قصص واقعية

رواية جسد بلا روح (الجزء السادس)

*وينزل خالد يروح لشليته الديما بيقعد معاهم ويشربوا مخدرات البيضيع فلوسه عليها وشوية وموبايله يرن يبص يشوف الاسم ومايردش فيتصل تانى يقوم قافل الموبايل*
عادل:ايه يا ابنى مابتردش ليه!

خالد:ياعم سيبك دى خلود
عادل*بستغراب*:ايه ده انتوا فركشتوا ولا ايه!
خالد:دى محتاجة سؤال طبعا ,فركشت
عادل:انت لحقت يا ابنى مش بقالكوا غير كام شهر
خالد:زهقت يا ابنى وكمان ف الكام شهر دى اتعلقت بيا جدا فوق ماتتصور وبقت خاتم ف صباعى وخرجنا وعيشنا يومين حلويين فخلاص بقى خدت وقتها

عادل:يا ابنى انت كل واحدة تخرج معاها شوية وتزهق كدا نفسى اعرف امتى هتستقر مع واحدة
خالد*وهو بيشرب السيجارة*:مفتكرش انى هستقر مع واحدة ف دول بص يا ابنى هقولك ع حاجة البنات دول نوعين نوع يتزهق منه ونوع تانى*ويفتكر ملك ,ويقول بشغف*:مايتزهقش منه ابدا !!
عادل:اهوه انا بقى نفسى تلاقى النوع التانى ده
خالد*ابتسم بخبث*:هو موجود بس للاسف بيتقل بس ع مين مسيرى اوصلوا ده انا خالد الجن
عادل*ضحك اوى*:ما المصيبة انى عارف انك جن!!

هيثم:احنا هنفضل نشرب ونضرب الدنيا كدا بالدماغ
عادل:يووووووه انت جى تفوقنا ولا ايه!
هيثم:ما احنا لزما نفوق احنا خلاص ناقصلنا سنة ونخلص هنفضل قاعدين كدا
خالد:الواد ده عنده حق
عادل:عنده حق ايه مش لما نخلص الاول نشوف هنعمل ايه!
هيثم:سيبوها عليا هفكرلكوا ف فوكيرة انما ايه اوعى
عادل:انا شايف انه لسه بدرى قدامنا سنة نعمل فيها ال احنا عايزينوا وبعديها نبقى نقرر بقى وكل حاجة بتيجى ف وقتها ولا ايه رأيك ياجن
خالد*وهو بيتخيل ملك*:صح كل حاجة بتيجى ف وقتها ,ومسيرها تيجى!!

*والوقت ده تكون ملك ف اوضتها ومنهارة م العياط وشوية وتلاقى الباب اتفتح عليها وتدخل صفاء*
صفاء*تبصلها وترميلها كيس فيه تلج*:خدى حطى ده ع وشك عشان يهدى شوية عشان ابوكى لو فكر يدخل يشوفك ,وحسك عينك تقوليلوا حاجة
ملك*الدموع نازلة ع خدها وبصالها وساكتة كانت حاسة وقتها انها شايفة واحدة تانية خالص مش دى الست العرفتها ف الاول وكانت بتتعامل معاها عرفت ان كل ده كان كدب ووش حنين بتضحك فيه عليها وع باباها بس قررت انها لزما تقول لباباها ومسكت كيس التلج ورميته ع الارض اول ما صفاء خرجت م الاوضة وشوية وسمعت صوت الباب بيتقفل*

صفاء*قعدت ف الصالة واول ما شافت ان مجدى جه فضلت تعيط*
مجدى*قرب ناحيتها*:ف ايه ياصفاء ملك حصلها حاجة؟
صفاء*اول ما سمعت الكلمة دى اضايقت اوى بس مالكت نفسها*:لا هى كويسة لكن انا المش كويسة يامجدى
مجدى:ليه ايه الحصل
صفاء:انا مش هخلف يامجدى مش هعرف اجبلك ولد يشيل اسمك
مجدى*بستغراب*:انتى روحتى للدكتور

