رواية العرافة (كاملة)

صحيت من النوم علي آذان الفجر قومت صليت وقرأت الورد اليومي بتاعي وبدأت أجهز شنطتي مش مصدقه اني خلاص هرجع بيتنا تاني واحشني قوي ووحشتني لمتنا سوا وصوت ماما وحضنها الدافي بتاع بالليل وشقاوه اختي وهزارنا سوا ،

وزعلانه اني خلاص هسيب اسكندريه آخر يوم ليا هنا مش قادره اتصور 4 سنين مروا بالسرعة دي علي فكره اسكندريه كمان هتوحشني قوي جميله بكل تفاصيلها بس للاسف بحكم دراستي مكنتش بقدر اخرج كتير علشان كده قررت اني اخرج انهارده اغير جو واودعها قبل ما اسافر جهزت كل حاجه ليا تقريباً ولقيت تليفوني بيرن .
صباح الخير يا ست الكل .
صباح النور يا حبيبتي.

انا كنت عايزه اكلمك من بدري بس خوفت تقلقي.
لا يا حبيبتي انا صاحيه من بدري اصلا صليت وبجهز شنطتي .
عامله ايه؟ وهتيجي امتي؟ انتي وحشاني قوي يا اشرقت .
هههههههه كل ده يا ماما امال لو مكنتش باجي كل اسبوع والاجازات كنتي هتعملي اي بس علي العموم خلاص هانت كلها ساعات وابقي قدامك بأمر الله .
ياااارب يااارب بقي انتي هتوصلي علي 6 صح .

اه يا ماما بأمر الله .
ان شاء الله يا حبيبتي توصلي بالسلامه خدي بالك من نفسك.
حاضر يا حبيبتي.
لا إله إلا الله.
محمد رسول الله.
كملت تجهيز شنطتي وقفلتها كنا لسه بدري بس كنت عايزة الحق اليوم من اوله وكلمت ندي صاحبتي علشان ننزل سوا زي ما كنا متفقين
الو ايه يا بنتي انتي فين كل ده علشان تردي
معلش يا اشرقت كنت بجهز الشنطه وخلاص اهو قربت اخلص ، انتي خلصتي ولا ايه؟
اه لسه مخلصه قبل ما اكلمك .

طيب انا 5 دقايق وهخلص ابداي البسي بقي.
تمام هكلمك لما اخلص .
سلام .
سلام .
غيرت هدومي وقولت انزل اسبقها لحد اما تخلص وشويه وهكلمها تاني انا عارفه ال 5 دقايق بتوعها نزلت استناها تحت بس شوفت واحده شكلها غريب معرفش لي قلبي اتقبض لما شوفتها نظره عنيها ترعب اي حد والغريب انها كانت مركزه معايا انا بالذات استغربتها بس مشغلتش بالي بيها يمكن اكون شبه حد هي تعرفوا في وسط تفكيري لقيت ندي قدامي
ايه يا بنتي انتي فين ؟

فين اي ما انا قدامك اهو
اصل بكلمك ومش بتردي
ها معلش بس تلاقيني سرحت شويه
ههههههههه اللي واخد عقلك .
ندي وبعدين .
خلاص خلاص يلا نشوف هنروح فين.

روحنا فطرنا ولفينا شويه واشترينا هدايا والوقت جري بسرعه لقيت ندي بتقولي اشرقت الساعه بقت 12 انا يدوب الحق ارجع تاني علشان معاد القطر بتاعي لازم امشي دلوقتي ودعتها وفعلا هي رجعت وانا كملت ياااااه الساعه بقت 2 انا المفروض ارجع دلوقتي وانا راجعه لقيت نفس الست اللي شوفتها اول ما نزلت انا لي كل اما اشوف الست دي بخاف كده ولي هي بتبص عليا كده واشمعني انا بالذات الفضول خدني خلاني اروح اعرف هي لي بتعمل كده وايه سبب النظره دي ورحت اكلمها بس الغريب مكنش في بصتها

