قصص وروايات

رواية جسد بلا روح (الجزء التاسع عشر)

*بعد ما ملك كانت قربت تحس بالامان م ناحيته حصلت حاجة خليتها مصدومة ومش عارفة تفكر واول ما راحوا مكان التدريب بتاعهم وبقوا سوى لقت على بيعمل حركات غريبة*
على*بيقرب منها وبيحاول يمسكها*
ملك*بخوف والدموع ف عنيها*:على متعملش كدا ارجووك

على*بصلها*:لزما اعمل كدا *ولسه هيقرب منها ملك مسكت دراعه ولويته وقامت بعداه عنها ووقع على ع الارض واتخبط جامد*
ملك*طلعت تجرى بسرعة وكانت خايفة منه ومش قادرة تصدق ان هو ده على وان هى دى نيته وقربت ناحية الباب ولسه هتفتحه بالمفتاح لقيته مفتوح استغربت اوى بس برده خرجت برة الاوضة وشوية وسمعت صوته بيندهلها*
على*كان واقع ع الارض وماسك دراعه*:مــــــــــــــــــلك ,مــــــــــــــــــــــــــلك

ملك*حاولت تهدى شوية وبصت وراها لقيته واقع ع الارض ومش قادر يتحرك وماسك دراعه ,بصتله بستغراب ودخلت الاوضة تانى وقربت ناحيته بحذر*:انت ليه عملت كدا؟
على*ابتسم رغم كان حاسس بألم ف دراعه*:عشان اعرف كنتى هتعملى ايه لو اتحيطى ف موقف زى ده وكمان انا كنت كتير بحاول اقولك اضربينى وانتى كنتى بتتعاملى بحذر وخوف و انا ماكنتش عايز ده ,كنت عايزك ع طبيعتك
ملك*فضل قلبها يدق جامد وماكنتش عارفة تصدقوا ولا لا*

على*ابتسملها*:شكلك حلو وانتى مش مصدقة كدا وكمان تفتكرى انا لو عايز اعمل حاجة زى كدا هجيبك هنا؟
ملك*بصتله*:اومال كنت بتقول ايه لعم سامى *واول ما خلصت الجملة*
سامى*خبط ع الباب ودخل وف ايده كوبايتين شاى*:اتفضل يا كابتن انا عملتهم بنفسى
على:شكرا يا عم سامى
سامى*بخضة*:مالك ياكابتن ف حاجة حصلت

على:لا مافيش ده جزء م التدريب ,بس انا كويس الحمد لله
سامى*ابتسم*:طيب عن اذنكم
ملك*بصت ع كل ده وفضلت ساكتة وهديت شوية وفهمت الموقف الـ هى كانت فيه وقربت اكتر ناحيته*:انت كويس
على*بيمسك دراعه بألم*:بصراحة انا اة كنت عايزك تقومينى بس مش لدرجة تكسريلى ايدى
ملك*ابتسمت ابتسامة صغيرة*:انـــــــــا اســــــــــفة
على:لا طبعا متعتذريش دى حاجة كنتى لزما تعمليها ,وياريت تسندينى عشان وانا نايم النومة دى مش مريحة حاسس زى عروسة البحر وهى نايمة ع الشط

ملك*ابتسمت قربت منه وعدليته وقعد ع الارض وسند ضهره ع الحيطة الوراه*
على:بس انا مبسوط منك كدا بقى اقدر اطمن عليكى ,هى دى تلميذتى ,تدريبتى نفعت الحمد لله
ملك*ابتسمت*:بجـــد يعنى ده كويس!!
على:انتى شايفة ايه ولا لزما اموت قدامك عشان تصدقى
ملك:لا بعد الشر عليك
على*بصلها وقال بحنية*:هتزعلى لو جرالى حاجة

ملك*بصتله واستغربت وقتها م سؤاله ونبرة صوته*:اكيد طبعا مش احنا اصحاب
على*ابتسم*:صح اصحاب *وفضلوا قاعديين يتكلموا مع بعض وف الوقت ده كانت نهى ورحمة قاعديين مع بعض بيزاكروا*
نهى:فينك ياملك بجد الجزء ده صعب
رحمة:انا مش عارفة على اصر يروح ليه النهاردة خصوصا ان الجو مش قد كدا واحتمال يمطر
نهى:اهوه تدريبات بقى