صفاء:اة وهو القالى كدا انى صعب ف سنى ده اقدر احمل واولد هيبقى فيه خطر عليا وع ال ف بطنى واصلا احتمالية الحمل ضعيفة اوى
مجدى*قرب ناحيتها وطبطب عليها*:متزعليش ياصفاء الحمد لله ع كل شئ اكيد ربنا لى حكمة ف كدا ولزما نرضى بالربنا كاتبهولنا
صفاء*قربت منه وحضنته*:انا تعبانة اووى يامجدى ومضايقة متسبنيش خليك جمبى
*وف الوقت ده تكون ملك خارجة م الاوضة عشان تكلم باباها وتسمعوا وهو بيتكلم*

مجدى:عمرى ما هسيبك ياصفاء انتى بنى ادمه كويسة وكفاية انك قدرتى تحفظى ع بيتى وبنتى ف غيابى وانتى الشيلانى بصراحة انا اتعودت ع وجودك معانا وع مشركتك ف حياتى لكل حاجة *ومسك ايديها وباسها*:ربنا يخليكى ليا

ملك*اول ما سمعت كلام باباها اتصدمت ولقت نفسها بترجع خطواتها لواره لحد ما وصلت لاوضتها وقفلت ع نفسها الباب وفضلت تعيط ومسكت كيس التلج وفضلت تحطوا ع خدودها الورمة ماكنتش حاسة بألم لكن الالم الحقيقى كان جواها وانها مش قادرة تتكلم وحاسة انها ممكن تهد حاجات كتير بكلامها ده ,فقررت السكوت وانها تستحمل حياتها والواقع العايشة فيه وتسيبها ع ربنا لانه الوحيد القادر يغير حياتها للاحسن ويدبر امورها*
مجدى:انا هقوم اشوف ملك

صفاء*اتوترت وخافت يروح يشوفوها ويلاقى ال ف خدها ده*:مجدى انا دايخة اوى وصلنى للاوضة
مجدى*ساندها ودخلها الاوضة ولسه هيمشى*
صفاء*مسكت ايده جامد وقالت بتعب*:متسبنيش خليك معايا انا بجد محتجالك النهاردة اوى
مجدى:بس انا ماشوفتش ملك النهاردة

صفاء*بدموع مزيفة*:ارجوك خليك معايا انا بجد مضايقة اوى انى مش هقدر اجبلك ولد
مجدى:ع فكرة انا ما كنش هيفرق معايا ولد ولا بنت كل ال ربنا كان هيجيبوا كويس وكمان ياستى ربنا يخليلنا ملك وخالد ,اعتبريهم عيالك المشلتهاش بطنك
صفاء:يعنى انت مش مضايق

مجدى*ابتسم*:ابدا انا اهم حاجة عندى انكوا بخير ,وبالنسبة ان ربنا مش هيكرمنا با اطفال انا راضى
صفاء*لنفسها بس كان نفسى اجيب ولد منك عشان اخد النص ف الميراث ,بنتك دى محظوظة اووى ,وبصتله بدلع*:طب عشان خاطرى خليك جمبى يامجدى وكمان ملك تلاقيها نامت عشان مدرستها الصبح
مجدى*لقاها بتترجى وحس انها فعلا تعبانة وقال ان ملك ممكن تكون نامت فعلا فبلاش يقلقها*:طب خلاص انا معاكى اهوه

*فرحت صفاء انها خليته ميشوفهاش وفعلا بعديها مجدى يشوف ملك ويبقى اثار الضرب راح م وشها وميحسش بأى حاجة خصوصا انها محبتش تبين انها مضايقة وطبعا لما شافوا كدا عرفوا ان ملك عمرها ماهتكلم اوهتقول اى حاجة بتحصل م طيبتها بس وقتها كانوا شايفينها ساذجتها وف يوم تكون ف اوضتها وتسمع صفاء بتزعق*
صفاء:ياخـــــــالد خـــــــــــــــالد

