رواية زهرة والبيت الملعون الجزء الحادي عشر
اتعلق جوزي بالست انجي دي اووي لدرجة اي حاجة تقول عليها يصدقها وخاصة بعد ما خرجت السحر من بيتنا ، وانا صراحة مش مصدقة موضوع السحر دة دخل ازاي بيتنا .
وفي يوم لقيتها جت عندنا ودخلت وهى قلقانة اوووي وبتقول انتوا بخير …انتوا بخير طمنوني ؟ بصيت ليها اووي واستغربت وقبل ما ارد عليها رد فؤاد : ايوة بخير الحمد الله ، فى ايه؟.
قالت: الجن بيقول ان عندكم ناس شريرة عاوزة تأذيكم ، وانا جيت على ملا وشي والله ، بصيت ليها اووي وقلت: ناس تأذينا ازاى. قالت : فى جن شرير هنا عاوز يأذيكم ، لحظة كدة وسكتت كانها بتسمع حد بيتكلم او حد بينادي عليها .
واتحركت في البيت بخطوات فيها حذر جامد وقعدت تدخل كل اوضة واحنا معاها مستغربين اووي ، لحد ما دخلت اوضة فيها خزين وكراكيب البيت ودخلت ، جينا ندخل قالت: لا خليكم هنا.
حريق كبير
وقفنا بره وشوية لقيتها بتقول كلام مش مفهوم خالص ولقيتها بتقول اخرجوا من هنا الناس دي فى حمايتي ، ولحظات لقيتها بتصرخ وتقول هات جردل مية يا فؤاد نطفي النار بسرعة .
جرينا على الاوضة لقينا فيها نار ماسكة فى شوال هدوم قديمة في البيت ، جري جوزي بسرعة جاب طبق مية كبير وانا وهي بنبعد الشوال بعيد عن الحاجة التانية علشان النار متمسكش فيها .
وبسرعة لقيت جوزي جاب المية ورماها على النار والغريب انطفت بسرعة كأنها عود كبريت ، كنا بصراحة مصدومين من النار وال حصل ده ، بصت هى بخبث وقالت : خلاص متخافوش هما اتحرقوا والراجل ال معايا حرقهم ليكم ،شفتوا نارهم .
استعراض قوة
قلت ليها باستغراب : هى دي نارهم بعد ما اتحرقوا ! قالت : اه اديكم شفتوا النار ، لقيت جوزي بيشكرها اوووي وبيقول: انتي ست عظيمة اوووي ، انتي انقذتي حياتنا، الحمد الله .
لكن انا حسيت ان فيه حاجة غريبة ومش منطقية ابداً ، وفكرت اوي وقلت : ازاي الجن يتحرق واحنا نشوف النار بتاعته ؟
دي مخلوقات مش مرئية ، حتى لو اتحرقت او ماتت مش بنشوفهم ممكن اعرف ازاي دة حصل ؟.
بصت ليا بصة وحشة اوي وقالت وهي رافعة حاجبها: لا معلوماتك كلها غلط يا ست زهرة ، الجن والعفاريت بيتحرقوا ونارهم ممكن تظهر وتشوفيها عادي، وانتوا شفتوا النار بعينكم وانا مش هضحك عليكم او عاوزة منكم حاجة .
عراك قوي
لحظتها جوزي ادخل وقال : سيبك منها يا ست انجي ، دماغها تعبانة ، انا مصدق كلامك طبعاً بدليل النار دي ، وبعدين مش مشكلة يموتوا يتحرقوا المهم اننا بخير الحمد الله.
عرفت وقتها ان جوزي خلاص بقا فى جيب الست انجي خلاص، و مستحيل بعد كدة يشك فى اى حاجة تقولها ، بعد الموضوع دة قعدت شوية تتفاخر بالجن ال معاها .
بعد كدة استأذنت ورجعت بيتها تاني ،وبعد ما خرجت انفجرت فى فؤاد بصراحة ، قلت : انت ازاي تقلل مني كدة قدام الست دي؟
رد :انا مقللتش منك بس انتِ دايما تكذبيها في اي حاجة ، دي ورتنا النار بعنينا ، وقبل كدة السحر ،عاوزة ايه تانى بس.
صرخت فيه :علشان انا حاسة ان وراها مصيبة ، وعلشان انا عارفة بيتي كويس مكنش فيه حاجة زى السحر ده ، ومش بعيد هى ال حطت السحر ده وجاية تمثل علينا يا فؤاد.
لقيت وشه وملامحه اتغيرت وزعل اوي وقال: انتِ موهومة ، وبعدين امته هي حطت السحر وهي مش بتكون لوحدها هنا وانت على طول معاها ، رديت : ممكن اكون دخلت الحمام او انشغلت فى المطبخ وهي تحطه سهلة يعني.
جدال عنيف
بص وقال : طيب همشي معاك واحدة واحدة فرضنا انها حطت السحر ، طيب ايه مصلحتها ؟ هى مطلبتش حاجة مننا ، وغير كدة كمان النار ال كانت والعة فى الاوضة دى كمان هى جابتها معاها.
قلت : عادي جدا ممكن تولع فيها بايدها ، اشمعنى الاوضة دى رفضت ندخل معاها فيها ؟ مسألتش نفسك ليه رفضت ؟
لقيته سكت وفكرشوية وبعدين بص ليا وقال: على فكرة كلامك كله مش منطقي ودى غيرة منك مش اكتر .
يا زهرة انا مش هبص ليها ابداً دى اكبر مني ،قلت ليك اكتر من مليون مرة كدة ، بصيت ليه والدموع في عنيا وقلت: الموضوع اكبر من انك تحبها او تبص ليها ، انا حاسة انها مش كويسة .
قال : اطردي الوساوس دي من راسك وهي لحد دلوقت كويسة معانا ، لما تطلب حاجة مش كويسة وقتها نقول انها شريرة وعاوزة تعمل حاجة وحشة فينا ، اقفلي على الموضوع دة .
سكت وانا قلبي مقبوض اوي من انجي دى ، ومرت ايام وكل يوم بتقرب من جوزي اكتر وبيرتبط بيها اكتر ، وبيشتغلوا مع بعض في العلاج حاجات تانية معرفتش بصراحة ايه هى.
حاولت اعرف في ايه بينهم تاني لكن فشلت ، لانها كانت حريصة اوي مني …انا بالذات ، الغريبة ان الجنية فاطمة اختفت ومبقتش تيجي ليا زي الاول ! كانت دماغي هتنفجر من التفكير .
عرض اخر
وفي يوم لقيت جوزي جاي وبيقول :عاوزك فى موضوع مهم اوي ، قلت : خير يارب في ايه ؟
رد : احنا عاوزين نخرج الكنز ال تحت بيتنا ده ونبيعه عندي ناس هتشتري كل ده بفلوس كتير اوي .
بصيت ليه وقلت: تاني … تاني يا فؤاد هنرجع للوهم دة !
زعق فيا وقال: دة مش وهم ، ده حقيقة وانتى نفسك شفتيها بعينك
قلت: ايوة وبعدين اختفت ومستحيل تظهر تاني صدقني ، قال: لا المرة دي هنخرج الكنز ، احنا معانا انجي والعفريت ال معاها .
عرفت وقتها ان دة كلام الشيطانة دي ال اسمها انجي مش كلام جوزي ، قمت وقفت على رجلي وقلت : لا مش هنحفر ولا ننيل حاجة تاني احنا كدة البيت هيقع علينا يموتنا خلي بالك .
لقيته مسك دراعي بعنف وقال : هنحفر يعني هنحفر انا مش هضيع الكنز ده كله من ايدي ، والبيت متخافيش عليه مش هيقع
قلت : اوكى احفر انت والست هانم بتاعتك دي انا مليش دعوة بيكم انا فى حالي وانتوا فى حالكم .
لقيته اتعصب اوي وقال : يعني ايه كلامك دة ؟ انتى بتهدديني انا مش عاوز منك حاجة انا هجيب ناس تحفر وانجي هى ال هتخرج الكنز وساعتها بقا شوفي انا هعمل ايه معاكِ.
واتخانقنا خناقة كبيرة اوي كاعادة ، وبعدها خرج وانا قعدت ابكي اما فؤاد بقا راح حكى كل شيء للست هانم وعرفها اني مش هكون معاهم فى الحفر ده ابدا، ومفيش ساعتين تقريباً لقيت الباب بيخبط عليا فتحت الباب لكن لقيت مفاجاة .
تابع الجزء الثاني عشر والأخير
يجب أنت تكون مسجل الدخول لتضيف تعليقاً.