رحمة:تفتكرى هنسمع حاجة قريب عن موضوعهم
نهى*ابتسمت*:بصراحة انا اول مرة اشوف على اخويا كدا واهتمامه بملك كل يوم بيزيد ,بس لو ده حصل افرح والله ,هو احنا هنلاقى زى ملك
رحمة:قصدك انتوا تطولوا
نهى:اجرى اجرى انتوا التطــــولوا ياحبيبتى
رحمة*بهزار*:بصراحة مفيش زى طول اخوكى

محمد*جاى م برة وكان فرحان اوى*:على فين ,يـــــاعـــــــلى ياعـــــــــلى
نهى:على مش هنا مع ملك ف النادى ,مالك جاى فرحان كدا ليه
محمد:اتقابلنا ف البنك وهنشتغل فيه بعد اجازة نص السنة
رحمة*بفرحة*:بجد مبـــــــــــــــروك ايوه بقى هيبقى كدا فرحتين فرحة جوازك انت ونهى وفرحة شغلوكوا
نهى:مبروك ياحبيبى ,وان شاء الله يبقوا3 فرحات *وبصت لرحمة وضحكوا هما الاتنين سوى ,عشان كانت فاهمة قصدها*ف الوقت ده ملك قاعدة مع على وجايبة تلجة حطاها ع دراعه*

ملك*بصدمة*:انا مش قادرة اصدق انى عملت فيك كدا
على:لا صدقى بقيتى مفترية
ملك:مش عارفة افرح ولا ازعل
على:افرحى طبعا ,بس ازعلى عليا مش هعرف ادرب تانى
ملك*بهزار*:انت هتمثل مش لدرجة دى ع فكرة انا مش شمشون الجبار يعنى
على:شمشون الجبار! ده قديمة اوى الكلمة دى

ملك*ضحكت وبعد كدا بصتله*:بس ممكن متعملش كدا تانى بجد خوفت منك اووى وخوفت انك تكون عايز تعملى حاجة *وبدأت ملامح الحزن ع وشها*:انا مصدقت ان لقيت شخص باصصلى كملك مش عشان *ولسه هتكمل*
على*ابتسم*:بصى ياملك انا زى اى شاب ببص ع البنات وبعاكسهم وافكارى زى افكارهم مش هقولك انى الواد المحترم المؤدب العمره ما عمل اى حاجة ,لكن الحاجة الوحيدة العمرى ف حياتى ما عملتها ولا هعملها ,انى أاذى بنت ,حتى كأرتباط انا مرتبطش ولا مرة

ملك*بصتله بستغراب*:ده بجــــــــد
على:انا عارف انك مش هتصدقى بس والله بجد اة مانكرش انى كنت بعجب بــبنات وعندى صداقة مع بنات لكن عمرى ما فكرت ارتبط بيهم اول حاجة عشان ربنا تانى حاجة عشان نفسى تالت حاجة عشان كنت حاطت ديما قصادى اختى الهعملوا مع اى واحدة ممكن يحصلها وانا بخاف ع نهى اوى واخاف ان اى حاجة بسوء تمسها ,وحتى لو نهى ماجراش ليها حاجة كنت حاطت ديما قدامى امى مراتى بنتى ,اى حد قريب ليا ممكن كان يجرالوا حاجة بسببى وانا ماحبتش ده

ملك*بصتله وابتسمت*:يــــــــــاريت كلهم يعملوا زيك ,صدقنى حاجات كتير ساعتها هتتغير اوووى
على*بتنهيدة*:صعب!! بس رغم كدا انا مش مثالى برده ع فكرة
ملك*بتحرك راسها بنعم*:عارفــة
على:بس واد جدع واعجبك اووى وحليوه وكل البنات بتجرى ورايا
ملك*ضحكت*:شكلى هكسر دراعك التانى عشان النصب ده

على:لا يامفترية كدا يبقى حرام عليكى بجد ,ها تحبى نمشى
ملك:اة يلا خصوصا ان مش هينفع ندرب وكمان ده مش يوم التدريب الاساسى
على*ابتسم*:صح يلا بينا
ملك:بس هتعرف تسوق
على*بيحرك دراعه*:اة خلاص الحمد لله بقت احسن ,اسبقينى بقى وانا جى وراكى