خالد*خارج م الاوضة*:ايه ف ايه
صفاء:مش قولتلك 100مرة مادام بتشرب البتاع ده ف الحمام تبقى تعطر بمعطر وانت خارج انت عايز مجدى يشم ويعرف انك بتشرب حشيش
خالد:بنسى ياصفاء فيها ايه يعنى
صفاء:لا متنساش عشان لوشم وعرف ان ده نيلة حشيش هيبهدل الدنيا وكمان ما انت عندك اوضتك اشرب فيها ال انت عايزه حبكت يعنى
خالد:لا ده بيبقى ليها مزاج تانى وكمان خلاص ياستى مش هنسى تانى
صفاء:خالد متوديناش ف داهيه وحياه اهلك ,مش ناقصيين وجع دماغ

*ملك اول ما سمعت الكلام ده حطت ايديها ع بؤها م الصدمة ,كانت فعلا ساعات بتلاحظ دخان وريحة غريبة بس ماكنتش عارفة ايه ده! والسمعته ده خوفها اكتر منه*وبدأت ملك تفتكر كل ده وبصت لمهند*
ملك:طبعا مستغربتش كتير ان واحد زى ده مش بعيد يكون بيشرب اى نوع م المخدرات بس الصدمنى اكتر اخته انها عارفة ده وساكتة حسيت وقتها انها مش بس مش خايفة عليا دى حتى مش خايفة عليه ,هى مش هممها غير نفسها وبس وف يوم كنت راجعة م الدرس وماكنش فيه حد ف البيت ولسه هدخل اوضتى لقيتها مقفولة بالمفتاح ولقيته خارج م اوضته وف ايده المفتاح و.. *لسه هتكمل لقت موبايل مهند بيرن ,مهند اول ما شاف رقم مامته بص وسكت*
مهند:ها كملى

ملك:انا حاسة انى تعبانة مش قادرة اكمل وبصراحة تعبت كمان م كتر الكلام وعايزة اروح استريح شوية
مهند*بصلها وابتسم*:ماشى ال تشوفيه!
ملك:ممكن اطلب منك طلب؟؟
مهند:اكيد طبعا اطلبى ال انتى عيزاه
ملك:مش عايزة حد يعرف انى اتكلمت معاك ممكن ,حاسة انى مش عايزة اتكلم مع حد غيرك او احكى الجوايا غير ليك انت بس

مهند*ابتسم اوى وفرح لكلامها*:حاضر ,انا هخرجلهم واقول انى حاولت اخليكى تتكلمى وانتى رافضة ده وهجيبك الجلسة الجاية احاول معاكى تانى
ملك*بتمسح دموعها وحركت راسها بنعم انها موافقة ع كلاموا*
مهند:عن اذنك *واول ما خرج*

ملك*قامت م ع الشيزلونج وقربت ناحية الباندا ومسكته وايديها بتترعش*:بكرهك اوى عشان الوقت الدخلت فيه حياتى هما كمان دخلوا فيها ياريتك ما دخلتها ولا هما دخلوها يـــــــــــاريت*ورمته ملك ع الارض بعيد عنها*
مهند*خرج لرؤوف ورحمة*:انا اسف جدا يافندم انا حاولت اخليها تتكلم بس معرفتش
رحمة*بضيق واستغراب*:ياسلام يعنى ايه اومال الساعات دى كلها كنت بتعمل ايه!
مهند:كنت بحاول معاها اخليها تتكلم تنفعل بس ملقتش اى رد فعل
رحمة:اومال انت دكتور ازاى يعنى!!