وبس لبسها ونظره عنيها نظره الحقيقه مش لاقيه ليها تفسير قربت منها وحاولت ابين اني مش خايفه مع اني كنت مرعوبه سالتها انتي تعرفيني بصتلي وقالت بتسألي ليه قولتلها بصتك ليا من وقت ما نزلت اول مره ودلوقتي قالتلي أنا معرفكيش بس انتِ صعبانه عليا قررت امشي واسيبها انا اصلا متاخره ومش ناقصه وجع دماغ دي شكلها واحده فاضيه واول ما اديتلها ظهري لقيتها ندهت عليا بأسمي مقدرتش اتحرك من مكاني هي ازاي عرفت اسمي ودي اول مره اشوفها لفيت ليها تاني

وبصيت لها بصدمه قالتلي تعالي رجعت ليها تاني بس المره دي خوفي اتضاعف اكتر من الاول قالتلي مالك مستغربه اني عرفت اسمك مش كده بصتلها وانا مش قادره اتكلم نظره الغموض اللي في عنيها رهيبه وانا مش عارفه ارد صوتي اتكتم جوايا وضربات قلبي زادت لما لقتني ساكته قالتلي انا سمعت اسمك من صاحبتك اللي كانت معاكي بس ده ميمنعش اني اقدر اعرف عنك حاجات كتير وحاجات ممكن تحصلك المره دي اتكلمت وقولتلها ازاي قالتلي من ايدك هاتي ايدك وانا اثبتلك كلامي خدت ايدي

وشافتها وانا كل ده لسه تحت تأثير الصدمه بصت في ايدي كتير وماتكلمتش جيت اشد ايدي منها ضغطت عليها جامد لدرجه حسيت انها هتتكسر وبصتلي وقالتلي انتي عيد ميلادك انهارده عيد ميلادي ايوه هو انهارده بس انا كنت ناسيه قولتها ايوه قالتلي اختك عملالك مفاجأة بس مش هتكمل زي فرحتك بالظبط .شديت ايدي منها المره دي بس اقوي من اللي قبلها لدرجه ان ظافري عور وشها وسيبتها وطلعت اجري مكنتش عارفه انا بجري لي خايفه منها ولا مش عايزة اسمع كلامها اكتر من كده صوتها لسه في ودني مش قادره انسي نظرتها وصوتها طلعت التليفون من الشطنه

وايدي بترتعش وحاولت اطلع صوتي طبيعي علي قد ما اقدر مش عايزة حد فيهم يقلق ولا يخاف انا بس عايزة اطمن عليهم كلمتهم في البيت الحمد لله مفيش حاجه بس ثانيه كده هي قالتلك فرحتك مش هتكمل معقول معقول تكون قصداه هو يارب اكيد لا دي كدابه مش هصدق كلامها مسكت التليفون وطلعت رقموا وانا مش قادره حتي اخد نفسي مش قادره مجرد فكره ان يحصله حاجه دي موت بالنسبه ليا طلعت رقمه واتصلت بيه اول مارد عليا كنت منهاره معرفتش اتكلم فضلت اعيط وبس فضل يهديني ومكنش فاهم مني ولا كلمه بس مجرد صوته اني سمعاه ده طمني بدات اتكلم معاه بس مقدرتش احكي حاجه عن اللي حصل قولته اني كنت خايفه وبس عمر مش بيحتاج لاسباب ، كفايه اني عارفه ان هو الوحيد اللي بيتحملني في كل حلاتي

وقبل ما اقفل معاه الخط قطع لوحده كلمته تاني بس للاسف مقفول خوفي رجع بس كنت بطمن نفسي اكيد مش هصدق كلام زي ده بس الاغرب من كل ده ان محدش كلمني في الطريق ولما وصلت ملقتش عمر مستنيني زي كل مره كلمتهم كلهم ومحدش بيرد روحت البيت وانا مرعوبه وفتحت باب الشقه وكانت الصدمه