ملك*ابتسمت*:حاضر *وخرجت ملك لقت الجو بيمطر فرحت اوى كانت حابة المنظر ده ولقت نفسها نزلت تحت المطر وكان فيه حفر فيها ماية قعدت تدوس عليها وتلعب زى الاطفال ,على خرج وبيدورعليها لقاها بتعمل كدا وقف يبصلها ومبتسم اوى وبيراقب حركاتها وتصرفتها الطفولية والبريئة كان اول مرة يشوفها مبسوطة وفرحانة اوى كدا ,اول ما ملك خدت بالها منه شاورتلوا عشان ييجى*
على*ابتسم وراح وفضلوا هما الاتنين يلعبوا تحت المطر كأنهم لسه ف سنهم الصغير وكانت م اللحظة دى ابتدت اسعد لحظات حياتهم*

*وف الوقت ده يكون خالد بيفتح باب الشقة*
خالد:صفــــاء انتــى فين
صفاء*تخرج م الاوضة وتلاقيه تجرى تحضنه وتكون مبسوطة*:خالد حبيبى وحشتنى اووى يا خالد
خالد*ابتسملها*:وانتى كمان وحشانى والبيت كمان وحشنى اوى
صفاء:انت مش قولت هتيجى بعد اسبوعين ازااى جيت دلوقتى

خالد:بصراحة مقدرتش استنى قولت لزما اجى ,وكمان انتى مش عيزانى ولا ايه امشى تانى
صفاء*بفرحة*:تمشى ايه ده انا ماصدقت انك جيت كنت وحشنى اوى يا خالد والله ,البيت كان وحش م غيرك
خالد*وهو بيدور بعيونه ع ملك وقال بخبث*:ليه وملك فين ,اكيد منوراه
صفاء:بلا نيلة ,هى اصلا مش موجودة وحتى لو موجودة ما انت عارفها عيلة بروطة ف نفسها كدا
خالد*بصدمة*:ليه راحت فين!

صفاء:انت نسيت ولا ايه عند خالها ما انا قيلالك لما كنت بتسألنى عليها
خالد:اة بس انتى قولتى بتيجى كل فترة
صفاء:لا دلوقتى احنا الهنروحلها
خالد:هنروحلها فين؟
صفاء:عند خالها اصل ابن خالها ده هيجوز ف هنروح نقضى اسبوع هناك ,بقولك ايه هحكيلك ع كل حاجة بس ادخل غير هدومك وانا هحضرلك حاجة تاكولها وهسهرك سهرة العمر

خالد:ماشى *واتحرك وقبل ما يدخل اوضته قرب ناحية اوضة ملك وفتحها وفضل باصص علي الاوضة وبيتخيل ملك ف كل مكان وقرب ناحية السرير بتاعها وميل عليه كأنه بيشم ريحتها وقال بنظرة كلها خبث*:اخيـــرا جتلك ياملك ومش هسيبك ابــــــدا
*فلحظة دى ملك كانت ف العربية مع على وبعد ما كانت مبسوطة فجأه حست برعشة ف جسمها وقلبها بيدق جامد*
على:مالك ف ايه!

ملك*بتحضن جسمها بأيديها*:مش عارفة حاسة ان جسمى كله بيترعش م جوه كمان مش برة بـــــس ,احساس غريب اوى
على*مد ايده وجاب الجاكيت بتاعه م الكرسى الواره*:خدى البسى ده عليكى اكيد جالك برد م الجنان الــ احنا عملناه م شوية ,بس عارفة كنت مبسوط اوى وانا شايفك مبسوطة كدا
ملك*ابتسمت ابتسامة صغيرة*:ايدك عاملة ايه دلوقتى
على:كويسة ,ما تقلقيش
ملك:على هو انا ممكن اسألك سؤال

على:اكيد طبعا اسألى
ملك:هو انت كنت واقف مع وائل ليه يوم ماجتلنا الجامعة
على*بيحاول يفتكر*:وائل مين!! *وسكت شوية*:اةةة وائل ,ده انا عارفه عن طريق الشغل بتاعى ولما شوفته سلمنا ع بعض وموقفناش كتير لقيته مستعجبل كدا تقريبا كان وراه حاجة فيدوب سلمت عليه ومشى ,بس بتسألى ليه عليه!!
ملك*بحزن*:انت تعرف ان وائل ده صاحب ماهر
على*فرمل العربية وبص لملك*:انتى بتتكلمى بجد!