رؤوف*بص لبنته بلوم*:بس يارحمة ايه الكلام ده
مهند*طلعلها البطاقة*:اهوه دى المهنة ال ف البطاقة *وقال بهزار*:بعيدا عن شكلى طبعا
رؤوف*ابتسم لكلاموا*ورحمة رغم ان هزاره ضحكها بس تمالكت نفسها*
مهند:عموما انها بدأت تنفعل لكل حاجة حاوليها ده كويس ومتهيائلى ان دى خطوه مفيش دكتور غيرى قدر يعملها ولا ايه!
رؤوف:عندك حق طبعا

رحمة*بتنهيدة*:ماشى
مهند:متنسوش ارجوكوا ميعادنا يوم الاربع الجى ف نفس الميعاد هستناها
رؤوف:بأذن الله يادكتور *ودخلوا المكتب وخده ملك وروحت البيت وفعلا متكلمتش مع اى حد ودخلت اوضتها العالم بتاعها وفضلت تعيط حست انها كل ماترجع بذكرياتها تلاقى حاجات بتتعبها وتوجعها بس كانت لزما تعمل كدا يمكن دى حاجة هتريحها بعد كدا وراحت ف النوم*الوقت ده يكون مهند وصل البيت ولسه هيفتح باب الشقة*
سلوى*تكون فتحته*:نورتى ياميرفت
ميرفت:ده نورك ياحبيبتى

مهند:انا اسف جدا والله بجد
سلوى*كانت مضايقة بس حاولت متبينش ده*:ما لسه بدرى
مهند:كان عندى حالة مهمة اوى
ميرفت*ابتسمت*:اة مامتك قالتلنا بس ماشاء الله عليك يادكتور اتغيرت خالص
مهند*ابتسم*:اة الزمن ياما بيغير
ميرفت:دى نرمين بنتى
نرمين*بكسوف*:ازيك يادكتور
مهند:الحمد لله ,طب ما تتفضلوا معانا

ميرفت:لا خلاص بقى الوقت اتأخر يوم تانى ان شاء الله تكون فاضى فيه
مهند*بهزار*:يبقى مش هنتقابل تانى
سلوى*بصتله جامد*
مهند:قصدى ايامى كلها مشغول فيها بس طبعا تنورونا ياطنط انتى ونرمين ف اى وقت
*وسلموا عليهم وبعد كدا دخل مهند وسلوى الشقة*
سلوى:ينفع العاملته ده
مهند:عملت ايه بس ياست الكل

سلوى:تخلينى ف نص هدومى الناس مستنيين م الصبح
مهند:ياماما ما انتى عارفة انى كان معايا حالة ملك
سلوى:يوووووه بـــــــــــــرده هتقولى ملك
مهند:ماما ملك اتكلمت وبتحكيلى كل حاجة انتى عارفة ان ليها حق توصل لحالتها دى الشافته ماكنش قليل وياعالم شافت ايه تانى ف حياتها
سلوى:ياسلام وشافت ايه!

مهند:للاسف ياماما شافت سنين صعبة اووى اصلا ف كلامها وقفتنى عند اهم جزء ده انا نفسى اعرف اووووى ايه الحصلها تانى
سلوى*استغربت بأهتمام ابنها ليها*:انت بقى هتسيب نفسك كدا وهتقعد تسمع لحكاية ملك
مهند*بتنهيدة*:ياماما ملك بالنسبة ليا حالة خاصة اول مرة تعدى عليا وبصراحة نفسى اوى اعرف ايه الحصل ليها ف حياتها *وسكت شوية*:بصى ياماما انا هريحك وهريح نفسى مش انتى عيزانى اتجوز
سلوى:اة طبعا اومال انا بعمل كل ده ليه عشان افرح بيك

