رواية زهرة والبيت الملعون الجزء السادس
بعد حريق اوضة الضيوف والحلم ال شفته اتحقق ، وطبعاً هون فؤاد من موضوع الحريق وقال دة ماس كهربائى . حصل حاجة غريبة بعد ما نمت تانى ليلة .
شفت اشكال غريبة اووى ، مسكونى وكتفونى بحاجة مش شايفه هى ايه….!
وقربوا منى وقالوا : مش قلنا ليك متخرجيش من البيت
صرخت وقلت : مش انا …..مش انا دة جوزى .
قالوا ترجعى البيت وتحفروا فى المكان دة ، ومسك واحد دراعى وقعد يرسم عليه مكان فى بيتنا ،
لو معملتوش زى ما قلنا هنحول حياتك لجحيم ، صحيت وانا بصرخ و اقول حاضر. …..حاضر. ….
ببص جنبى لقيت جوزى قام من النوم على صوتى،
فؤاد : مالك. تانى ….. حصل ايه ؟!
انا و بخوف كابوس. كابوس تانى ….. وقعدت ابكى،
فؤاد: طيب احكيلى بس حصل ايه واهدى شوية .
مشهد عجيب
حكيت ليه كل حاجة. وقلت ليه على كلامهم وبقول ليه على الرسمة. و برفع هدوم النوم من على دراعى و اقوله رسمه كدة ، لكن لقيت الر سمة موجودة فعلاً.
ايه دة مش معقول…..حتى جوزى مكنش مصدق ال بيشوفه دة بعنيه….. فعلا مرسوم على ايدى رسم مكان فى بيتنا . بصيت لفؤاد وقلت ليه صدقتنى …صدقت ان كل ال بيحصل دة مش وهم .
فؤاد كان ساكت مش قادر يتكلم ابدا ،دة شايف الرسم بعنيه .
بص ليا وقال: طيب هما قالوا ايه ليكى ؟
رديت عليه وقلت اول شيء طلبوا منى ارجع البيت و مسبوش مهما حصل ، وبعدين طلبوا نحفر فى المكان دة .
فؤاد بص ليا. وبص فى الرسم وقال المكان دة فى بدروم البيت ، دة زى ما يكون صورة طبق الاصل !
اما هتجنن معقولة الكلام دة ؟! بصيت وقلت احنا الصبح نرجع لانهم هددونى انى لو مرجعناش البيت حياتنا هتكون جحيم .
فؤاد سرح فى الكلام وفكر فيه كويس وبعدين قال :بكرة هجيب عربية تاخد حاجتنا و نرجع تانى البيت.
وفعلا عدت الليلة واحنا خايفين ولما النور طلع راح جاب عربيتين كبار ورجعنا البيت .
ورجعنا كل شيء زى ما كان ، واتفقنا اننا نحفر تانى يوم بعد ما نستريح من تعب نقل العفش. وكدة .
تانى حفر فؤاد بنفسه. وكنت انا بساعده ومستغربين ليه الجن عاوزنا نطلع الكنز !.
هل هما فعلاً عاوزين نكون اغنياء ولا ليهم هدف تانى مش معروف!!
مر يوم بحاله واحنا بنحفر ولكن كان لسه موصلناش لحاجة، لدرجة جوزى تعب اووى من الحفر وقال اكيد بيضحكوا علينا ،وكان محتار يكمل ولا خلاص .
ومن التعب نمنا على طول ولكن انا شفت فى المنام نفس الافراد بيقولوا ليا. كملوا حفر. و ورونى مكان الباب انه قرب من الحفر
والعجيبة انى مبقتش اخاف. او ابكى زى الاول ،حسيت انى خلاص اخدت عليهم و اتعودت عليهم .
عرض مغرى لزهرة
صحيت عادى خالص وحكيت لجوزى كل شيء حلمت بيه ،
رحنا ابتدينا نحفر تانى وبعد حوالى ساعتين .
من الحفر حسينا بشيء زى معدنى ، رفعنا عنه التراب واتضح انه نفس باب المقبرة ال شفتها قبل كدة.
قلت لجوزى : دة باب المقبرة ال شفته ودخلتها لما كان الدجال معانا ،رد فؤاد وقال طيب ازاى هى اختفت وجت هنا تانى!
قلت : معرفش هدخل واشوف فيها الكنوز. ولا مفيش حاجة فيها .
فعلا اخدت كشاف النور. وفتحت الباب ودخلت ولقيت نفس التماثيل موجودة زى ما شفتها المرة الاولى ، قربت منها علشان اتاكد لكن فجأة اختفت زى اول مرة…… قلت ايه دة حصل ايه وناديت عليهم روحتوا فين. انتو فين .
وفجأة لقيت الصوت المجمع بيتكلم معايا تانى. ويقول الكنز بيختفى بفعل فاعل ، احنا عاوزين الكتاب بس فى ارواح. تانية بتخفى الكنز لما بتحس بينا . قلت طيب اعمل ايه انا…. دى تانى مرة تختفى كل حاجة.
رد الصوت المرعب دة. وقال احنا هنفضل معاك لحد ما نلاقى الكتاب والمقبرة دى وهنساعدك فى اى حاجة تقف قصادك حتى لو فى حد تعبان من مس او سحر احنا هنساعدك علشان تحسي بالامان معانا بس بشرط.
بصيت وقلت : شرط….. شرط اية يا ترى ؟!
رد الصوت وقال : انك تقعدى فى البيت طول العمر لحد ما نلاقى الكتاب وبعد كدة تقدرى تمشي منه .
غير كدة هنساعدك فى علاج اى حالة مس او سحر لى اى شخص تعبان يعنى تقدرى تساعدى الناس واحنا معاك وممكن تاخدى فلوس من اى حد تعالجيه .
مفهمتش يعنى ايه اعالج الناس سألتهم يعنى اعمل ايه مش عارفة قالوا : فى ناس بيحصل عندها مس من الجن عندنا او سحر ومحدش بيعرف عندهم ايه لو انتى ساعدتيهم احنا بدورنا هنطرد الجن منهم دة بقوتنا الكبيرة وبعد كدة انتى تاخدى اجر على الحالة لما تخف وتشفى وممكن تجربى .
بصراحة مقدرتش ارفض او اعترض قلت ليهم حاضر حاضر
بس اخرج من المقبرة دى . فعلا خرجت وفؤاد بيبص ليا ومستغرب على الهدوء الكبير بتاعى!
فؤاد : حصل ايه لقيتى حاجة تحت ؟
رديت بهدوء وانا سرحانة فى كلامهم وقلت لا اختفت الحاجة تانى معرفش ازاى ! فؤاد: معقولة يبقى فى سر بقا !.
قلت : اه وهما كلمونى تحت وقالوا دى ارواح تانى بتخفى الكنوز وقالوا عاوزين الكتاب بس وانتى خدى الذهب والتماثيل و طلبوا اقعد فى البيت لحد ما يتصرفوا ويعرفوا ياخدوا الكتاب بيا .
بعدها قلت ليه على موضوع المساعدة والعلاج للناس لانى مش فاهمة اعمل ايه !
رد عليا وقال : اه فى ناس بتعالج ناس كتير . بس هما اكيد هيعرفوا يخرجوا اى جن فى اى حالة مس او سحر…. طيب ما نجرب الاول مجاناً ولو كلامهم صح ممكن ناخد فلوس منهم.
انا رفضت اصلاُ الفكرة وقلت طبعا لا . وبعدين مش هاخد فلوس من ناس علشان اساعدها لو هعملها يبقى من غير فلوس.
سكت جوزى لانه عارف مبدائى وعارفنى كويس .
لكن بعد كدة قال طيب هنجرب نشوف كلامهم صح ولا غلط هنجيب حد تعبان وهنشوف هيحصل ايه معاكى وهل فعلا هما هيقدروا يعملوا حاجة . وكمان انتى هتعرفى ازاى تساعدى .
يا ترى هيحصل ايه بعد كدة ؟
تابع
يجب أنت تكون مسجل الدخول لتضيف تعليقاً.