ملك*بتحرك راسها بنعم*:ده الــ اكتشفتوا وانهم هما الاتنين عملوا عليا تمثلية عشان اصدق ماهر ويقرب منى عشان يوصل لغرضه ,ومش بعيد كان بيساعده ف اليوم الخطفنى فيه وياعالم كان هيعمل ايه تانى
على*اضايق اوى لما سمع كدا*:طب لما اشوفه ,انا ماكنتش اعرف والله ياملك
ملك*ابتسمت*:مصدقاك طبعا,بس قولت اقولك عشان احنا متفقين نقول لبعض كل حاجة ,وممكن تسوق عشان ما تخدش مخالفة

على*حس انه مضايق لما سمع كدا وكان نفسه يقابل وائل تانى ماكنش عارف ساعتها ممكن يعمل ف ايه!*
*وفضلوا ماشيين طول الطريق ساكتين لحد ما وصلوا وطلعوا سوى وخبطت ملك واول ما الباب اتفتح*
رحمة*بصدمة*:ايه ده ,ايه الماية البتنقط منكوا دى
على:بنت عمتك ياستى ,حبت تجنن ,اسيبها لوحدها يعنى
رحمة*ضحكت اوى*:لا ازاى تجنن معاها طبعا

نهى:شكلكم تحفة بجد ,استنوا هصوركوا *وطلعت الموبايل ,وفضلوا ملك وعلى يعملوا حركات ف الصور*
محمد*خارج م اوضة*:مبــــــــروك ياعلى
على*بستغراب*:مبروك ع ايه!
محمد:اخيرا هنشتغل ف البنك *وحضنه وخبط ع ايده*
على*بألم*:براحة ياعم
نهى:ف ايه مال دراعك

على*بص لملك*:مفيش جالى شد عضلى *وبعديها بص لمحمد*:بس انت عرفت منين
محمد:جالى الجواب وقريته ,اخيــرا بقى هنشتغل والشغلانة الــ نفسنا فيها
منى:مبروك ياولاد ,الف مبروك
على:الله يبارك فيكى ياطنط
منى:ده لما رؤوف ييجى هيفرح اوى *وشوية ودخل رؤوف*

رؤوف*بص ع ملك وعلى*:ايه ده ايه العمل فيكوا كدا
محمد:يابابا مش مهم المهم دلوقتى ان انا وعلى هنشتغل ف البنك سوى
رؤوف*بفرحة*:بجد يـــــــــاه ,الف مبروك ياولاد ,والله فرحتلكوا جدا مش قولتلكوا اصبروا هتوصلوا للـ انتوا عايزينه
على:صح ,,والله يبارك فيك ياعمو
منى:كدا بقى الفرحة فرحتين *وبصت ل ملك*:وشك حلو عليهم ياملك م زمان ونفسهم ف الشغل ده
ملك*بصت لعلى وابتسمت ,وهو بصلها وفجأه عطسوا هما الاتنين ف نفس الوقت*

منى:غيروا هدومكوا بسرعة بقى عشان اكيد هيجيلكوا برد جامد
*ودخلت ملك تغير هدومها وكانت مبسوطة اووى وحست ان على طلع مش زى ما هى فاكرة خالص وانه كويس ومحترم وطيب ,وحمدت ربنا ان اليوم ده عدى ع خير وان محصلهاش اى حاجة وحشة واضايقت م الحصل ف دراعه بس حست وقتها انها طلعت كل الجواها وكل الدفاع الكانت نفسها م زمان تدافعوا عن نفسها وانبسطت انها قدرت تقاوم ,على دخل وغير هدومه وكان مبسوط اوى بملك وانها قدرت تدافع عن نفسها وطول الوقت بيتخيل ملامحها وشكلها وهى بتلعب تحت المطر وحس قد ايه انها بنى ادمه بريئة اوى حتى ف تصرفتها وافعالها ,وتعــــــــدى ايــــام وتبتدى الامتحانات وتكون ملك مشغولة فيها اوى وماكنوش بيروحوا للتدريب خالص*
خالد*كان الوقت ده قاعد مع شلة اخته وعمال يشرب*:حلو اوى الصنف ده