مهند:انا اوعدك اول ما اخلص حالة ملك دى هتجوز
سلوى*بعدم فهم*:يعنى ايه! هو انت عجبتك نرمين ولا ايه!
مهند:نرمين مين! لا طبعا مش نرمين *وفكر شوية*:ياماما مش ده كل الهمك انا بقى ان شاء الله اليوم الهخلص فيه حالة ملك هاجى اقولك انا هتجوز مين ,,بس ادعيلى بس ياست الكل وادعى ان ملك تبقى كويسة وتخرج م حالتها دى بأسرع وقت *وباس راسها ودخل اوضته*

سلوى*فضلت بصالوا ومافهمتش قصده وماكنتش عارفة قصده ع مين بالظبط بس قالت تحاول تستحمل الفترة دى لما تشوف اخرتها معاه ايه*
مهند*دخل اوضته وفضل يفكر ف ملك وف حالتها كان حاسس انها صعبانة عليه اوى م الشافته وانه فعلا صعب عليها العاشيتوا كل ده بس شاف اكتر انها غلطانة انها استحملت كل ده ومتكلمتش ف ولا مرة وقالت ع الجواها بس يمكن عشان ماكنش فيه حد جمبها حد يقويها حد يديها الجرائة انها تواجه كل ده بسهولة ومتخافش ,ولقه نفسه بيفكر ف اخر جزء هى قالتهولوا ياترى ايه الحصلها اليوم ده وخالد عمل معاها ايه!! وياترى استغل عدم وجود حد ف الشقة وفضلت تجيلوا افكار كتير لحد ما هو كمان راح ف النوم ,,وتعــــــدى ايام وينشغل مهند ف حالات تانية بتاعت الاسبوع ويستنى اليوم الهتيجى فيه تانى وفعلا تيجى ف ميعادها وتبدأ الجلسة بتاعتهم*:ها عاملة ايه النهاردة
ملك:الحمد لله

مهند*ابتسم*:طيب نرجع بقى للجزء الوقنا عنده المرة الفاتت ها قوليلى ايه الحصل اليوم ده لما كنتى لوحدك ف الشقة واكتشفتى ان خالد بس هو الموجود
ملك*رجعت تفتكر وتتخيل المشهد كأنه بيحصل قصادها*:كنت خايفة اووى ومرعوبة خصوصا انه اوضته كان جواها دخان وريحة غريبة فهمت وقتها انه كان بيشرب وانه مش ف وعيه,,فـــــلاش بـــاك
ملك*بصت حواليها ملقتش حد ف الشقة حاولت تفتح الباب تانى معرفتش وشوية وخالد خرج م الاوضة وف ايده المفتاح*
خالد*بصلها بخبث*:جربتى بقى الاحساس بتاعى انى بحاول افتح الباب ومش عارف
ملك*بصتله واضايقت اوى*:خالد انت القافل الباب

خالد:اة انا عرفتى بقى انها حركة تضايق ,انا عايز اعرف انتى ليه بقيتى تعملى كدا ما انتى كنتى بتسبيه عادى زمان ,فاكــرة
ملك*اتخنقت م كلاموا*:لو سمحت هات المفتاح!!
خالد*بصلها نظرة جريئة ورمة المفتاح ع السرير بتاعوا جوه اوضته*:لو عايزة المفتاح ادخلى هاتيه؟
ملك*اول ما شافت كدا خافت اووى وماكنتش عارفة تعمل ايه*
خالد*ابتسملها بخبث*:ايه مكسوفة عشان انا واقف ,خلاص هدخل استناكى جوه *ودخل وقفل الباب ,ملك ساعتها كانت مصدومة م كلاموا واسلوبه معاها ,وفضل خالد مستنيها عشان تدخل مدخلتش او حتى تخبط ع الباب بتاعه ومعملتش ده قام بسرعة وفتح الباب وفضل يدورعليها ف الشقة كلها ومش لاقاها ,اضايق اوى وقال والشر ف عنيه*:ماشى ياملك ,مسيرى اجيبك

