قصة سارة الجزء العاشر

بالعربي / سعيد: انت جبتوني لهون لانك انت مرضان ولا لتجوزوني .

ابو سعيد: الاتنين سوا , انا ما ربيتك و كبرتك عالفاضي , لتمشي بالاخير على كيفك , من هالضيعة ما الك طلعة , بدك تبقى هون و تتزوج نظيرة و تستلم الشغل عني , هادا قرار غير قابل للاعتراض, بدك تنفذ و بس, انا سكتلك من قبل و سايرتك , قلت ولد طايش و بعاود يركز و يعرف الصح و يرجع لبيت اهلو بس انت طولت كتير و البنت عم تكبر , بدا تفرح بحالا و تشوف اولادا و نحن بدنا نشوف اولادك 

سعيد:انا متزوج و مبسوط مع مرتي و ما بحاجة ليرة منكن و بما انك بصحة منيحة و اطمنت عليك , رح ارجع لمحل ما جيت 

اطلع فيني سعيد

سعيد: يلا سارة 

حملنا شناتينا و جينا لنطلع من الباب, وقف بوجهنا اربع رجال طوال و اعراض , سدولنا الطريق , زت سعيد الشنتاية من ايدو و التفت لعند ابوه

ابو سعيد:قلتلك ما الك طلعة من هون 

سعيد: انتو ما بدكن ابنكن يكون مرتاح و مبسوط … امي احكيلك كلمتين 

ام سعيد: انا مع يلي بقولو ابوك , و مرتك هاي رح تبقى مرتك و على ذمتك ما رح نقلك طلقا ….

سعيد: بس تزوج عليا بنت ما بتحبا , هيك بدك تقولي 

ابو سعيد: مع الايام بتحبا , نظيرة بنت مادبة و منعرف تربايتا و اخلاقا و اصلا اما هاي يلي جايبة معك و عم تقول انو مرتك شو عرفنا فيا و بنسبا لو عند اهلا ما كانو قبلو يزوجو لشاب من غير اهلو

سعيد: ما في داعي للغلط , و لو شو ما كانت انا خترتا و مرتاح معا 

ابو سعيد: ايه خلي وحدة من اختيارك و التانية من اختيارنا 

اطلع فيني سعيد, ما كان في لون بوجهي و عرفت شو يعني الحرية غالية , انحبسنا ببيت اهلو لسعيد , طلعولنا الشناتي على غرفة سعيد , فتت انا و ساكتة , قعدت على التخت و صفنت بالارض 
سعيد:سارة 

سارة/تبكي/:….

حطيت ايدي على وجهي و صرت ابكي , قرفص قبالي و صار يهديني 

سعيد: مستحيل اتزوج عليكي ما تبكي انا بحبك و انت بتحبيني 

سارة : كتب كتابك بكرا ……يا ريت ما جينا ….يا ريت ما جيت معك ….ما بقدر اتحمل هالشي 

سعيد: ما تخافي رح لاقي طريقة نهرب فيا من هون لبكرا 

سارة : يا ريت يا سعيد 

سعيد: قومي غسلي وجهك , رح ابعتلك كاسة عصير فريش على الغرفة لتهدي اعصابك و انا رح دور على مخرج من هون 

طلع سعيد و بقيت لحالي , لفيت على حالي بالتخت و كملت بكا انا و عم اتخيل زواج سعيد من بنت عمو , رح صير الزوجة الاولى , ما كنت قادرة اتقبل الفكرة ابدا , حسيت للحظة انو الله عم ينتقم مني و يدوقني نفس الكاس يلي دوقتا اياه لنتالي , اندق الباب دقتين و بعدين انفتح , رفعت راسي, شفت صبية حلوة نوعا ما , ماسكة كاسة عصير بايدا 

اميرة : انا اميرة اختو لسعيد , تفضلي اشربيا 

حطت كاسة العصير على الطاولة و قعدت على كرسي بالغرفة , جلست قعدتي

سارة : انت يلي اتصلتي باخوكي و جبتيه لهون بحجة ابوكي مرضان 

اميرة : ايه انا بس انا كنت مامورة و بدي نفذ بس , انت ما بتعرفي عقليتو لابي , ما حدا بيقدر يرفضلو طلب و خاصة نحن البنات منخاف كتير منو 

سارة : و انا شو ذنبي ليتزوج علي اخوكي , كنا قاعدين و مرتاحين تحت , جبتونا لهون و حبستونا 