فتحى:اى خدعة ,بس لعلمك ده غالى اووى ,ومابيطلعش لاى حد
خالد:وانا يهمنى يعنى ما جوز صفاء هو البيدفع
مروه:ايه ده غريبة رغم انك كنت مسافر يعنى ده احنا قولنا هترجع مليونير
خالد*ضحك بسخرية*:مــليو..ايـــــــه ,انا كنت مسافر عشان اشهيص نفسى الفلوس الكانت تجيلى بصرفها ع مزاجى وبـــــــــس
سما:هو انت كدا مش هتسافر تانى

خالد*وهو بينفخ ف السيجارة المعاه*:لــسه معرفش ع حسب المزاج ,عجبتنى القاعدة هنا هقعد ,ماعجبتنيش هفلسع ,بس انا جى عشان حاجة ف دماغى لزما اعملها
فتحى:ايــــــــه هتعمل مزاج بلدى
*كلهم ضحكوا اوى والستات ضحكوا بمياصة*
خالد*وعنيه بتلمع بخبث*:انت بتقول فيها ,ده مــزاج عالى اووى ونفسى فيه م زمـــان
صفاء*كانت وقتها خارجة وف ايديها ازايز الخمور*:اشربوا ده بقى هيعجبكوا اوووى
فتحى:ايـــــوه كدا دلعينا

سليم:نحبك وانتى مدلعانا ياصفصف
صفاء*ضحكت اوى*:ده انتوا ف عيونى
مروه:بس ياخسارة هنتحرم م القاعدة الحلوه دى
فتحى:ليه بس كدا؟
صفاء*بضيق*:اصلنا مسافريين ف فرح عقبال عندكوا
سليم:اكتر م كدا فرح *وشاور لسما*:قومى ارقصيلنا خلينا نفرح
سما:م عنيا

فتحى:هتقعدى قد ايه كدا
صفاء:اســـبوع بالكتير وهنيجى ,ما تخافوش هاجى وهنعمل احنا بقى احلى فرح
سليم*وهو بيصقف*:ايوه عايزين نفرح ونولعها*وقام يشغل الاغانى ويرقص مع سما وفضلوا يسكروا ويشربوا وطبعا كالعادة كانت تتخلص م كل ده قبل ما مجدى ما ييجى عشان مايحسش بأى حاجة*وتعــدى ايام وتخلص امتحانات ملك ونهى وتكون ملك اليوم ده مع على ف النادى*
على:تمام خلصنا كدا النهاردة

ملك*بتاخد نفاسها*:تمام
على:بس برافو عليكى بتتقدمى اكتر ,عقبال ما تتقدمى ف السواقة
ملك*بصتله وابتسمت*:ما انا بحاول
على:بتحاولى ايه ياملك اخر مرة كنتى هتنزلينا البحر ,ياملك دى عربية مش غواصة
ملك:يوووووووووه هحاول والله
كريم*يدخل ينادى عليه*:علــــــــلى يلا مستنيينك
على:حاضر جى

ملك*بستغراب*:انت رايح ف مكان
على*ابتسم*:هنروح ,هنغير هدومنا ,وانا هروح اللعب كورة وانتى هتفرجى عليا وانا بلعب
ملك*بفرحة*:بجـــد ,بس انا مابفهمش فيها ,بس هشجعك وخلاص
على:هو ده الــ انا عايزوا منك ياصاحبى
ملك*ابتسمت*:طيب يلا عشان منتأخرش *وراحت هى وعلى وبدأ يلعب وكانت قاعدة تتفرج عليه وعنيها معاه وكانت بتقلق اوى اول ما تشوفوا بيقع او حد بيخبطوا بكوعه ,وكانت بتفرح لما ييجيب جول*وشوية ولقت مجموعة م البنات عماليين يشجعوا قالت عادى يمكن متابعيين الماتش وشوية وخلص على وجه قرب ناحيتها*
على:ها ايه رأيك!