ملك*اول ما لقت كدا جريت بسرعة برة الشقة خرجت ودموعها ع خدها ماكنتش عارفة هى راحة فين وفضلت تلف شوية وتتمشى بالساعات ولا حست بالوقت وشوية ولقت موبايلها بيرن وكان باباها ردت عليه*:الو يابابا
مجدى:انتى فين ياملك ,واتاخرتى كدا ليه!
ملك:معلش يابابا انا مع واحدة صاحبتى وجاية حالا
مجدى:ياحبيبتى قلقت عليكى اول مرة تتأخرى كدا تعالى بسرعة انا مستنيكى

ملك:حاضر *وروحت ملك البيت ولقت باباها قاعد وجمبه صفاء وخالد*:انا اسفة يابابا ع التأخير بس واحدة صاحبتى كانت محتاجة ملازم منى فكنا بنصورها
مجدى*ابتسم*:قلقتينى عليكى ياملك ,ماشى ياحبيبتى يلا روحى غيرى هدومك وتعالى عشان نتعشى
ملك*بصت ع صفاء وخالد*:لا يابابا انا مليش نفس
مجدى:لا هتاكلى عشان كمان عندى ليكى مفجأه
ملك*بستغراب*:ايه هى!
مجدى:هنكلم خالك رؤوف

ملك*اول ما سمعت كدا اتبسطت اوى وحست انه وحشها هو ورحمة ومحمد ومنى*:يــــــــــاريت يابابا نكلمهم ونسافرلهم كمان
مجدى:صعب موضوع السفر ده بس هنكلمهم وهخليكى تكلمى رحمة اخر مرة لما اتكلمنا سوى قالى انى رحمة عايزة تكلمك
ملك*اتبسطت اوى*:وانا كمان دى وحشاانى جدا
خالد*بصلهم*:هى مين رحمة دى!
مجدى:دى بنت خال ملك بس هما عايشين ف اسكندرية مش هنا للاسف

خالد:اة فعلا للاسف كان نفسى اشوفهم
ملك*بصتله بأرف وفهمت نيته وقالت لنفسها: ده الحمد لله انها مش عايشة هنا ماكنتش هتترحم م تحت ايديك*
صفاء:انتى هتفضلى واقفة كدا يلا روحى غيرى
ملك:بس الاوضة *ولسه هتكلم*
خالد*بصلها جامد*:مالها اوضتك ماهى موجودة بمفتحها ولا يمكن حد غيرها ولا حاجة
ملك*فهمت قصده انه حط المفتاح ,ودخلت اوضتها وغيرت هدومها وقاعدوا ياكلوا وبعد ما خلصوا مجدى اتصل برؤوف*

رؤوف:الو ,ازيك يامجدى عامل ايه!
مجدى:الحمد لله وانتوا عاملين ايه!
رؤوف:الحمدلله ,ملك فين عايز اكلمها
ملك*خدت الموبايل م باباها*:الو ياخالو
رؤوف:الو ياحبيبتى وحشانى ياملك والله انا عارف انى مقصر معاكى بس صدقينى يابنتى غصبن عنى
ملك:لا ياخالو ولا يهمك انت كمان وحشنى اوى بجد ,رحمة ازيها ومحمد وطنط منى
رؤوف:كلنا كويسين ياحبيبتى طنط منى كانت عايزة تكلمك ,خدى هى معاكى اهيه!
منى:الو ياملوكة ازيك

ملك:الحمد لله ياطنط انا كويسة
منى:وحشانا ياحبيبتى والله مش هنشوفك بقى
ملك:للاسف شغل بابا بيخلينا منعرفش نسافر بس والله انتوا وحشنى اوى هى رحمة فين
منى:قاعدة مع نهى ف اوضتها هروح اديها الموبايل *وف الوقت ده محمد خارج م الاوضة*
محمد:ياماما حضرتيلى الفلوس عشان على مستنينى تحت
منى:روح قول لابوك هو معاه الفلوس *ووصلت اوضة رحمة*