اميرةة: لو انا ما اتصلت و جبتكن , كان ابي رح يجيبكن بطريقتو , لهيك هيدا الامر واقع لا محالة و زواج سعيد من بنت عمو رح يتم هلا او بعدين , لازم تتقبلي الموضوع بعرف صعب لانو انا كمان متزوجة و ما برضى زوجي يتزوج علي ….الحق على سعيد يلي ورطك معو و هو بعرف انو مصيرو لبنت عمو بالاخير ….اشربي كاسة العصير اذا بتريدي و ما تفكري بذي حاول تنسي ليمر بكرا و العرس على خير 

سارة : عرس ؟في عرس كمان ؟/تبكي/ يا ربي ليش هيك حظي 

تركتني اميرة عم ابكي و طلعت , رجع سعيد بعد شوي , قعد جنبي على التخت و مسحلي على شعري 

سعيد: سارة خلص حاج تبكي دخيل الله 

رفعت راسي

سارة : شو صار معك , لقيت مخرج 

سعيد: ابي محاوط كل البيت بالحرس , يعني عامل حسابو انو بدنا نهرب 

سارة : انا مستحيل ابقى هون و شوفك عم تتزوج و احضر عرسك 

قمت نطيت من عن التخت , وقفت على المراية , زبطت شعري و مسحت دموعي و فتلت لعند سعيد

سارة : انا راجعة 

سعيد: سارة …بدك تتركيني لحالي هون و تهربي

سارة : ما بقدر ما بقدر شوفك عم تتزوج 

سعيد: قلتلك رح نلاقي حل

سارة : ما في وقت 

سعيد: نحن وقت كتبنا كتابنا اتفقنا نكون مع بعض عالحلوة و المرة و هلا من اول موجة بدك تتركيني واجه كل شي لحالي 

سارة : شو بدي اقعد اعمل هون ؟

سعيد: وجودك جنبي بريحني كتير , بخليني قوي , انا وعدتك ما اجرحك او بكيكي و انا بعدني على وعدي و يلي صار هلا ما حاسبلو حساب ابدا و صار غصب عننا 

سارة : انت كنت بتعرف…

سعيد: حرام عليكي معقول اعرف و اجي برجلي لهون , كنا مبسوطين و مرتاحين ليش لعكر حياتنا و اخربا بايدي

رجعت قعدت انا و عم حاول هدي حالي , لفني سعيد و بكيت بحضنو كتير 

سارة :سعيد ما تكسرلي قلبي , يلي صار فيني بكفيني 

سعيد: خلص رح اعمل كل جهدي لنطلع من هون 

نمنا انا و سعيد بغرفتو , تاني يوم الصبح نزلنا على الفطور لنفطر مع اهلو بعد ما اتفقنا انو نتصرف طبيعي قدامن و ما نبينلن نوايانا , كان الكل مشغول بحفلة كتب الكتاب , عم يزينو البيت و حديقة و عم يحضرو العصير و دبحو دبايح كتير و طبخو مناسف بالمطبخ و انا كنت من جوا عم احترق و ناطرة الحل يلي بدو يلاقيه سعيد لنطلع من هالورطة , على الساعة 4 العصر قبل ما تبدا مراسيم كتب الكتاب و الحفلة , سمعت سعيد عم يعلق مع ابوه و سمعو كل يلي بالبيت اصواتن حتى وصل الصوت لغرفتي , قمت من عن التخت و فتحت الباب و طلعت لشوف شو صاير 

ابو سعيد:بدك تتزوج غصب عنك , البنت بتحبك و ناطرتك الها سنين 

سعيد: ما بحبا و ما بدي اياها و رح قلا هالحكي قدام الناس كلا , الغو كل شي قبل ما اخزيكن قدام الناس 

ابو سعيد: بدك تكسر كلمة ابوك كرمال شقفة مرة بتروح و بتجي 

سعيد: ابي افهم علي انا ما بحبا ما بحبا حرام اتزوجا و اظلما معي , ربيت معا و بحسا متل اختي 

ابو سعيد:ما على كيفك , روح جهز حالك بسرعة , المعازيم رح يوصلو بعد شوي 

سعيد: عم قلك من هلا ما رح انزل , انا ما بنت لتزوجني متل ما بدك , انا رجال و انا يلي بقرر 

انتبه علي ابو سعيد واقفة عم اتفرج علين و اتسمع على حكين , و كانو لمعت براسو فكرة اول ما شافني 

