قصص وروايات

رواية جسد بلا روح (الجزء الرابع عشر)

  *اخيـــرا ماهر نفذ خطته وقدر يخليها معاه وفضل باصص عليها نظرته الجريئة وكان مبسوط ان الهو عايزه هيتم وملك ف حالة اغماء شديد ومش حاسة بأى حاجة وف الوقـــت ده *
على*كان تحت العمارة*:الواد الكان طالع ده ومعاه بنت طلعوا ف شقة ف الدور الكام
حارس العمارة:الدور التانى

على:معاك مفتاح الشقة
حارس العمارة:اة معايا بس انت مين؟
على*بلهفة*:هاتوا بسرعة *وطلعوا وفتحلوا باب الشقة على دخل لقه الصالة فاضية وكان فيه ورقة موجودة ع الترابيزة قرأها بسرعة وخدها ف جيبه والحارس قالوا ان ماهر جوه ف الاوضة وشاولوا عليها دخل بسرعة ولقاه بيحاول يقرب م ملك زقوا ورماه ع الارض*

ماهر*بفزع*:ايه ده ف ايه انت ازاى تدخل هنا
على*بكل عصبية ماحسش بنفسه غير وهو ماسكه وعمال يضرب فيه جامد وبكل قوه ومسابهوش غير وهو مرمى ع الارض ومش قادر يحرك نفسه وبص ع ملك وشالها ونزلها ركبها العربية ووقف ع البحر لحد ما ملك تفوق*
ملك*بعد شوية بدأت تفوء وماكنتش حاسة ولا فاكرة اى حاجة حصلت وبصت حواليها لقت نفسها نايمة وكانت ف عربية بس ما كنتش عربية ماهر ومحطوط ع رجليها جاكيت بصت حواليها لقت شخص لكن ملامحه ماكنتش واضحة كان واقف ناحية البحر وبيشرب سيجارة ماكنتش قادرة تحقق م الوش لحد ما بدأ يقرب منها شوية بشوية لما لقاها فاقت وركب ف العربية جمبها وعرفت انه على ,وقالت بخوف*:انا ايه الجابنى هنا وانت بتعمل ايه وازاى ,ازااى ده ازاااى

على:اهدى ياملك اهدى
ملك*بدأت تترعش وخايفة *وبعدت الجاكيت بتاعه عشان تخرج م العربية لقيت الجيبة بتاعتها مقطوعة كانت لسه هتصرخ حطت ايديها ع بؤها*
على:ملك اهدى انتى كويسة مفيش حاجة حصلتلك صدقينى انتى كويسة
ملك*الدموع نازلة م عنيها زى المطر*:ايه الحصلى ف ايه انا مش فاهمة حاجة ,ارجوك فاهمنى ارجوووووووووك
على:انتى محصلكيش حاجة ,يمكن لو كنت اتأخرت شوية كان هيحصلك
ملك*بعدم فهم بصتله وبدأ يحكيلها*

على*خد نفس عميق*:انا بصراحة ما كنتش عارف ليه بتعاملينى كدا ومش عارف ليه الوقت ده بالتحديد قررت اجى اكلمك ف الموضوع ده ,غير ان نهى كانت كتير بتتحايل عليا عشان اجى اخدكوا بالعربية بدل المواصلا فقولت اجى اشوفك واقعد معاكى وافهم منك انتى ليه بتعملى معايا كدا واخدكوا معايا بالمرة ,وصلت عند الجامعة ولسه هخرج م العربية لقيتك ركبتى مع *ولسه هيشتم مسك نفسه*:مع الشخص ده استغربت اوى وقولت اكيد ان ده الشاب البتكلميه ف الموبايل ع فكرة انا كنت ساعات بسمع كلام البتقوليه غصبن عنى طبعا ماكنش بيبقى قصدى و شوية وحسيت انك بدأتى تخافى ومتوترة فضلت مستنى واراقب التحركات م بعيد لحد ما لقيتك بتشمى ريحة كانت ف ازازة كدا وفجأه غيبتى عن الوعى فهمت وقتها ان ف حاجة غريبة ومشيت وراه لحد ما وصل العمارة وطلعت الشقة ولقيت انه كان بيحاول..*وبصلها عشان يطمنها*:بس صدقينى انتى كويسة الحمد لله ماحصلكيش اى حاجة *وطلع ورقة م جيبه*:واكتشفت كمان انه تقريبا مزور الورقة دى عشان يثبت بيها حاجة؟