نهى:غلط يا بنتى المسألة ال انتى كتباها دى
رحمة:بقولك ايه انا مش فاهماها اصلا ,واتحلت كدا يبقى خلاص
نهى*بتشد ف شعرها منها*:هو ايه الخلاص هتجننينى والله
منى*دخلت الاوضة عليهم*:خدى يارحمة ملك عايزة تكلمك
رحمة*بفرحة*:ملك هاتيها بسرعة *وكلمتها*:ملك ازيك
ملك*فرحت اوى*:انا كويسة ازيك يارحمة وحشانى اووى
رحمة:وانتى كمان والله انا نفسى اشوفك بجد عايزة نقعد نلعب ونهزر زى زمان فكره

ملك*الدموع ف عنيها*:طبعا فكرة والله الايام دى المصبرانى ع .. *ولسه هتكلم لحظت ان صفاء وخالد ومجدى حاوليها*:المهم انا مبسوطة اوى انى كلمتك
رحمة:وانا كمان وهتبسط اكتر لو جيتى تزورينا
ملك*بتنهيدة*:صعب اوى يارحمة بس ان شاء الله هنتقابل
رحمة:يــــــــــاريت ياملك
ملك:طب انا هقفل بقى ,وهكلمكوا ف وقت تانى
رحمة:هستناكى اكيد هنتكلم تانى *وقفلت معاها*:يــــــــــــــاه ياملك

نهى:هى دى بنت عمتك ال بتكلمينى عنها
رحمة*ابتسمت*:اة وحشتنى اوى بقالى سنين ماشوفتهاش ,ع فكرة لو شوفتيها هتحبيها طيبة وحنينة اوى
نهى:هى هتيجى
رحمة:للاسف باباها بيبقى عنده شغل ومبتعرفش تيجى خالص ,بس والله نفسى اشوفها اكيد شكلها اتغير عن زمان
نهى:اكيد ,عموما يلا نركز بقى ف المادة دى خلينا نخلص
*وف الوقت ده رؤوف بيتكلم مع محمد*
رؤوف:خد ياسيدى فلوس اهيه!

محمد:ايوه بقى تسلملى يا ابويا ,يلا هنزل بقى عشان لو اتأخرت اكتر م كدا على هيشعلقنى *ونزل محمد لعلى*
على*كان واقف ساعتها وبيشرب سيجارته وبيبص ع بنات ماشية*
محمد:عيــــــــــنك يا ابنى!
على*ابتسم*:لعلمك مش حلويين
محمد:اة ما واضح ,عشان كدا راسك هتتلوح
على:مترغيش كتيرها هنروح فين
محمد:هو احنا لينا غيره المكان بتاعنا

على:طب يلا قدامى ياخويا يلا
*وراحوا الكافيه الخاص بيهم ال م ساعة ما بقوا اصحاب بيروحوا ,,ملك بعد ماخلصت المكالمة الدموع نزلت ع خدها افتكرت وقت ما كانت مبسوطة وفرحانة ووجود مامتها معاها وكانت عايشة طفولتها صح قبل ما يشوهها خالد واخته ,باباها لما شاف كدا افتكر انها مبسوطة انها اتكلمت مع خالها ,واستأذنت ودخلت عالمها وفضلت تفتكر كل لحظة حلوه مرت عليها زمان واشتاقت لمامتها اوى وبصت لسما وفضلت تكلمها ولسه هتنام ع سريرها حصلت حاجة ايه هى هنعرف الحلقة الجـــــــاية….

بواسطة
الكاتبة فاطمة هشام
الوسوم

أبو إسلام الخطيب

مهتم بالشأن العربي ويتم ترجمة المقالت من وجهة نظر الغرب الي اللغة العربية

مقالات ذات صلة

اترك رد

زر الذهاب إلى الأعلى
إغلاق
إغلاق