ابو سعيد: ما تخليني اغصبك بطريقتي 

سعيد: حبستني هون ما بتقدر تجبرني على هالجازة 

ابو سعيد : لا بقدر 

اطلع ابو سعيد برجالو و اشرلن بايدو , قربو عليه , حكى معن كلمتين بعدين اطلع فيني 

ابو سعيد: اطلعو جيبو 

التفت سعيد علي , شاف االشابين طلعو لعندي و مسكوني من ايدي و سحبوني لتحت , هجم سعيد علين هو و عم يصرخ و انا كنت عم صرخ و ابكي و قلن اتركوني , كانت من ابشع اللحظات بحياتي 

سعيد: اتركو لك ليش هيك عم تعمل ولله انا ابنك و هاي مرة ابنك 

ابو سعيد: بيتركو بس ما هلا لتكتب كتابك على بنت عمك و تتزوجا بعدين منتركا…..خدوا محل ما قلتلكن 

سحبوني من ايدي انا و عم نادي سعيد يلي حاول يلحقني بس مسكوه و ما خلوه , شحطوني لبرا البيت, وقف الكل يتفرج علي انا و عم حاول خلص حالي من ايدين , ما توقعت ابوه لسعيد ظالم هالقد و عذرتو لسعيد ليش كان ما بيشتاق لاهلو او بيسال علين , زتوني باسطبل حيوانات , كان فيه خاروفين ما بيبعد عن البيت كتير ,كانت الريحة بتقرف استفرغت لفضيت معدتي , و دخت و تسطحت على الارض , بعد ساعة انفتح الباب و ركض سعيد علي , كان لابس طقم اسود و قميص ابيض و كرافيته سودا , كانت هيئتو هيئة عريس , هالمنظر قهرني اكتر من وضعي بالزريبة 

سعيد: قومي معي 

سارة : بدك تتزوج ….سعيد …قول …بدك تتزوج 

سعيد: سارة اسمعي منيح انا مضطر اقبل و لو ما قبلت كان ابي رح يتركك هون تموتي و ما رح يخليني طلعك ….رح اتزوجا بس شكليا 

كانت معو اختو اميرة و صبية ما عرفتا بس توقعتا اختو كمان 

سعيد: خديا و طلعيا لفوق

سارة /تبكي/:….

سعيد: اميرةما تتركيا قبل ما تطمني عليا انو صارت احسن 

اميرة: طيب انت روح هلا و مضي هاليوم على خير 

طلعت انا واميرة على غرفة سعيد , تحممت و غيرت تيابي الوسخين , و انا عم مشط شعري , طلع صوت الطبل و الزمامير , زتيت المشط و ركضت على الشباك , شفت سعيد حاملينو و عم يزفوه , سحبتني اميرة من جنب الشباك 

اميرة : كلها ساعتين بالكتير و بخلصو , ما بقا توقفي عللى الشباك و تقهري حالك

سارة :اطلعي برا انت السبب اطلعي ما بدي شوفك 

اميرة : طيب انا مضطرة اقفل عليكي الباب

طلعت اميرة و بقيت لحالي ,طبيت راسي على الطاولة و انا عم ابكي على صوت الطبل و الزمامير و الزغاريد يلي عم تصير برا , تسطحت على التخت و حطيت مخدتين فوق راسي حتى ما اسمع أي صوت, مر الوقت ببطئ , و صوت الفرح خفت شوي شوي , سهيت عيني سوي ,و فقت على سعيد عم يفيقني 

سعيد:سارة ..فيقي 

قمت جلست قعدتي , قام وقف و فك الكرفيته و شلح قميصو 

سارة : وينا ؟

سعيد:بغرفتا 

قعد على التخت و تنهد 
سعيد: شو هالورطة ..حاسس حالي بكابوس …بين يوم و ليلة انقلب حالنا 

برم وجهو لعندي 

سعيد: كيف صرتي ؟

سارة :ما منيحة ابدا 

سعيد: و لا انا منيح ..