ملك*ابتسمت ولسه هتكلم*
تسنيم:على ازيك ,انا مصدقتش نفسى لما لقيتك بتلعب بس الماتش كان حلو اوى
على*بصلها وسلم عليها*:بجد عجبك الماتش
تسنيم:طبعا ياعلى انت عارف م زمان وانت عاجبنى *وقالت بأحراج*:قصدى لعبك ف الكورة كويس جدا ,ماتتصورش كنت بستناك قد ايه وكل مرة اقول هييجى ده تقريبا ما بقتش اتفرج ع الماتشات عشان مش موجود
على:لا خلاص انا جيت بقى هتلاقينى معظم الوقت هنا

تسنيم*بأبتسامة*:اكيد هشوفك بقى ,معلش مضطرة امشى
ملك*كانت واقفة ومتابعة كل ده وفجأه حست انها مضايقة*
على*بصلها وابتسم*:ها قوليلى ايه رأيك
ملك*ابتسمتله رغم ضيقها ,ولسه هتكلم*
اميرة:واااو على بجد لعبك جميل جدا
ملك*بصت ورفعت حاجبها*

على*بصلها وسلم عليها*:ايون يابنتى هو انا اى حد
اميرة:اكيد طبعا مش اى حد انا والله كنت مبسوطة وانا شيفاك بتيجى النادى كان بقالك مده طويلة ما بتجيش غيبت عننا
على:خلاص مش هغيب تانى
اميرة:بجد يعنى ع طول هتكون هنا
على:ايــوه
اميرة:خلاص هبقى اجى اشوفك وانت بتلعب بقى الماتش ,يلا باى
ملك*كانت مضايقة اوى م البيحصل ده*

على*بصلها*:معلش اصل دول كلهم بنات معرفة م النادى وكدا ,المهم قوليلى ايه رأيك ف الماتش كان عجبك
ملك*ابتسمت ولسه هترد*
الاء:عــــــــــلى
ملك*اضايقت اوى وربعت ايديها وفضلت باصه والغضب بدأ يبان عليها*
على*بصلها وابتسم*:ايه ده ازيك عاملة ايه
الاء:كويسة والله مبسوطة انى شوفتك ,انا كنت بفضل ابص عليك وانت بدرب *وبصت ع ملك*
على*بص لملك وحس ان ملامحها بدأت تتغير*:اة دى ملك ,يعنى كنت بدربها ع بعض حركات كدا
الاء:ممكن تبقى تدربنى انا كمان

على*لسه هيتكلم*
ملك:بصراحة مش هينفع عشان انا لسه ف حاجات كتير متعلمتهاش لما اخلصها ممكن يبقى يدربك
الاء*حست بأحراج*:انا اسفة جدا ,طيب عن اذنكوا
على*بص لملك*:ف ايه؟
ملك:مفيش ,ممكن نروح بقى عشان رجلى واجعتنى وانا واقفة عمالة اسمع كمية السلامات دى *وسابته ملك ومشيت*
على*مشى وراها وكان فاهم ايه الضايقها بس حاول يدارى ده وركبوا العربية*:مالك
ملك:ماليش
على:ف حد يخبى عن صاحبه برده
ملك*بضيق*:انا ما بخبيش بس بجد ما فيش حاجة

على:بس انا حاسس غير كدا
ملك:طيب خلى احساسك هو الــ يرد بقى
على:يعنى بزمتك كدا بالــرد ده يبقى مفيش
ملك:اة
على:ياملك
ملك:ايوه مفيش *وفضلت ساكتة وعلى ماحبش يضغط عليها واول ما وصلوا طلعت ملك وطلع على وراها وكل واحد وقف عند باب البيت ملك مرضيتش تبص وراها عليه وفضلت تخبط وتدوس ع الجرس جامد*
رحمة*فتحت بزعيق*:ايه ياما ف ايه هتحرقيلنا الجرس

ملك*بعديتها عن الباب ودخلت قاعدت ع الكنبة وكان باين عليها انها مضايقة*
رحمة*بستغراب*:مالك ف ايه!
ملك*فضلت ساكتة*
رحمة:ما تنطقى يابت على زعقلك
ملك:يـــــــــاريت
رحمة:ياريت! اومال ايه الحصل!! ماتقولى
ملك:كل الحصل انى كنت واقفة النهاردة زى الطيشة
رحمة:طيشة! يعنى ايه!