ملك*وايديها كانت بتترعش مسكت الورقة وقريت الكلام كانت حاسة انها مصدومة مش مصدقة وانها ف كابوس واكيد ده محصلش ليها وان ماهر بيحبها وهيتجوزها وانه مش وحش كانت حاسة انها هتجنن والدموع نازلة م عنيها وم كتر صدمتها لقت نفسها مش قادرة تنطق بـ ولا كلمة او تقول لعلى اى حاجة*
على*بحزن*:انا عارف انك اكيد مصدومة م الشخص ده بس احمدى ربنا برده ياملك واحدة غيرك كان ممكن يكون حصلها حاجة ,وكمان ده كويس انه ظاهرلك ع حققته وخرجتى م الموضوع ده بأقل الخساير
ملك*فضلت ساكتة خالص وماتكلمتش*

على:لآ ارجوكى انتى لزما تبقى اقوى م كدا ,موبايلك عمال يرن وانا مش عارف ارد واكيد لو قعدتى اكتر م كدا ومتكلمتيش مع حد هيقلقوا عليكى!*واول ما على خلص كلاموا موبايل ملك رن*:ده عمو رؤوف ردى ياملك
ملك*كانت باصه قصادها وحاسة كأنها تايها ومش حاسة بحاجة*
على*بيعالى صوته*:ملك ردى لزما تردى *لما لقه حالتها كدا ومش قادرة تبص او تكلمه اتضطر انه يرد*:ايوه ياعمو

رؤوف:ايه ده على!
على:اة اصل قابلت ملك ف الطريق فقولت اجيبها معايا وانا جى
رؤوف:طب ما قولتوش ليه ,دى نهى قلقتنى عليها قالت انها قالتلها نازلة تجيب حاجة ونزلت ومطلعتش
على:اصل بصراحة حبيت اصالح ملك عشان هدية عيد ميلادها انت عارف ياعمو انها اتضايقت قد ايه وكمان قولتلها ماتقولش لنهى عشان كانت هتيجى معاها ومش هترضى تحضر باقى المحاضرات
رؤوف:طيب ياعلى لو سمحت تعالوا بقى عشان الوقت ميتأخرش

على:متقلقش ياعمو احنا جايين اهوه *وقفل معاه وبص لملك حس ان حالتها صعبة اوى ونظرتها التايها ودموعها الـ فعنيها مش راضية تبطل ماكنش عارف يعملها ايه او ايه ف ايده ممكن يخليها تهدى عن الحالة دى بس طبعا كان واثق انه صعب ومهما حاول يعمل اى حاجة مش هيقدر يخرجها م الصدمة الهى فيها دى دلوقتى ,البنى ادم الوحيد الكانت فكراه هيصونها وهيحميها طلع هو الكان عايز يأذيها*وبعد شوية*:ملك احنا لزما نروح عشان منتأخرش اكتر م كدا

ملك*الدموع ف عنيها ومبصتش ع على كانت سامعة كلاموا لكن مش قادرة تتكلم او ترد*
على*بصلها وكانت حالتها صعبانة عليه اوى وبدأ يتحرك بالعربية لحد ما وصل العمارة ووقف بالعربية وملك ماتحركتش فخرج منها وفتحلها الباب*:يـــــلا ياملك
ملك*خرجت م العربية واول ما وقفت الجاكيت وقع على مسك الجاكيت ولفه حواليها بسرعة*
على:انا هقول ان الجيبة بتاعتك شابكت ف مسمار كان ف باب العربية واتقطعت ,ملك ارجوكى فوقى م الحالة دى ,انتى كويسة صدقينى كويسة مافكيش اى حاجة

ملك*مسحت دموعها وطلعت اول ما رحمة شافتهم*
رحمة:الله الله ايه الــ لم الشامى ع المغربى *وبصت حست ان ملك عنيها محمرة اوى وباين عليها معيطة*:مالك ياملك
على:ابعدى دخلينا الاول
رحمة*بصتلها بقلق*:فيكى ايه ياملك

على:مفيهاش حاجة ياستى هى كويسة بس الجيية بتاعتها شبكت ف مسمار كان ف باب العربية واتقطعت وطبعا عشان هى شخصية طفولية شوية قعدت تعيط ومضايقة
رحمة*ضحكت اوى*:مجنونة ياملك والله ,انا اصلا قولت م الاول بلاش الجيبة دى ,ادخلى ياختى غيرى
ملك*دخلت الاوضة واترمت ع السرير وقعدت تعيط جامد ورغم انها نفسها تصرخ لكن حاولت تكتم عياطها عشان محدش يحس*

رحمة*بشك بالحالة ال فيها ملك*:على هى ملك كويسة بجد ولا ف حاجة حصلت
على:ياستى كويسة والله ,هى بس تعبانة شوية كدا تقريبا حست بالذنب لانها كانت مش طيقانى وعرفت انى واد حيلوه واتعامل حلو اوى
رحمة*ضحكت*:لا والله حليوه ,طب اجرى ياحليوه ع شقتكوا
على:ماشى *كان طبعا بيحاول يهزرعشان محدش يحس بحاجة ودخل لقه اخته مستنياه*
نهى:علـــــــــى ,هى ملك رجعت معاك

على:اومال هسيبها وامشى
نهى*بأستفهام*:مقولتش ليه انك جى وكمان جيت تاخد ملك بس ,هو ف ايه بالظبط؟
على:مفيش حاجة انا بس لما لقيت ملك مضايقة منى قولت اقعد معاها وافهم منها يمكن انا عملتلها حاجة وانا مش عارف
نهى:ياسلام! ولقيت ايه بقى
على:لا متقلقيش حليت الموضوع
نهى:طب هروح اشوفها
على*مسكها م درعها*:لا هى تقريبا نامت وورحمة كمان هتنام
نهى:طيب خلاص هشوفهمم بكرة

ودخلت نهى اوضتها وعلى ساعتها دخل اوضته ورمه نفسه ع سريره وغمض عيونه لكن اول ما غمضها جه ف باله شكل ملك وهى ع السرير وماهر بيحاول يقرب منها اضايق اوى وقام بسرعة ولقه الدم بيجرى فعروقه ونفسه يروح لماهر ده ويضربه تانى ويخنقه بأيديه حاول يهدى وقام يشرب سيجارته ف البلكونة*
ملك*كانت نايمة ع السرير بهدومها مقدرتش حتى تغير كل العاملته انها اتغطت بالبطنية عشان محدش يشوف القطعة الـ ف الجيبة*
رحمة*دخلت تبص عليها لقيتها نايمة*
رؤوف:نامت

رحمة:اة يابابا ف سابع نومة
رؤوف:طيب ادخلى انتى كمان نامى عشان جامعتك بكرة
رحمة*دخلت تنام وبصت ع ملك وحست انها تعبانة فمحبتش تصحيها عشان تغير هدومها وف نفس الوقت كانت شايفة ان ف حاجة متغيرة ف ملك بس محابتش تدقق ف الموضوع ونامت,ملك وقتها كانت عاملة نفسها نايمة لكن جواها كان نار قايدة ومش قادرة تنام وكانت نفسها ساعتها بجد تغيب عن الوعى خالص وشوية وقامت م ع السرير وكانت ماشية وهى عارفة هى رايحة فين وايه طريقها وفتحت باب الشقة ونزلت اتاجهت ناحية البحر ونزلته بهدومها,,ف الوقت ده على كان واقف ف البلكونة ولسه هيدخل شافها وهى راحة عند البحر فهم هى ناوية ع ايه ونزل بسرعة ونزل البحر وراها*

على*بيحاول يوصلها*:ملك ارجعى ملــــلك
ملك*فضلت ماشيه وكانت كل مادا بتدخل لجوه اوى*
على*حاول يقرب منها لحد ما مسكها*:ملك بطلى جنان ارجعى ياملك
ملك*بعياط هستيرى وبتزعقلوا*:سيبنـــــــــــــــــــى ابعد عنى سيبنــــــــــــــــــــــى
على:ملك ماينفعش الــ بتعمليه ده

ملك:سيبنى انا مش عايزة الدنيا دى انا مش عايزة افضل فيها سيبنى اروح لماما سيبنى
على*بزعيق*:ملك فوقى وكمان انتى هتروحى لمامتك ,طب وباباكى ياملك ذنبه ايه تموتيه ف اليوم 100 مرة ذنبه ايــــــــــــــــه!!
ملك*اول ما قال كدا وقفت ف مكانها وانهارت م العياط*

على*حاول يهديها ومسكها وخرجها برة البحر وكان ع الرمل القميص بتاعه فغطاها به ,ملك بدأت تهدى شوية بشوية*:ملك الــ انتى بتعمليه ده مش هيفيدك الحياه مش هتنتهى كدا ع فكرة ,الحياه مش سهلة فعلا وفيها حاجات تخلى زى ما بيقولوا الحجر ينطق بس خلاص ده واقعنا احنا جينا فيها وعايشين فيها بكل عواقبها بقى ومشاكلها وفرحها وحزنها احنا لزما نعيش فيها طول ما فينا الروح وبنتنفس وبنصحى كل يوم نبص نلاقى الشمس طلعت
ملك*بتسمع الكلام ده والدموع نازلة م عنيها زى المطر*

على:وياريت حياتك هتنتهى قضاء وقدر لا انتى عايزة تنهيها بأيديكى انتى ,عايزة تموتى كافرة لــــــيه وعشان ايه قصة حب فاشلت!
ملك*بصتله وبتعيط*:فاشلت!! يـــــــاريتها فاشلت عارف يعنى ايه ادى ثقتى لبنى ادم ويستغلها اسوء استغلال عارف يعنى ايه هو ده البنى ادم الوحيد الكون حاسة انى مطمنة معاه وفجأه يطلع انه اكتر انسان كنت مفروض اخاف منه , انا ليه بيحصل فيا كدا زمان كان خـــــــــــــالد ودلوقتى *وسكتت*
على*بستغراب*:خــــــالد

ملك:اة خالد اخوه مرات بابا كان ديما بيستغلنى عشان كنت واثقة فيه *وبدأت تحكيلوا الكان بيعملوا معاه*:ولما كبرت واستوعبت حركاته البشعة دى اتصدمت فيه صدمة عمرى ودلوقتى البنى ادم الوحيد الحبيته كان عايز يستغلنى كنت هرمى جسمى ده ف البحر مش هو ده العاجبهم هو ده العايزينه ,ومحدش فيهم يستحقوا ليه بيعملوا فيا كدا لـــــــــــــــــــــيه انا عملت ايه ايه ذنبى, ذنبى ان بحب بجد وانى مبأذيش حد ليه شايفنى كدا وبس ليه الكل عايز منى كدا وبـــــــــــس,ليــــــــــــــه كل راجل ف الدنيا دى شايف ان الطفلة او البنت او الست او حتى واحدة كبيرة ف السن انها ملكه ولى هو وم حقه يعمل الهو عايزه احنا بشر لينا حق نعيش م غير ما نخاف لينا حق نعيش حياتنا واحنا مطمنين لينا حق نحب واحنا واثقين ان مفيش شخص هيستغل الحب ده لينا حق نبقى مع اى شخص ف اى مكان وعارفين انه مش هيعمل حركة قذرة نشمئز منها ليــــــــــــــه بيحصل فينا كدا لــــــــــــــيه رد عليا ليــــــــــــــــــــــــه

على*لقه نفسه مش قادر يرد عليها لانها عندها حق ف كل كلمة قالتها*:بس تفتكرى هو ده الحل انك تموتى نفسك تفتكرى كدا الموضوع هيخلص ف حاجة هتتغير البيعملوا كدا هيتغيروا الستات مش هتبطل تتهان بالطريقة دى تفتكرى انتى كدا بتحلى المشكلة دى!!
ملك*بتحرك راسها بالنفى وتنهار م العياط وتفضل تصرخ جامد م كتر التعب الجواها وحست انها بتطلع كل احساس وحش حست بى م زمان لحد لحظتها دى وعلى يفضل باصص عليها ومصدوم ومش عارف يعملها ايه*وتبدأ ملك تفتكر كل ده وتبص لمهند وهى منهارة م العياط*

مهند:اهدى ياملك ده غلط عليكى ال بتعمليه ده
ملك:كان ابشع احساس حسيته ف الدنيا حسيت م بعده مش هقدر اثق ف حد حسيت انى لزما اتغير وخوفت اتغير للاسوء هما عايزين منى ايه! انى ابقى وحشة وزيهم وبفكر ف افكارهم ده الكانوا عايزينه منى وقتها
مهند*بصلها وجابلها ماية عشان تهدى*:ياملك انا حاسس بيكى
ملك:ماحدش حاسس بيا ,محدش عارف النار الجوايا دلوقتى ,وهو كمان حاول يعملى اى حاجة عشان يهدينى
مهند:قصدك ع علــى

ملك*بتحرك راسها بنعم*:اة تعرف انه قالى نفس الجملة الــ انت قولتهالى لما كنت ف المستشفى كنت حاسة انى ساعتها سامعة صوته هو
مهند*وهو بيفتكر كلاموا معاها لما كان بيحاول يخليها تتكلم ^احنا لزما نعيش فيها طول ما فينا الروح وبنتنفس وبنصحى كل يوم نبص نلاقى الشمس طلعت^*:يعنى هو خرجك م الحالة الــ انتى فيها
ملك*والدموع نازلة م عنيها*:هو حاول ,بس لحظة انهيارى ده عمل حاجة كنت بجد محتاجها اوووى
مهند*بصلها بستغراب*

ملك:خدنى ف حضنه *وطبعا ف الحالة الملك كانت فيها والعياط الهستيرى ده والصريخ على كان باصصلها ومش قادر يتكلم ولا عارف يدافع او يقول اى حاجة ولاقها فجأه بتترعش وحالتها بتسوء اكتر ,وم كتر ما هى صعبانة عليه عمل رد فعل غريب عنه لقه نفسه بيقرب منها ويحضنها*فـــــلاش بـــــــــاك*
ملك*فضلت تعيط حتى وهو حضنها وشوية بشوية بدأت تهدى ولما حست ان ده على بعدت عنه بسرعة وبصتله بخوف*

على*بيحاول يطمنها*:ملك متخافيش انا والله ما قصدى حاجة والله العظيم انا بس كنت بحاول اهديكى والله ما قصدى حاجة ولا انى اقرب ناحيتك وصدقينى مش هعمل ده تانى اوعدك انى عمرى ما هعمل ده تانى والله العظيم ,انا ما وحش ولا عايز منك حاجة وحشة صدقينى ياملك
ملك*بصتله والدموع ف عنيها وبعد كدا بصت قصادها ع البحر وحست ان جواها نفس صوت الامواج دى واتمنت ف لحظتها لو تختفى م الوجود وماتكونش جت ف الحياه اصلا ,,وحاولت تهدى شوية والا حد ما هدومها نيشفت,وفجأه قامت وقفت ومشيت*:

على:راحة فين!
ملك*بتعب*:انا لزما اروح
على:فعلا الوقت اتأخر اوى ,ووممكن حد يقلق وميلقكيش ف البيت

ملك*تديلوا القميص بتاعه م غير ما تبصلوا ,وفضلت ماشية وعلى وراها وباصص عليها وماكنش ف ايديه اى حاجة يعملها ,ودخل جاب المفتاح م ميدالية نهى وفتحلها الباب ,دخلت ملك الشقة وقلعت هدومها وحطتهم ف كيس ورامتهم ف الزبالة كانت حاسة طول ما الطقم ده موجود هتفتكر اللحظة دى ورغم انها اتحفرت جواها لكن ما كنتش حابة يكون ليها ذكرى حية ف حياتها وغيرت هدومها وحاولت تنام وفعلا م كتر التعب الجامد الكانت فيه نامت*
رحمة*صحيت الصبح لقيتها نايمة مرضيتش تصحيها وخرجت لقت مامتها بتحضر الفطار*
منى:ايه ملك لسه ماصحيتش

رحمة:انا اول مرة اشوف ملك تنام النوم الجامد ده
منى*بتنادى ع ملك*:ملك اصحى يلا *وبصت ع رحمة*:ادخلى صحيها عشان متتأخرش ع الجامعة
رحمة:لما الفطار يخلص بقى انا جعانة وكمان متقلقيش نهى زمانها جاية وهتصحيها *وشوية ولقه حد بيخبط وبعد كدا الباب بيتفتح*
نهى:صباح الخير

رحمة:صباح النور ياختى ,خشى صاحى زميلتك عشان تروحوا الكيلاص سوى
نهى:بايت بطلى بواخة ,هى لسه ماصحيتش
رحمة:هى ملك بتصحى لوحدها كدا لزما تصحيها *وقالت بضيق*:او الموبايل يصحيها
نهى*ابتسمت*:طيب هدخل انا *ولسه هتدخل الاوضة محمد كان لسه خارج م الاوضة*
محمد:ايه الصباح الحلو ده

نهى*بكسوف*:محمد طنط ورحمة واقفيين
منى:سيدى ياسيدى
رحمة*بهزار*:والله بحسكوا تامر وشيرين كدا ف نفسكوا بطلوا السهوكة دى ,يلا ياخويا عندك شغل وانتى ياختى يلا فيه كلية ومحاضرات
نهى:ديما كدا قاطعة اللحظات الكويسة *وشوية ولقت الباب بيخبط*:لا روح انت افتح بقى ,عشان شكلى مش هعرف اصحى ملك

محمد*راح فتح طلع على*:ايه ده على ,مش مصدق اخيرا جيت مرة م نفسك كدا وكمان الصبح م غير ما نندهلك
على*بيحاول يهزر*:قولت اعملكوا مفجأه
رؤوف*خارج م الاوضة*:ادخل ياعلى وسيبك م الواد ده ,تعالا عايزك
على*بستغراب ودخل قعد معاه*:خير ياعمو
رؤوف:ايه الحصل امبارح
على*سكت شوية واتخض افتكر ملك حاكيتلوا*:حصل فين!

رؤوف:مش قولت كنت بتفوت ع ملك عشان تصالحها ,ده بجد ولا فيه حاجة تانية
على:لا والله ياعمو مفيش وانت عارف ان ملك بالنسبة ليا زى نهى ورحمة وانا لما لقيتها مضايقة م حركاتى معاها فحبيت افهمها يعنى ان ده طبعى ولا ايه
رؤوف*ابتسم*:اة طبعا ,ماشى يا على *ولسه هيتكلم*

نهى*خرجت م الاوضة مخضوضة*:الحقوونى بصحى ملك لقيتها مش بتنطق وبقرب منها لقيتها سُخنة اوى وعمالة تقول كلام مش مفهوم *الكل جرى ودخل الاوضة*
رؤوف:ملك
ملك*بتخاريف*:ماما تعالى خدينى ,ماما عيزاكى تبقى معايا الدنيا وحشة م غيرك ,ماما ماما ,سيبونى عايزين منى ايه ,سيبونى ,الحقنى يابابا الحقنــــــــى

منى*حطت ايديها ع راسها*:يالهوى دى سُخنة اوى ,اتصلوا بالدكتور بسرعة *وشوية وفعلا الدكتور جه وقال انها نازلة شعبية جامدا وتعبانة اوى وادالهم العلاج وطبعا الحصل لملك ده ساعدها ان محدش يلاحظ حالتها الحقيقية *وتعــــــدى فترة ويكون كل يوم على بيطمن عليها وكان قلقان عليها اوى ,وتبدأ ملك حالتها تتحسن شوية بشوية لكن ماكنتش بتتحرك م السرير كتير وكانت ع طول عيونها بدمع وماكنتش بتعدى عليها ولا لحظة م غير ما تفتكر الكان ممكن يحصل فيها م ماهر وتخاف اكتر وتحس انها مش عايزة تشوف حد ولا تقابل حد*وف يوم تكون ملك حاسة انها اتخانقت م قاعدة السرير وقامت اتحركت ناحية البلكونة واول ما فتحتها بصت لقت على كان بيشرب السيجارة بتاعته فضلت تكوح جامد*

على*رماها بسرعة وقرب ناحية بلكونتهم*:ملك عاملة ايه دلوقتى ,بقيتى احسن
ملك*بتحرك راسها بنعم*
على:حمد الله بالسلامة ,احنا كلنا كنا قلقنين عليكى اوى ,لزما تخلى بالك ع صحتك الفترة الجاية!
ملك*بتعب*:ان شاء الله

على:لو احتاجتى اى حاجة قوليلى ,ومتقلقيش م اى حاجة *كان قاصد يطمنها ان محدش هيعرف الموضوع الحصل وانه مش هيحكى لحد*
ملك*بصتله والدموع ف عنيها *:عن اذنك

*ودخلت م البلكونة ومسحت دموعها وكانت مضايقة اوى م الاحساس الجواها ده وحست انها لو شافت ماهر ممكن تقتله ف ايديها لكن حست ان مش بأيديها اى حاجة تقدر تعملها ف الوقت الحالى وشوية ودخلت عليها رحمة وقالتلها حاجة ايه هى هنعرف الحلقة الجـــــــــاية….  

بواسطة
الكاتبة فاطمة هشام
الوسوم

أبو إسلام الخطيب

مهتم بالشأن العربي ويتم ترجمة المقالت من وجهة نظر الغرب الي اللغة العربية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق