قصة سارة الجزء الثالث

مازن: ها انت هون , عم قول ليش نور المول
فادي : منور بصحابو , هيدي سارة يلي خبرتك عنا
مازن : اهلين اختي , بما انك من طرف فادي خلص اعتبري حالك توظفتي

سارة : ميرسي بس انا ما برضى اتوظف بالواسطة , شوف شغلي و اذا ما عجبك سرحني
مازن : عندك خبرة بهالمجال ؟
سارة : لا ابدا جاي اخد الخبرة من عنكن و انا بتعلم بسرعة
مازن : الموضوع سهل كتير ….ريماااااا …
ريما : ايه مسيو مازن

مازن : خدي الصبية معك لتحت عند الكاشير و خلي سعيد يعلما المبادئ لانو بدا تشتغل معو
ريما : تفضلي معي
سارة : عن اذنكن شكرا كتير
نزلت مع الصبية ريما لعند الشاب سعيد
ريما : سعيد بقلك مسيو مازن هالصبية رح تشتغل معك بس ما عندا خبرة علما انت

اطلع فيني من تحت لفوق و زم تمو , كان شكلو سعيد كاريكتوري شوي بنطلون زاحط و شعر منكوش , طويل و نحيف , شعرو اسود , و دقنو خفيفة و ملامح وجهو ناعمة
سعيد : تفضلي يختي
سارة : تفضلت
قعدت على الكرسي جنبو , اعطاني اليونيفورم تبع المول لالبسو

سعيد : بتمسكي الغرض هيك و بتحطيه على هالالة كرمال سعرو و فورا بينزل سعرو على الكمبيوتر قدامك , كل قطعة هيك بتعملي , بعدين بتجمعين و بتعملي برينت لتطلع الفاتورة بقائمة المشتريات , في اسهل من هيك ؟
سارة لا ابدا
سعيد : بضبي الاغراض بالكيس و بتعطيه للزبون و بتاخدي قيمة الفاتورة و بتحطيا بهالدرج …بهالدرج ….ما بجيبتك ههههههههههه
سارة :ههههههههه اكيد طبعا

سعيد: بعرف بس لانو انا نسيت كذا مرة و ضبيتن بجيبتي لهيك عم نبه عليكي يلا اقعدي خيتا محلي و عيدي شو قلتلك
سارة طيب خيا
انا و عم احكي سعيد , شفت فادي ماسك سلة و عم يتفتل بين الممرات ويشتري اغراض لبيتو , بعد ما خلص اجا لعندي
فادي: شو شايفك بلشتي ؟

سارة ايه بروفا هلا بس رح طبق عليك شو تعلمت
اطلع سعيد بفادي و ضحك
سعيد: الله يستر ما تعملك الفاتورة اضعاف
فادي(مبتسم):أي شوف شو عم تشتغل معناها

فضيت السلة من الاغراض و عملت متل ما قلي سعيد, ضب الاغراض سعيد بالاكياس و ناولن لفادي
سعيد: نورتنا حبيب
فادي:سارة كرمال الدوام في عندك دوامين من ال 9 ل 4 و في من ال4 ل 12 شوفي شو بناسبك و خبريه لمازن و اتفقو على الراتب
سارة :ماشي شكرا كتير الك , ما رح انسالك هالمعروف ابدا

حسيتو خجل و تلبك
فادي: سلام
سارة : الله معك
طلع من الباب و حط الاغراض بصندوق السيارة , انتبه علي عم اطلع عليه , درت وجهي فورا و لهيت حالي بالكمبيوتر , اخدت الدوام المسائي كرمال جامعتي مع راتب احسن من المتوقع,كان احلى شي بيومي هو شغلي بالمول جنب سعيد يلي كان يقضي كل الوقت بالضحك و المزح و النكت و احيانا الهبل , بعد اسبوع رجعت شفت فادي عنا بالمول , جاي يشتري اغراض للبيت

سارة : سعيد تعا استلم محلي جاي
سعيد:وين رايحة وليه دبة ؟
سارة:دبة بعينك جاي ما بطول, شد بنطلونك رح يوقع على الارض
رحت لعند فادي , شفتو علقان برفوف الشامبو
سارة(مبتسمة):مسالخير
فادي : مسالنور

رد على السلام بنظرة سريعة بدون ما ينتبه علي , بعدين انتبه
فادي : اهلين ما عرفتك
سارة : أي مغيرة لون شعري للاشقر , شفتك من بعيد كانو عم دور على شي و ما عم تلاقيه , قلت بجي بساعدك
فادي:أي ولله عم دور على شامبو وصتني عليه نتالي بس ما عم لاقيه
سارة : شو اسمو؟

فادي: اسمو …..اسمو …..هيربل اسنسز بالاعشاب
سارة : أي ليكو
مديت ايدي من جنبو ,تلبك و بعد شوي عني
سارة : تفضل
فادي : يسلم ايديكي كيف ما شفتو

سارة : ولا يهمك , أي شي بلزمك اشرلي بايدك و بجي لعندك فورا
فادي : كيف شغلك هون ؟
سارة : لحمدلله كتير مرتاحة و مبسوطة
فادي : شكلك اخدتي الدوام المسائي
سارة : ايه كرمال جامعتي
فادي: كيف عم ترجعي لحالك ؟

سارة : سعيد بوصلني بطريقو على بيتو
فادي: منيح
سارة : يلا عن اذنك
تركتو و رجعت لمحلي , طول ما هو عم يتسوق انا عم اطلع عليه , كل ما يطلع فيني دير وجهي , وصل على الكاشير , حسبتلو اغراضو و ضبيتن بكيس , قام بسكويتة من الكيس

فادي : هاي الك و هاي لسعيد
سعيد: اجت بوقتا يا معلم بس بدا فنجان قهوة
اطلعت فيه لسعيد و زورتو و انا عم اضحك
سارة : هلا انا بعزمك عليه
فادي:المرة الجاية , يعطيكن العافية
سارة الله يعافيك اهلا و سهلا

بالليل وقت سعيد كان عم يوصلني على السكن ,مرينا من حاوية زبالة و طلعت منا قطة , قام ارتعب سعيد و مسك فيني و انا فرطت ضحك
سارة :العمى ما ارجلك , خفت من قطة
سعيد : ما خفت بس جفلت
سارة : شكلي انا يلي عم وصلك ما انت
سعيد: اسكتي يا محتالة وين فنجان القهوة يلي بدك تعزميني عليه

سارة : من جيبتك
سعيد : بخيلة
سارة : خلص المرة الجاية جد
كان سعيد اكبر مني باربع سنين و متخرج نفس اختصاصي بس بفترة قصيرة حسيتو متل رفيقتي ,كان فادي يضل يتردد على المول كل اسبوع مرة , قربت امتحاناتي و اخدت اجازة لادرس يلي تراكم علي و قدم الامتحانات , بعد ما عطلت باسبوعين رن موبايلي , كان رقم فادي

فادي: صاير معك شي؟
سارة : لا ابدا ليش؟
فادي: رحت كذا مرة عالمول ما شفتك
سارة :انا معطلة هالشهر عم قدم امتحانات
فادي: ايوا ببالي مرضانة او في شي , الله ينجحك
سارة : الله يسلمك شكرا على اتصالك
فادي:……

سارة : كيفك انت؟
فادي: انا لحمدلله
سارة : و كيفا نتالي و الاولاد؟
فادي: لحمدلله بخير
سارة :امم طيب ماشي بشوفك , دير بالك على حالك

فادي: و انت كمان, الله معك
سكرت الخط و ابتسمت
سارة : ولله و علقت الصنارة اسرع من المتوقع
قدمت امتحاناتي و رجعت داوم بالمول بعد باسبوع انا و عم بيع زبون , لمحت حسام فايت و معو وحدة , وقفت جمدت بارضي لنكشني سعيد
سعيد: شبك ..الزبون ناطر

سارة : ايه ايه
مشيت الزبون و حسيت راسي فتل , دورت عليه بعيوني ما لقيتو , بعد ربع ساعة شفتو جاي باتجاهي و معو الصبية نفسا , كانت طويلة و ضخمة شوي , و شعرا اسود و لون بشرتا حنطية , ما كانت حلوة كتير بالنسبة لحسام , وصل لعندي و انا قلبي وقع و خفت يبين الارتباك علي حتى سعيد انتبه علي و قلي شبك
سارة : ولاشي تعا اوقف محلي و مشي هدول
خفت يرجفوا ايدي انا و عم ضبلن الاغراض قعدت على الكرسي ورا سعيد انا و عم نقل نظري بين حسام و الصبية يلي كانت معو و توقعت انها خطيبتو بس وقت شفت المحابس بايدين اليسار عرفت انو متزوجين , اطلع علي نظرة حسام و ما عرفني يمكن بعد ما غيرت لون شعري ,كنت عم خبي حالي ما بعرف ليش , حسيت حالي جبانة و ضعيفة كتير لواجهو , بس في شي جواتي رفض هالشعور , قمت وقفت و قربت لجنب سعيد انا و عم اتصنع الابتسامة بجدارة

سارة : بدك سعيد مساعدة ؟
اطلع فيني حسام مصدوم كانو شاف شبح قدامو ,ساعدتو لسعيد بضب الاغراض و ناولتو اياهن لمرتو 
سارة : تفضلي مدام اهلا و سهلا
تناولت الاكياس من ايدي و حسام واقف متلبك و طلع من المول و هو عم يتلفت علي , حسيت بارتياح داخلي بعد ما بينتلو اني قوية و ما تلبكت من شوفتو هو و مرتو و لا كانو فرقت معي بس من جوا كان قلبي عم يعتصر من القهر و الوجع و زاد حقدي عليه و على السبب بيلي حرمني السعادة و حرمني كون محلا لمرتو ,كنت ناطرة طلة فادي بفارغ الصبر , و اول ما شفتو رحت لعندو بحجة انو بدي ساعدو

فادي: كيف قدمتي؟
سارة : منيح ماشي الحال , شكلي رح احمل مواد كتير هالسنة
فادي: شغلك بالمول اثر على دراستك
سارة : أي ولله كتير بس شو بدي اعمل مضطرة
فادي: اذا بدك بشفلك شغل تاني بدوام اقل و مريح اكتر
سارة : لا مرتاحة هون بكفي شوفتك

فادي(مبتسم):….
سارة : احذر مين اجا من يومين لهون ؟
فادي: مين ؟
سارة : حسام و مرتو
فادي: بالله , صح قالو من يومين انو بدن يمرو يشترو كام غرض و يشوفوا لمول الجديد
سارة : بس ما تفهم كلامي غلط , ما صدقت انو يلي جنبو بتكون مرتو
فادي: سمر؟ ليش شبا؟

سارة : ما مناسبة ابدا , اضخم منو , كنت متوقعتلو ياخد وحدة غير هيك و خاصة انو هو ذوقو صعب و ما بيعجبو شو ما كان , بتقربلو يعني ؟
فادي: لا سمر بتكون رفيقة مرتي
حطيت ايدي على تمي لاداري ضحكتي , انتبه علي
فادي: ليش عم تضحكي؟
سارة : ما بقدر احكي
فادي: عادي احكي

سارة : هلا المرة الحلوة مضرة بالصحة بس ولله حرام , مرتك ما بتحب تشوف حدا احلى منا , بتغار كتير
فادي: ……
سارة : ولله بعتذر ما قصدي اغلط عليا عن اذنك
تركتو و رجعت لمحلي , انا و عم لاحقو بنظراتي و هو كان يطلع علي كل شوي , حسيت حالي رميت فاتوشة رح تولع بين فادي و نتالي او يروح يقول لحسام انا شو قلت عن مرتو ,اجا فادي حط السلة عنا
فادي: مازن هون ؟

سارة : ما بعرف , شفتو شي سعيد انت اليوم ؟
سعيد : لا شوفو اذا بمكتبو
فادي: طيب رح اطلع و اترك الاكياس هون
سارة : رح خلي سعيد يحطلك اياهن بالسيارة
فادي: طيب

طلع فادي و نزل بعد شوي , ما كان مازن فوق , شكرنا و هو طالع , نطرتو ليطلع بسيارتو و طلعت وراه انا و حاملة كيس معي كنت قايمتو على جنب
سارة : فادي .فادي