سارة : يلا روح عند عروستك بتكون ناطرتك 

سعيد: سارة بربك خلص , ما تزيديا علي 

سارة : بدل ما اهلك يعملولي الي العرس و يحتفلو فينا راحو زوجوك , ما بحياتي شفت هيك عالم 

سعيد: فترة و بتعدي و منرجع لحياتنا الطبيعية , انا تعبان و بدي نام 

سارة : اكيد معك حق تكون تعبان , رقصت و دبكت كتير 

سعيد: ……

تجاهل حكيي و فرك وجهو بعصبية , لبس بجامتو و اجا نام جنبي , لفني و شدني لعندو 

سعيد: انا ما عندي غير عروس وحدة , ما بدلا ابدا و لا بتركا لو شو ما صار 

انا و عم اتجادل انا سعيد اندق الباب علينا 

ام سعيد: سعيد …سعيد

رفع الحرام عنو و قام فتح الباب
سعيد: ايه 

ام سعيد: ابني وين تارك عروستك من اول ليلة , بقلك ابوك روح لعندا هلأ 

سعيد: امي دخيل الله رح اقتل حالي منكن , اتركوني ارتاح 

ام سعيد: سعيد الله يرضى عليك بس هالليلة , احسن ما يجي ابوك و يغصبك , بتعرف عقلو ،هاي بنت المرحوم عمك ماجد

قمت من عن التخت و رحت لعندن على الباب 

سارة :روح 

التفت علي سعيد باستغراب

سارة : خلص روح ما في مشكلة , ببقى لحالي الليلة احسن ما نام بالذريبة 

سعيد: سارة !

سارة : انا واثقة فيك 

طلع سعيد هو و امو و انا سكرت الباب و وقفت وراه ابكي , صح كنت واثقة بسعيد انو ما رح يقرب على بنت عمو بس كنت مقهورة من جوا انو صار في وحدة عم تشاركني اسم زوجي , انقهرت انو اخدت لقب الزوجة الاولى , ما نمت ابدا هديك الليلة انا و عم ابكي احيانا و اتقلب احيانا حتى طلع الصبح وما شفت سعيد جنبي , كان بعدو عند نظييرة , قمت غسلت وجهي و غيرت تيابي و طلعت من الغرفة , انا و عم سكر الباب , طلعت قبالي صبية تقريبا من عمري , قصيرة و نحيفة و عيونا صغار مكحلين و وجها ناعم و شعرا بني غامق متوسط الطول , اطلعت فيني نظرة غريبة و بعدين قربت لعندي

نظيرة : انت ضرتي ؟

سارة : انت يلي ضرتي 

نظيرة : سعيد الي و كل ناس بتعرف انو الي بس انت دخلتي على الخط و اخدتي شي ما الك , احسن لكرامتك انو تنسحبي و ترجعي لمحل ما جيتي

سارة : وينو سعيد ؟

نظيرة : جوا عم يتحمم, من شوي لفقنا 

شديت على اعصابي و جيت لاقطعا و فوت شوفو , مسكتني من ايدي و رجعتني لورا 

نظيرة : لوين رايحة ؟ هاي غرفتي و ممنوع تفوتي عليا 

سارة : بدي اتاكد اذا سعيد بالحمام متل ما عم تقولي بس انت وحدة كذابة و بدك توهميني انو قرب عليكي , سعيد ما بحبك و انجبر انو يتزوجك 

نظيرة :هههههه صدقتي يا روحي ، ما في حدا بينجبر هالايام على شي و خاصة سعيد 

رجعت لغرفتي و انا معصبة كتير و عم افرك بايدي , بقيت بغرفتي لاجا سعيد , اول ما فات صبيت كل غضبي عليه 

سارة : صباح الخير يا عريس 

سعيد: لا اله الا الله 

سارة : نعيما كنت عم تتحمم

سعيد: اتحمم؟ سوفي شعري مي الا لا 

طلعت على شعرو كان ناشف 

سارة :سعيد انا اذا بضل هون رح جن , بدك تلاقيلي حل 

سعيد: عم اسعى, خلينا ننزل نفطر

نزلت انا و سعيد على الفطور , كانو قاعدين على الطاولة ابو سعيد و ام سعيد و نظيرة قاعدة على كرسي من يمينا و يسارا فاضي 

ابو سعيد : سعيد تعا اقعد هون 

راح قعد سعيد جنب ابوه و جنب نظيرة و انا وقفت ما عارفة وين بدي اقعد

ام سعيد: سارة تعي اقعدي جنبي 

رحت قعدت قبال نظيرة يلي كانت عم تطلع علي نظرات خبيثة و تتمايل متل الحية , حسيت منافستي كتير قوية و ما رح اطلع من هون بالامر السهل 

ابو سعيد: طعميا لعروستك 

سعيد: بتاكل لحالا 

ابو سعيد: عمي نظيرة كلي ما تستحي هيدا بيتك 

نظيرة : الله يطول بعمرك عمي و يخليلنا اياك 

ابو سعيد : شدو الهمة بدنا نفرحلكن بولد عن قريب 

لعيت نفسي و حطيت أيدي على تمي و قمت عن الطاولة بسرعة و ركضت على الحمام لاستفرغ , لحقني سعيد 

سعيد:شبك 

سارة : ما بعرف تعبانة ….