ملك*حكتلها الحصل*:والاقيلك فجأه مسورة بنات واتفتحت *وقامت ملك وبدأت تقلد صوتهم وحركتهم*:ايه ده على انا مش مصدقة عنيا انت هنا انا مبسوطة اووى بوجودك ده انا باجى اتفرج ع الماتشات مخصوص عشانك
رحمة*ضحكت اوى وبصتلها وغمزتلها*:دى غيرة دى ولا ايه ياملوكة
ملك*بنرفزة*:لا مش غيرة اغير ع مين وع ايه اصلاوكمان اغير ازاى ده بيفضل يقولى*وبدأت تقليده*:انتى صاحبى الجدع ال بحكيولوا كل حاجة ,كفك ياصاحبى ,والهيجننى اكتر انه كان مبتسم اوى وفاتح بوؤه م هنا لهنا ويقول انا هبقى هنا كل يوم قال يعنى بيقول دعاية ,وهما مصدقوا ياختى مصدقوا
رحمة*بأحراج*:طب خلاص ياملك

ملك*بتحرك راسها بالنفى*:لا مش خلاص استنى هكملك والزاد وغطى بقى الـ قالتله عيزاك تبقى تدرابنى انا كمان عشان عرفت انه بيدربنى والبجاحة بقى انى واثقة انه كان هيوافق كأنى انا كدا مش مهم هيدينى استمارة ستة انا بقى ويقولى مع السلامة ف بنات غيرك اهم
رحمة*عمالة تبصلها وتغمزلها*:لا ياستى على اكيد ماكنش هيعمل كدا
ملك:لا هيعمل يابنتى هما كلهم زى بعض اول ما يلاقوا البنات خلاص ينسوا الدنيا والعالم كأنهم لقوا كنز هيعيشهم ملوك طول عمرهم

على:هو انا مش قولتلك قبل كدا متعمميش
ملك*اول ما سمعت صوته اتحرجت اوى وفضلت ساكتة وشاورت بأيديها لرحمة وقالت بصوت هادى:هو ورايا
رحمة*بتحرك راسها بنعم وبتحاول تكتم ضحكتها*:ده وراكى م بدرى وبحاول اغمزلك وانتى ولا هنا
ملك*حست بأحراج جامد وخدت نفس عميق*:احم احم *وبصتله وابتسمت ابتسامة لحد ودانها وبعد كدا جريت وقفت جمب رحمة*:ده,, ده ده انـــــا كنت بحكى لرحمة ع مسلسل بتاع بكرة ,قصدى النهاردة ,لا قصدى امبارح امبارح *وبصتلها مش صح*

رحمة*ضحكت اوى*
ملك*حطت ايديها ع بوء رحمة*:مش صح يارحمة
رحمة*حركت راسها بنعم وملك محوطاها بأيديها*
على*ابتسم اوى م ملامحها وشكلها*:طب عموما ف المسلسل البطل ماكنش هيسمح يدرب واحدة تانية غير البطلة ,واصلا هو كل البنات الكان بيسلم عليهم دى ماكنش عارف اساميهم بس كلها مجاملات مش اكتر ,كمللها المسلسل بقى *وسابها ومشى*

رحمة*بتكلم وملك فضلت ماسكاها وكانت بتفكر ف الكلام القالوا ده وكانت مبسوطة اوى وفضلت سابته ع الحركة العملها فيها وبعديها حاولت تبعد ايديها عنها شوية*:سبينى بقى نفسى هيتقطع
ملك*بعدت ايديها عن رحمة ولقت نفسها بتبتسم جامد اوى*

رحمة*ضحكت وبعد كدا بصتلها وغمزتلها*:سيدى ياسيدى ,خدتى بالك م البطل مش هيسيب البطلة دى!
ملك*حركت راسها بنعم ,وبعد كدا فاقت وبصتلها*:ع فكرة عادى يعنى ,وكمان مش تقوليلى انه كان ورايا كل ده
رحمة:ما انا عمالة اشورلك واغمزلك ده انا شوية شوية كنت هقولك ابوس ايديكى بصى وراكى
ملك*ابتسمت اوى*:طيب انا هدخل اغير بقى ,كفاية احراج لحد كدا

*ودخلت ملك اوضتها وكانت مبسوطة اوى م كلام على ماكنتش عارفة توصف احساسها وقتها فعلا معقولة كانت بتغير عليه بس غيرتها وقتها كانت عن صديق ولا كحبيب ,ما كنتش قادرة تصدق انها بتحبه وحاولت تطرد الفكرة دى م دمغها وقالت ان البينهم صداقة وبس وانه عادى ممكن اى شخص يغير ع صديقة ,كل بنى ادم بيغير ع اى حاجة قريبة منه وبيرتاحلها مبيبقاش عايز اى شخص تانى يشاركوا فيها ,,وفضلت تفكر طول اليوم ف الحصل وراحـــــــت ف النوم والوقت ده كان مجدى قاعد مع صفاء وخالد*
مجدى:جهزوا نفسكوا بقى عشان هنسافر بكرة

صفاء*بضيق*:مش بدرى كدا
مجدى:لا ولا بدرى ولا حاجة ده انا يدوب واخد الاجازة وكمان عشان خاطر ملك وحشانى وعايز اشوفها
خالد*بص بخبث*:ووحشانى انا كمان والله
مجدى*ابتسم*:ان شــاء الله هنشوفها بكرة
خالد*لنفسه*:امتى ييجى بكرة ده بقى*
*وتــــــــــــانى يوم تصحى ملك ع صوت جرس ودوشة برة تخرج تلاقى باباها تجرى عليه وتحضنه*
ملك:بـــــــابـــــــــا وحشتنى اووى بجد

مجدى:وانتى كمان وحشانى
ملك:بجد مش مصدقة انك هنا حاسة انى لسه بحلم
صفاء*بصتلها*:انتى مش شايفة غير بابا ولا ايه ومش شايفة ماما ,ماوحشتكيش
ملك*بعدت عن باباها وسلمت ع صفاء*:اكيد وحشتينى *واول ما بعدت عنها وبتبص وراها لقت خالد طالع بالشنط*
خالد*بصلها وابتسم بخبث*:ملــــــــوكى وحشـــــــانى

ملك*اول ما شافته فضل قلبها يدق جامد وخافت اووى ,كانت ف الوقت ده نفسها فعلا تكون بتحلم بس كانت واثقة انه كابوس مش حلم فضلت ملك واقفة ف مكانها ومتحركتش ونبضات قلبها بتعلى والخوف والرعب بدأ يزيد جواها*
خالد*قرب ناحيتها ومد ايده عشان يسلم عليها*:ايه اخوكى ما وحشكيش
ملك*فضلت بصاله وساكتة ومعملتش اى حركة*

مجدى*بصلها وابتسم*:هى دى المفجأه ياملك الــ قولتلك عليها ,بس ما كنتش اعرف انك هتتفاجئى اوى كدا
خالد*نزل ايده وبصلها بخبث*:اكيد لزما تتفاجئ بقالها كتير ما شفتنيش ,اكيد وحشتها اوى زى ما هى وحشانى
ملك*فضلت بصالوا وساكتة*
رؤوف*كان خارج م الاوضة*:حمد الله بالسلامة
مجدى:الله يسلمك
منى:والله منورينا ,وخصوصا انتى يامدام صفاء
صفاء*بأبتسامة صفرا*:ميــرسى

*ملك فضلت ف حالة الزهول بس حاولت تهدى عشان الحواليها مايحسوش بحاجة وخرجت رحمة وسلمت عليهم*
رحمة:نورتونا ياعمو والله
مجدى:ده نورك يارحمة
رحمة:والله انا اول مرة احس بلمة العيلة كدا
مجدى:ولسه ان شاء الله هتزيد وتكتر
محمد*خرج م اوضته وسلم عليهم وشوية وجت نهى*
منى:هى دى بقى عروستنا يامدام صفاء

صفاء*بصتلها*:اة عسولة
منى:اومال على فين؟
نهى:نزل م شوية
منى:طيب تحبوا تشربوا حاجة!
ملك*كانت حاسة انها عايزة تقوم ومش قادرة تقعد واتحججت انها هتقوم تعملهم حاجة يشربوها*:هقوم انا هعمل عصير

*وقامت بسرعة وكانت مضايقة اوى وحست انها بتفتكر كل اللحظات الوحشة العاشيتها وفضلت تقول ليه رجع تانى ليه شافته ليه وشوية وحست بصوت وحد وراها بصت لقت خالد وكان بيحاول يقرب ناحيتها ويمسك خصلات شعرها وحصلت حاجة ايه هى هنعرف الحلقة الجـــــــاية ….  

بواسطة
الكاتبة فاطمة هشام
الوسوم

أبو إسلام الخطيب

مهتم بالشأن العربي ويتم ترجمة المقالت من وجهة نظر الغرب الي اللغة العربية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق