قصة السيدة الام والبطتان

لقيت ست قاعدة ع الارض … حاطه قدامها قفص و عليه بطتين بلدي..أيوة بطتين 2 بالعدد و كانوا كبار شويه
انا مش بحب البط الكبير فقلت لها عاوز بط أصغر شوية من فضلك …. قالتلي مفيش غير دول قولت لها خسارة يمكن لو كنت جيت بدري شويه كنت لقيت حاجة تاني … راحت مدارية وشها و معيطة ….

ليه يا حاجه بتعيطي و الله ما أقصد حاجة وحشة …. قالت اصل لو كنتي جيتي الصبح بدري كنتي برضه هتلاقيهم دول هما هما

أنا قاعدة كده من بعد الفجر و انا مش بياعة ….دول كنت مربياهم بقالي 5 شهور علشان اوكلهم للعيال و لما راحوا المدرسة بهدومهم و شنطهم القديمة اتكسفوا من صحابهم ورجعوا مكسورين الخاطر و دبلانين .
صحيتهم الفجر و سألتهم :

اجيبلكم لبس وشنط و لا تأكلوا البط؟
قالولي اللبس والشنط

فطلعت ع السطح جبت البطتين و استأذنت صاحب المحل ده اقعد قدامه ابيعهم و اروح
و كل اللي يعدي يخسف بيهم الأرض و خايفة يموتوا من الحر …. و لا العيال تأكل و لا تتعلم. … قلت لها عاوز فيهم كام؟

قالتلي الواحدة ب 70 و الله دول تربية بيتي و بلدي و الواحدة ترمي يجي 2 كيلو لحم. …. بس بالله عليك ما تفاصل فيهم

قولت لها طيب انا مش بعرف ادبح ممكن تدبحيهم و تنضفيهم و اديتها 200ج و هجيلك بعد شوية بس هجيب حاجة و اجيلك ….

فرحت جدا و قالتلي حاضر هدبحها عند الفرارجي اللي ع الناصية و استناك بس متتأخرش عليا
طلعت جري ع التوحيد والنور

اخدتلها شنطتين و شوية أدوات دراسية و اخدت فلوس زيادة و نزلت جري برضو
اشتريت شوية خضار و سمنة و زيت و رز و رجعت لها لقيتها ماسكه كيس فيه البط و فرحانه قوي اديتها الحاجة و قولتلها روحي اطبخي الفرختين للعيال قالت دول بتوعك قولتلها ما انا قولتلك من الأول مش بحب البط الكبير
عيطت وقعدت تدعيلي

بعدها خرج صاحب المحل اللي مراقب الموقف كله من أوله. …. قالها مش قولتلك ربك كريم
مشيت و هي في منتهي السعادة بعد لما اديتها رقمي
وقفت شويه ابصلها و هي بتبعد ….

صاحب المحل بصلي وقالي عرضت عليها الصبح فلوس …. رفضت سيبتها تقعد و كل شوية أطل عليها و الله كان في نيتي اديها تمنهم بس عفتها منعتني و لما شوفتك طولت معاها. ..دخلت صليت و دعيت ان ربنا يرقق قلبك عليها
و الحمد لله ….. استجاب

اللهم رقق قلوب خلقك على خلقك
و لا تول علينا من لا يخافك ولا يرحمنا