غسلت وجهي و حسيت حالي انو عم بلش افقد توازني 

سارة : سعيد حاسة حالي رح اوقع 

حملني سعيد و طلعني على الغرفة , بعد ما تسطحت , صرت احسن 

سعيد: رح جبلك كاسة لبن 

سارة : ما بدي شي , نفسي عم تلعي 

قعد جنبي سعيد هو و عم يضحك 

سعيد: دبدوبتي لتكوني حامل

سارة : حامل !….ما بعرف 

سعيد: و كيف بدنا نعرف ؟

سارة : في اختبار بالصيدلية ببين فورا 

سعيد: طيب رح ابعت جيبو, انت خليكي مرتاحة , رح جبلك كاسة عصير 

قبل ما يطلع , وقف على الباب هو و عم يضحك 

سعيد:رح يصير عنا كتكوت صغير 

سارة /مبتسمة /:لسا لنتاكد 

نزل سعيد و بعد ربع ساعة طلع هو و امو , كانت علامات الفرحة واضحة على ملامح ام سعيد بس عم تحاول تخفيا , اخدت الاختبار و طبقت التعاليم و طلعت من الحمام انا و ماسكتو بايدي و عم انتظر النتيجة , بعد اقل جزء من الثانية ظهر خط احمر تاني, كان واقف سعيد جنبي 

سعيد:شو يعني هيك؟

سارة : يعني انا حامل

سعيد:يا عمري 

لفيتو لسعيد انا و مبسوطة و عم اضحك , للحظة نسينا كل شي عم نمر فيه , نزلت ام سعيد فورا لتخبر ابو سعيد , حسيت ممكن هالولد يلي بدو يجي يغير من مجريات الواقع بس ما تغير شي و حتى ام سعيد يلي كانت فرحانة اختفت فرحتا فجاة ,كان كل يوم عن يوم عم يزيد الوحام علي و التعب و صرت نادرا لانزل لتحت او حتى التقي بنظيرة , بقيت بغرفتي و سعيد معظم الاحيان عندي , بعد اسبوع من حملي , كنت عم افطر لحالي على التخت , اندق الباب و فاتت عندي نظيرة ببرودة اعصاب هي و عم تضحك

سارة : انت شو مفوتك لهون ؟

نظيرة : فايتة اطمن عليكي 

سارة :اطلعي لبرا ما بدي شوف وجهك بغرفتي 

نظيرة : ليش؟انا حابة اخدك رفيقة الي , يعني في رجال مشترك بيناتنا

سارة : ما في شي مشترك و انت لو عندك كرامة ما كنت بتقبلي برجال ما بحبك 

صارت تضحك و هي عم تلف خصل شعرا على ايدا

نظيرة : ما بلومك لانك ما بتعرفي مع مين عم تتعاملي , بدك وقت لتعرفي مين نظيرة و شو ممكن تعمل نظيرة لتحصل على غرض ملكا, على كل حال صحة و هنا على الفطور , تغذي منيح كرمال البوبو

طلعت من عندي هي و عم تضحك بخباثة, بعد ما خلصت فطور بساعة , صابني وجع باسفل بطني فجاة , توقعت كون اخدة برد ،رحت قعدت بالتخت و تغطيت بس كان الوجع عم يزيد لفتت على الحمام و شفت حالي عم انزف , اطلعت من الحمام انا و عم ارتكي على الحيط و عم امشي بصعوبة من وجع بطني , رحت لافتح الباب و انزل خبر سعيد لياخدني على المشفى بس كان الباب مقفل من برا ،صرت خبط على الباب بايدي انا و عم صرخ من وجعي 

سارة:افتحو الباب …..سعيد ……مرة عمي ….دخيل الله افتحو الباب …ما بقا قادرة اتحمل 

سمعت صوت دعسات رجلين جاي لعندي ،بعدين اختفى الصوت،رجعت خبطت على الباب

سارة:وين رحتو …افتحو الباب 

نظيرة:يا روحي انا ، عم تتوجعي ،زعلتيني عليكي ،يلا كلها كام ساعة بس و بترتاحي ،كنت حابة اعطيكي مسكن بس خالص من عندي يلا للمرة الجاية اذا فكرتي تحبلي يعني هههههههههه

https://www.barabic.com/real-stories/11028