضلوا يتكلموا شوية وبعديها روح على ودخل البلكونة لقه ملك قاعدة وسرحانة*:ايه ده ,ده انتى مش هنا خالص
ملك*بصتله وابتسمت*:انت جيت امتى
على:م شوية ,مالك
ملك:مفيش

على:هتخبى ع صاحبك برده ,ده انا بقول عليك صاحبى الجدع الــ بيحكيلى كل حاجة
ملك*ابتسمت*:يعنى كنت سرحانة شوية اصل بابا قالى هيعملى مفجأه لما ييجى
على:يـــــاه انتى بتسرحى ع المفجأت طب انا عملك مفجأه بكرة
ملك*ضحكت*:على بطل رخامة
على:والله ما رخامة انا بجد جاى بكرة الجامعة
ملك:ليه!!

على:عشان نهى عايزانى انزل معاكوا وانتوا بتجيبوا الحاجة عشان تشيلها ف العربية ,ايه رأيك لما اعلمك السواقة
ملك:تعلمنى انا!!
على:أة اصل نهى بتخاف ورحمة قلبها ميت اة بس ممكن تتخانق مع ظابط المرور معندهاش مشكلة وعربيتى تضيع فأنتى ممكن اعلمك السواقة وبالمرة تروحى وتيجوا بيها براحتكوا
ملك:طب وانت؟

على:لا انا عادى زى ما انتى شايفة باجى م الشغل ع البيت ولو كنت هخرج مع محمد ساعات كتير بنخرج مشى
ملك:بصراحة دى فكرة ماكنتش ف بالى خالص عمرى ما فكرت انى هسوق عربية طول حياتى
على:فكرى! صدقينى فكرة مش وحشة!!

ملك*بصتله*:انت بجد بدأت تخلينى اعمل حاجات عمرى ف حياتى ما تخيلت انى اعملها
على:عيب عليكى ,احنا بتوع التجديد
ملك*ضحكت اوى*:ماشى انا هسيبك بقى عشان اعرف اصحى بكرة وننزل نشترى ال احنا عايزينه
على*ابتسم*:ماشى *ولسه ملك هتدخل البلكونة*:ملك
ملك:نعم!

على*بصلها وسكت شوية*:خلى بالك ع نفسك ,هشوفك بكرة اكيد
ملك*ابتسمت*:ان شاء الله *ودخلت ملك وحاولت تنام بس حست انها قلقانة م المفجأه الباباها قالها عليها وم ساعتها حاسة ان قلبها مقبوض ومش مطمن ,حاولت تشغل دمغها بأى حاجة تانية ,وتانى يوم راحت الجامعة*
مها*بتردد*:هو بصراحة بخصوص مااهر
ملك*اول ما سمعت اسمه اضايقت اوى*

نهى:مش عايزيين نعرف حاجة عنه
مها:بس ده موضوع مهم والله وانا واثقة ان محدش فيكوا عرفوا او سمعوا قبل كدا
نهى*بتنهيدة*:قولى يارويتر
مها:تعرفوا ان ماهر حول م جامعة تانية عشان خاطر بنت
ملك*اول ما سمعت كدا انتبهت للحوار*
مها:بنت ازاى يعنى!
مها:يعنى كان علق بنت معاه وبعد كدا سابها وخلع وعشان كدا سابلها الكلية كلها واقولكوا ع حاجة كمان
نهى:ايه تانى؟

مها:وائل ده طلع صاحبه الانتيم اووى ,وهو كمان حول عشان كدا وميقولش لحد ع حوار ماهر ومكانه ,بقولكوا ايه انا مقولتش حاجة بقى هه باى*وسابتهم ومشيت*
ملك*كانت قاعدة ومضايقة اوى خصوصا انها فهمت ان هو وائل كانوا عامليين الحوار ده عليها*:بجد شخص مؤرف
نهى*اضايقت*:خلاص بقى ياملك احنا مصدقنا انك نسيتى الموضوع ده ,ربنا هياخدلك حقك منه
ملك*بتنهيدة*:يـــــــــــــــــــــــــــــارب *وفضلوا قاعديين مع بعض*

نهى*جاتلها مكالمة وبعد كدا قفلت*:على بيكلمنى وبيقول انه تحت
ملك*بلهفة*:طب يلا ننزلوا
نهى:انزليلوا انتى وانا هحصلك هخلص بس الورق الــ ف ايدى ده
ملك:ماشى *ونزلت ملك بسرعة واول ما خرجت م مبنى الجامعة لقت على واقف مع وائل وباين عليهم بيتكلموا ف موضوع جد اوى اول ما شافت المنظر ده رجعت بضهرها لواره عشان مش يشوفوها واتصدمت اوى وبدأت تراقب التحركات م بعيد لحد ما لقت وائل قام مشى بسرعة كأنه كان خايف ان حد يشوفوا *
نهى*لقتها واقفة قربت ناحيتها*:ايه ماروحتيش لعلى ليه؟

ملك*بصتلها واتخضت*:هه اصل قولت نروح سوى
نهى:طيب يلا بينا
ملك*كانت مضايقة اوى وقربت ناحية على وسلموا عليه*
على:ينفع كدا بقالى ساعة مستنيكوا وواقف لوحدى راسى ورمت م الشمس
نهى:حد قالك تخرج م العربية
على:اهوه بقى قولت اشم شوية هواه
ملك*بستغراب*:هو انت فضلت واقف لوحدك
على*ابتسم وقال بهزار*:اومال هجيب حد م الشارع يقف معايا ,يلا اركبوا

ملك*ركبت وكانت طول الطريق مستغربة ومش فاهمة حاجة معقولة يكون على لى علاقة بوائل ,طب لو كان حتى بينهم معرفة قديمة ليه مقالش ان كان واقف معاه حد م زمايلنا ليه متكلمش ,وماحبتش تسئ الظن به وقالت تستنى يمكن يحكيلهم او يقولها ع اخر اليوم او لما يقفوا ف البلكونة*وابتدت ملك تفتكر كل ده وبصت لمهند*
مهند:وقــــــــــــــــــــــــالك انه كان واقف معاه

ملك*بتحرك راسها بالنفى*:لا مقالش ورغم انى شكيت فيه بس ماكنتش عايزة اسئ الظن تانى عشان ف الاخر ماطلعش غلطة ,هو البنى ادم الوحيد الكان ملغبطنى ف حياتى ماكنتش عارفة حاجة عنه هو كويس ولا لا ,هو طيب ولا لا,هو فعلا بيعمل كل ده عشان يساعدنى ولا عشان عايز يوصل لحاجة تانية وغرضه حاجة تانية
مهند:تصدقى عندك حق موضوع محير جدا؟

ملك:كنت اوقات احس انى فهماه واوقات كنت احس انى مش فهماه خالص ,قولت يمكن كان بسبب الحصلى ف حياتى ده هو الاثرعليا وخلانى احس بكدا ,لكن قررت انى اجمد وافضل للاخر لحد ما تبان الحقيقة *وقالت بتعب*:ممكن اكمل ف يوم تانى
مهند:اة طبعا ,اكيد *وقام ضرب جرس لحسين*
حسين:ايوه يادكتور
مهند:انسة رحمة برة
حسين:اة بــرة
مهند:ياريت تدخلها
حسين*خرج ندهلها ودخلت رحمة*

رحمة:ها ياملك عاملة ايه؟
ملك*بهدوء وتعب*:الحمد لله
رحمة*بصت لمهند*:هو ممكن ناخدها وتسافر يادكتور
مهند*بصدمة*:تسافر فين!
رحمة:اسكندرية!

مهند*بص لملك وبعد كدا بص لرحمة*:ماعتقدتش ان ينفع دلوقتى خالص وكمان هى لزما تستريح عشان الحمل
رحمة:بس انا قولت يمكن تغير جو
مهند*بجدية*:تفتكرى لو راحت اسكندرية هتغير جو ,اذا كان ده المكان الحصلها فيه *ولسه هيتكلم*
ملك*اول ما سمعت الكلام ده الدموع نزلت ع خدها وقالت بحزن*:انا مش عايزة اسافر يارحمة
رحمة*بصت لملك وحست انها ماكنش ينفع تتكلم ف الموضوع ده ف وجودها*:ملك ونبى ما تزعلى والله ما كنش قصدى انا قولت يمكن ده هيخليكى تغيرى جو شوية
ملك*بتمسح دموعها وسكتت*

مهند:فكرة غلط! لوسمحتى خلى كل حاجة زى ما هى لحد ما تخلص الجلسات ممكن
رحمة:ماشى *ولسه هتاخد ملك وهتمشى*
مهند:هو انا ينفع اوصلكوا يعنى الوقت متأخر واستاذ رؤوف مش معاكوا وكمان انا معايا عربيتى
رحمة:لا مش هينفع نتعب حضرتك
مهند*ابتسم*:ولا تعب ولا حاجة *ونده حسين وقالوا قفل العيادة ونزل ووصلهم وطول الطريق كان باصص ع ملك وهى سرحانة وشغلها اغنية ام كلثوم عشان كان عارف انها بتحبها وفعلا فضلت تسمعها وسرحانة وجواها حاجات كتير اوى ولغبطة اكبر واقوى م اى حاجة وشوية ووصلوا قصاد العمارة*:حمد الله بالسلامة
رحمة:الله يسلمك شكرا جدا

مهند:عفوا ع ايه! هشوفك الجلسة الجاية
*وفضل واقف لحد ما ملك ورحمة طلعوا وشوية وخد عربيته ومشى هو كمان ,وحس ان ملك صعبانة عليه مرت بفترة مش سهلة ف حياتها فعلا وكان الكل باصص ع الشكل وبس ومحدش كان بيبص ع روحها او جوهرها م جوه ,وحس قد ايه ان الموضوع ده صعب ده هو كولد لما كان بيلاقى بنات بتبص عليه كشكل ومامته تقولوا ف بنت معجبة بيك كان يضايق لانها بصت ع شكل وبس ولما كانت تجيبلوا صورة بنت وتقوله شوف شكلها حلو ازاى كان مابكونش حاسس انه عايز يعمل ده كان ديما بيدور ع الجواها مش ع شكلها ,وفضل ماشى بعربيته وتعــــدى ايام وييجى اليوم الملك هتحكيلوا فيه ع الحصل معاها*

رؤوف:الدكتور وصل
حسين:ع وصول ,ممكن تدخل تنستناه جوه
رؤوف*ابتسم*:طيب ياحبيبتى ادخلى انتى وانا هنزل اجيب حاجة م تحت واطلع تانى
ملك*بصتله وسكتت وحسين فتحلها المكتب ودخلت قاعدة ع الكرسى القصاد المكتب وشوية وسمعت صوت المطر خرجت بصت م البلكونة وكأنها بتفتكر حاجة وبدأت الدموع تنزل ع خدها*
مهند*دخل لقاها واقفة ف البلكونة جاب جاكيت بتاعه وحطه عليها*:هتبردى ولو بردتى مش هتاخدى علاج عشان ده غلط ع ال ف بطنك

ملك*بحزن مسكت بطنها البدأت تكبر وتبان ومسحت دموعها ودخلت قاعدة ع الشيزلونج*
مهند:انا اسف انى اتأخرت عليكى الطريق زحمة ومطرة زى ما انتى شايفة
ملك*بتنهيدة وحزن*:اة شايفة
مهند:انتى كويسة
ملك*بتحرك راسها بنعم*
مهند:تحبى تكمليلى

ملك*خدت نفس عميق*:ماكنتش قادرة احكم عليه خالص ومش عارفة هو ايه بالظبط بس ظاهرتلى الحقيقة بتاعته اليوم ده ,كان يوم زى ده تقريبا ومش بعيد يكون كان نفس اليوم ,لقيته طلب منى اننا نروح ندرب ف النادى ورغم ان الجو كان فعلا باين عليه هيقلب بس لقيته اصر اننا نروح وروحت معاه *فـــــــــــلاش بــــــــــــاك*
على:بما اننا مش هنلاقى تاكسيات دلوقتى فلزما نركب العربية *وبصلها*: ولا لسه خايفة وقلقانة
ملك*بتنهيدة*:لا خلاص مفيش مشكلة *وركبت ملك كانت حاسة انه بقالوا فترة غريب معاها حتى ماكنش بيقف يتكلم معاها زى الاول ,واول ما ركبت لقيته قفل الباب بتاع العربية ,اتخضت بالحركة دى لانها فكرتها بنفس الماهر عامله*:هــ ـــو ليه

على*بجدية*:هو ايه ده الــ ليه
ملك:قفلت بيبان العربية
على*بيعالى صوته*:ف ايه ياملك هو انا هخطفك يعنى ولا ايه!!
ملك*استغربت اوى م اسلوبه*:لا مش قصدى بس مابحبش الحركة دى انا
على*بعدم اهتمام*:حبيها!
ملك*بصتله*:على هو انت كويسة
على*باصص قصاده وكلمها بجدية*:اة

ملك*لقت نفسها ساكتة وماحبتش تتكلم كتير لحد ما وصلوا النادى وبدأوا يمشوا لقت ان معظم الناس مش موجودة وكان اليوم ده مفيش ناس كتير خالص ومش ده كان اليوم البيدربه فيه اصلا ,وبدأ على يدخلها م مبنى لمبنى لحد ما دخلوا المبنى البيدربوا فيه واول ما بصت لقيته فاضى جدا وكان وقتها على واقف مع سامى وكأنه بيقولوا حاجة ماكنتش سمعاها وشوية ولقت على دخل وقفل الباب بصتله بصدمة*:على هو ليه ماحدش غيرنا ف المكان ده
على*بنظرة خبث*:وانتى عايزة مين يكون غيرنا ف المكان

ملك*قلبها بدأ يدق اوى*:يعنى مفروض كنت باجى بنلاقى ناس وحتى لو مفيش حد الباب كان بيبقى مفتوح انت قافلته ليه؟
على*ابتسملها بخبث*:نفسى تبطلى الاسألة الكتير دى عشان كل حاجة هتعرفيها ف وقتها ودلوقتى وقتها
ملك*بستغراب*:دلوقتى وقت ايه؟
على*راح قفل الباب بالمفتاح*
ملك*م صدمتها فضلت واقفة ومبرقة وخايفة منه اووى*:على ف ايه!

على*بصلها جامد*:بصى بقى انا مصدقت ان يجى اليوم ده انا م اول ما شوفتك وانا عايز اليوم ده ييجى بفارغ الصبر واخيــرا جه ,فخليكى عاقلة كدا ومتتعبنيش معاكى
*ملك كانت بتسمع كلامو و مصدومة ومش مصدقة الكلام اللي بيقولوا ده وملامحه وشكله وكل حاجة اتغيرت خالص وبدأ يقرب منها كل ما تبعد يقرب وبدأ قلبها يدق بخوف لحد ما خبطت ف الحيطة ولقت على يحوطها بيده جامد ,كانت م اصعب اللحظات الـ بتمر عليها ف حياتها وحصــلت حاجة ايه هى هنعرف الحلقة الجاية ….  

بواسطة
الكاتبة فاطمة هشام
الوسوم

أبو إسلام الخطيب

مهتم بالشأن العربي ويتم ترجمة المقالت من وجهة نظر الغرب الي اللغة العربية

مقالات ذات صلة

اترك رد

زر الذهاب إلى الأعلى
إغلاق
إغلاق